ޔޫރޯ 2020 - ސްވިޑެން އާއި ސްލޮވާކިއާގެ ކުރިމަތިލުން

ޔޫރޯ 2020 ގެ ގްރޫޕް އީ ގައި ހުކުރު ދުވަހުގެ ހަވީރު ސްވިޑެން އާއި ސްލޮވާކިއާ ބައްދަލުކުރާނެއެވެ. މިއީ ޔޫރޯގައި މި ދެ ޓީމު ބައްދަލުކުރާ ފުރަތަމަ ފަހަރެވެ. އެކަމަކު މީގެ ކުރިން ފަސް ފަހަރު މި ދެ ޓީމު ބައްދަލުކޮށްފައިވާއިރު، ތިން މެޗުން ސްވިޑެން ވަނީ މޮޅުވެފައެވެ. އަނެއް ދެ މެޗު ނިމުނީ އެއްވަރުވެގެންނެވެ. އެގޮތުން އެންމެ ފަހުން 2018 ވަނަ އަހަރުގެ އޮކްޓޯބަރު މަހު ކުޅުނު މެޗުވެސް ނިމުނީ 1-1 ގެ ނަތީޖާއަކުން އެއްވަރުވެގެންނެވެ.

ޔޫރޯގައި ސްވިޑެން އާއި ސްލޮވާކިއާ ބައްދަލުކުރާއިރު، ކުޅުނު ފުރަތަމަ މެޗުން ސްލޮވާކިއާ ވަނީ ޕޮލެންޑް އަތުން 2-1 ގެ ނަތީޖާއަކުން މޮޅުވެފައެވެ. އަދި ސްވިޑެން އާއި ސްޕެއިން ބައްދަލުކުރި މެޗު ނިމުނީ ދެ ޓީމުން ކުރެ ޓީމަށް ލަނޑެއް ނުޖެހިއެވެ.

މި މެޗާ ކުރިމަތިލާއިރު ސްވިޑެންއަށް އޮތް އެންމެ ބޮޑު ހިތްހަމަޖެހުމަކީ ކޮވިޑް-19 އަށް ޕޮޒިޓިވްވެ ސްޕެއިނާ ދެކޮޅަށް ކުޅުނު މެޗުގައި ނުކުޅެވުނު ޑެޔާން ކުލުސެވްސްކީ އާއި މަޓިއަސް ސްވަންބާގް ކޮވިޑުން ރަނގަޅުވެ ޓީމާ ގުޅިފައިވުމެވެ.

ސްލޮވާކިއާ މެޗުގެ ކުރިން ސްވިޑެންގެ ކޯޗު ޔާނީ އެންޑަސަން ބުނީ ސްޕެއިން ކުޅުނު ފަދައިން ސްލޮވާކިއާއިން ކުރިއަށް ޖެހިގެން ކުޅޭނެ ކަމަށް ނުބެލެވޭ ކަމަށާއި، އެހެން ކަމުން މި މެޗުގައި ކުރިއަށް އަރައި ލަނޑުޖެހުމުގެ ފުރުސަތު ތަނަވަސްކުރަން ސްވިޑެންއަށް ފަސޭހަވާނެ ކަމަށެވެ. އަދި މި މެޗުގައި ބޮޑަށް ވިސްނާނީ މެޗުގެ ކޮންޓްރޯލް ނަގައި އަވަހަށް ލަނޑެއް ޖެހުމަށް ކަމަށާއި، އަދި މި މެޗުން މޮޅުވުން ނޫން ގޮތެއް ނެތް ކަމަށްވެސް ވަނީ ބުނެފައެވެ.

ސްލޮވާކިއާގެ ކޯޗު ސްޓެފަން ޓާކޮވިޗް ބުނީ ސްވިޑެންއަކީ މި މުބާރާތަށް އައު ޓީމެއް ނޫން ކަމަށެވެ. އަދި މި މެޗުގައި ސްލޮވާކިއާއިން ކުޅެން ޖެހޭނީ ވިސްނުންތެރިކަމާއެކުގައި ކަމަށާއި، އަދި ލިބޭ ފުރުސަތުތަކުގެ ބޭނުން ހިފަން ސްލޮވާކިއާއިން މަސައްކަތް ކުރަން ޖެހޭނެ ކަމަށްވެސް ވަނީ ބުނެފައެވެ. ޓާކޮވިޗް އިތުރަށް ބުނީ މި މެޗު ކާމިޔާބުކޮށް ދެވަނަ ބުރަށް ދިޔުން އެއީ ޓީމުގެ އަމާޒު ކަމަށާއި، އަދި އެކަން ކުރުމަށް ކުޅުންތެރިން ތައްޔާރަށް ތިބި ކަމަށެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން 17:00 ގައި މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ހެޑް އޮފް ސްޕޯޓްސް ހުސެއިން ފަރިޔާޒެވެ. ފަރިޔާޒާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް އީ ގެ އެނަލިސްޓް އިމާދު ލަތީފެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއްގެ ގޮތުން އެނަލިސްޓް ޓީމުގައި ހިމެނޭ މުޙައްމަދު ޝިޔާޒް (މޯހަން) ބައިވެރިވެވަޑައިގަންނަވާނެއެވެ.

ސްވިޑެން އާއި ސްލޮވާކިއާ ބައްދަލުކުރާ މެޗު ފަށާނީ ހުކުރު ދުވަހުގެ ހަވީރު ރާއްޖެ ގަޑިން 18:00 ގައެވެ.