އިސްރާއިލުން ރާއްޖެއަށް ސީދާ ދަތުރުތައް ފެށުމަށް ތައްޔާރު ވެއްޖެއެވެ.

އިސްރާއީލްގެ ޓްރެވެލް ކުންފުންޏެއް ކަމަށްވާ ކަމިނޯސްއާ ހަވާލާދީ އިސްރާއިލްގެ ނޫހެއްގައި ރިޕޯޓް ކޮށްފައިވާ ގޮތުން ސެޕްޓެމްބަރު މަހުގެ 6 ވަނަ ދުވަހުން ފެށިގެން ކޮންމެ ހޯމަ ދުވަހަކު އިސްރާއީލުން ރާއްޖެއަށް ސީދާ ދަތުރުތައް ކުރުމަށް މިހާރުވަނީ ތައްޔާރުވެފައެވެ. ކޮންމެ ހޯމަ ދުވަހަކު ފްލައިޓްގެ ސީދާ ދަތުރުތައް ކުރަން ނިންމާފައިވާއިރު، އޮކްޓޯބަރ މަހުގެ 4 ވަނަ ދުވަހާ ހަމަައަށް ޓިކެޓް ވިއްކަން ހަމަ ޖެހިފައިވަނީ 995 ޑޮލަރަށެވެ.

މީގެ ކުރިން އިސްރާއީލުން ރާއްޖެއަށް ދަތުރުކުރަނީ ދުބާއީގައި ޓްރާންސިޓް ކުރުމަށް ފަހުގައެެވެ. އެއަރ ސީޝެލްސްގެ ފްލައިޓްތަކާއެކު ފަށާ މިދަތުރުގައި އެނބުރި އިސްރާއީލަށް ދާއިރު ސީޝެލްސްގައި އެއް ގަޑިއިރު ޓްރާންސިޓް ކުރާނެ ކަމަށް ކުންފުންޏާ ހަވާލާދީ ރިޕޯޓްކޮށްފައިވެއެވެ.

މި ޓްރެވެލް ކުންފުނިންވަނީ ރާއްޖެއަށް ފަށާ މިދަތުރުގެ ޕެކޭޖް ތަކުގެ ތެރޭގައި، ފަސް ތަރީގެ ރިސޯޓު ތަކުގައި ހުރުމާއެކު ހުރި ޕެކޭޖްތައްވެސް ހިމެނެއެވެ.

އިސްރާއީލުން ރާއްޖެއަށް ސީދާ ކުރާ ދަތުރުގެ ދިގުމިނަކީ ގާތްގަނޑަކަށް 8ގަޑި އިރާ 30 މިނިޓެވެ.