ޔޫރޯ 2020 ގެ ގްރޫޕް ޑީ ގައި ކްރޮއޭޝިއާ އާއި ޗެކް ރިޕަބްލިކް ހުކުރު ދުވަހުގެރޭ ބައްދަލުކުރާއިރު, މި މެޗަކީ ކްރޮއޭޝިއާއަށް މަރުގެ މެޗެކޭވެސް ބުނެވިދާނެއެވެ. މި މުބާރާތުގައި ކުޅުނު ފުރަތަމަ މެޗުން އިންގްލެންޑް އަތުން 1-0 ގެ ނަތީޖާއަކުން ކްރޮއޭޝިއާ ބަލިވެފައިވާއިރު، ޗެކް ރިޕަބްލިކް ވަނީ 2-0 ގެ ނަތީޖާއަކުން ސްކޮޓްލެންޑް ބަލިކޮށްފައެވެ.

އެހެންކަމުން މުބާރާތުގައި ކުރިއަށްދާން ކްރޮއޭޝިއާއަށް މި މެޗު މުހިންމެވެ. އަދި މި މެޗުން މޮޅުވެގެން ދެވަނަ ބުރުގެ ޖާގައެއް ހޯދުމުގެ ފުރުސަތު ޗެކް ރިޕަބްލިކަށް އެބައޮތެވެ.

މި މެޗުގެ ކުރިން ކްރޮއޭޝިއާގެ ކޯޗު ޒެލާޓްކޯ ޑަލިކް ބުނީ މި މެޗަށް ނުކުންނައިރު ޗެކް ރިޕަބްލިކަށް ޕްރެޝަރެއް ނޯންނާނެ ކަމަށާއި، އެކަމަކު ކްރޮއޭޝިއާއަށް އޮތް ޕްރެޝަރު ބޮޑު ކަމަށެވެ. އަދި މި މެޗަކީ މޮޅުވާން މަޖުބޫރު މެޗެއްކަން ފާހަގަކުރަމުން ޑަލިކް ބުނީ މެޗުން މޮޅުވެ މުބާރާތުގައި ކުރިއަށް ދިޔުމަށް މުޅި ޓީމު އޮތީ ތައްޔާރަށް ކަމަށެވެ.

ޗެކް ރިޕަބްލިކުގެ ކޯޗު ޔަރޯސްލާވް ޝިލްހަވީ ބުނީ މި މެޗުގައި ޗެކް ރިޕަބްލިކުގެ ފުރަތަމަ އެގާރައިން ބަދަލުތަކެއް ފެނިދާނެ ކަމަށެވެ. އަދި ކްރޮއޭޝިއާއާ ދެކޮޅަށް ކުޅުމަށް އޭނާގެ ޓީމު އޮތީ ތައްޔާރަށް ކަމަށާއި، މެޗަށް ނުކުންނާނީ ދެވަނަ ބުރުގެ ޖާގައެއް ކަށަވަރުކުރުމަށް ކަމަށްވެސް ވަނީ ބުނެފައެވެ.

ޝިލްހަވީ އިތުރަށް ބުނީ ކްރޮއޭޝިއާއަކީ ބަލިކުރަން އުނދަގޫ ޓީމެއް ކަމަށާއި، އެ ޓީމުން ކުޅެމުން އަންނަ ސްޓައިލަކީ ޗެކް ރިޕަބްލިކަށް އުނދަގޫވާނެ ސްޓައިލެއް ކަމަށެވެ. އަދި ތަޖުރިބާކާރު ކުޅުންތެރިން ކްރޮއޭޝިއާގައި ތިބުމަކީ އެ ޓީމަށް އޮތް ފައިދާއެއް ކަމަށްވެސް ވަނީ ބުނެފައެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ކުޅިވަރު ނޫސްވެރިޔާ އިސްމާޢީލް ޝާހެވެ. ޝާހާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް ޑީ ގެ އެނަލިސްޓް މުޙައްމަދު ޝިޔާޒް (މޯހަން) އެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއްގެ ގޮތުން މުޙައްމަދު ނަޖީލު (ނަޖީ) ބައިވެރިވެވަޑައިގަންނަވާނެއެވެ.

ކްރޮއޭޝިއާ އާއި ޗެކް ރިޕަބްލިކް ބައްދަލުކުރާ މެޗު ފަށާނީ ހުކުރު ދުވަހުގެރޭ ރާއްޖެ ގަޑިން 21:00 ގައެވެ.