ތުރުކީ ބަލިކޮށް ވޭލްސް ދެވަނަ ބުރާ ގާތަށް

ޔޫރޯ 2020 ގެ ގްރޫޕް އޭ ގައި ކުޅުނު ދެވަނަ މެޗުގައި ތުރުކީ ބަލިކޮށް ދެވަނަ ބުރާ ގާތަށް ވޭލްސް ޖެހިލައިފިއެވެ.

ބުދަ ދުވަހުގެރޭ ބަކޫ އޮލިމްޕިކް ސްޓޭޑިއަމުގައި ކުޅުނު މި މެޗު ވޭލްސް ކާމިޔާބުކުރީ 2-0 ގެ ނަތީޖާއަކުންނެވެ.

މެޗުގެ ފުރަތަމަ ހާފުގައި ވޭލްސްއިން މޮޅު އެޓޭކިން ގޭމެއް ކުޅުނުއިރު، މެޗުގެ ހަވަނަ މިނެޓުގައި ވޭލްސްގެ ފޯވާޑް އާރޮން ރާމްސޭއަށް ވަނީ ލަނޑު ޖަހަން ހުސް ފުރުސަތެއް ލިބި ބޭކާރުވެފައެވެ. އޭނާ ފޮނުވާލި ހަމަލާގެ ހުރަހަކަށްވީ ތުރުކީގެ ގޯލްކީޕަރު އޫރްޖަން ޗަކިރެވެ. އޭގެ ފަހުން މެޗުގެ 24 ވަނަ މިނެޓުގައިވެސް ރާމްސޭއަށް ވަނީ ލަނޑު ޖަހަން ހުސް ފުރުސަތެއް ލިބި ބޭކާރުވެފައެވެ.

އެކަމަކު މެޗުގެ 42 ވަނަ މިނެޓުގައި ވޭލްސްއިން ވަނީ ލަނޑު ޖަހައި ލީޑު ނަގައިފައެވެ. ބޭލްގެ އެހީތެރިކަމާއެކު މި ލަނޑު އެ ޓީމަށް ކާމިޔާބުކޮށްދިނީ މި ހާފުގައި މޮޅު ކުޅުމެއް ދެއްކި ރާމްސޭއެވެ.

މެޗުގެ ދެވަނަ ހާފުގައިވެސް ވޭލްސްއަށް ލަނޑު ޖަހަން ގިނަ ފުރުސަތުތަކެއް ލިބުނުއިރު، މެޗުގެ 61 ވަނަ މިނެޓުގައި ވޭލްސްގެ ކެޕްޓަން ބޭލް ފޮނުވާލި ޕެނަލްޓީއެއް ވަނީ ގޯލާ އަމާޒުނުވެ ބޭރަށް ގޮސްފައެވެ. އަދި އޭގެ ފަހުން މެޗުގެ 79 ވަނަ މިނެޓުގައިވެސް ބޭލަށް ވަނީ ލަނޑު ޖަހަން ހުސް ފުރުސަތެއްލިބި ބޭކާރުވެފައެވެ.

އެކަމަކު މެޗުގެ އިތުރު ވަގުތުގައި ވޭލްސްއިން ވަނީ ލަނޑު ޖަހައި ލީޑު ފުޅާކޮށްފައެވެ. ބޭލް ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ކޮނާ ރޮބާޓްސްއެވެ.

މި ނަތީޖާއާއެކު ކުޅުނު ދެ މެޗުން ވޭލްސްއަށް ހަތަރު ޕޮއިންޓް ލިބިފައިވާއިރު، ދެވަނައިގައި އިޓަލީ އޮތީ ކުޅުނު އެއް މެޗުން ލިބުނު ތިން ޕޮއިންޓާއެކުގައެވެ. ސްވިޓްޒަލެންޑް ބަލިކޮށް އިޓަލީއަށް ގްރޫޕުގެ އެއްވަނައަށް އެރުމުގެ ފުރުސަތު އޮތްއިރު، ވޭލްސް އަތުން ބަލިވި ތުރުކީ މިހާތަނަށް މެޗަކުން މޮޅުވެފައެއް ނުވެއެވެ.