ސްޓޭޑިއަމް ފުރެންދެން ހަންގޭރީގެ ސަރުކާރުން މީހުން ވެއްދީ ކީއްވެ؟

ޔޫރޯ ފުޓްބޯޅަ މުބާރާތުގެ ގްރޫޕް އެފްގައި އިއްޔެ ހަންގޭރީ އާއި ޕޯޗުގަލް ކުޅުނު މެޗު ބަލަން ހަންގޭރީގެ ވެރިރަށް ބުޑަޕެސްޓްގެ ޕުސްކާސް އެރީނާއަށް 61 ހާސް މީހުން ވަދެ ތިއްބެވެ. މިހާ ގިނަ އަދަދެއްގެ ބަޔަކު ކޮވިޑުގެ ނާމާން ވިލާގަޑުގެ ތެރޭގައި އެއްތާކަށް ޖަމާވެގެން ތިބި މަންޒަރު ފެނިފައި ދުނިޔޭގެ ވަރަށް ގިނަ ބަޔަކު ވަނީ ހައިރާންވެފައެވެ. ޕުސްކާސް އެރީނާގެ ފުލް ކެޕޭސިޓީގައި ސަޕޯޓަރުން ވެއްދުމަށް ހަންގޭރީގެ ސަރުކާރުން ނިންމީ ކީއްވެގެން ބާވައެވެ.

މިފަހަރުގެ ޔޫރޯގެ މެޗުތައް ޔޫރަޕުގެ ތަފާތު އެގާރަ ސްޓޭޑިއަމެއްގައި ކުޅެވޭއިރު ބުޑަޕެސްޓުގެ ޕުސްކާސް އެރީނާ ނޫން އެހެން ތަނަކަށް އަދި މިހާތަނަށް ސްޓޭޑިއަމް ފުރެންދެން މީހުން ވައްދާފައި ނުވެއެވެ. ގްރޫޕް ޑީގައި އިންގްލެންޑާއި ކްރޮއޭޝިޔާ ކުޅުނު މެޗު ބަލަން ލަންޑަނުގެ ވެމްބްލީ ސްޓޭޑިއަމަށް ވެއްދީވެސް ކެޕޭސިޓީގެ 25 އިންސައްތަ ސަޕޯޓަރުންނެވެ.

ހަންގޭރީގެ ފުޓްބޯޅަ އެސޯސިއޭޝަނާއި ހަންގޭރީގެ ސަރުކާރުން ޕުސްކާސް އެރީނާގެ ހުރިހާ ދޮރޯށިތަކެއް ސަޕޯޓަރުންނަށް ހުޅުވައިލުމަށް ނިންމީ އެގައުމުގެ ރައްޔިތުންގެ ތެރެއިން ވަރަށް މަތީ ޕަސެންޓޭޖެއްގެ ބަޔަކު ވެކްސިން ޕްރޮގްރާމް ފުރިހަމަކޮށްފައިވާތީ އާއި ކޮވިޑުގެ ހާލަތުވެސް ބޮޑުތަނުން ރަގަޅުވެފައިވާ ކަމަށް ތަފާސްހިސާބުތަކުން ފެންނާތީއެވެ.

ހަންގޭރީގެ މުޅި އާބާދީ ކަމަށްވާ 9.8 މިލިޔަން މީހުންގެ ތެރެއިން 5.3 މިލިޔަން މީހުން ވަނީ ވެކްސިން ޕްރޮގްރާމް ފުރިހަމަކޮށްފައެވެ. ހަންގޭރީގައި މައިގަޑުގޮތެއްގައި ޖަހާފައިވަނީ ރަޝިޔާގައި އުފައްދާ ސްޕަޓްނިކް ވެކްސިނާއި ޗައިނާގައި އުފައްދާ ސިނޯފާމް ވެކްސިނެވެ. ހަންގޭރީގެ ބޮޑުވަޒީރު ވިކްޓަރ އޮބާން ވިދާޅުވެފައިވަނީ ވެކްސިނަކީ ކޮވިޑުން ދިފާއުވުމުގެ ދަގަނޑު ދަހަނާ ކަމަށާއި ވެކްސިން ޖެހުމަށް ރައްޔިތުން އަވަސްވުމަށް އެދިވަޑައިގަންނަވާ ކަމުގައެވެ. ސަރުކާރުގެ މި އިލްތިމާސަށް ރައްޔިތުން ތަބާވެ ވެކްސިން ޕްރޮގްރާމް ފުރިހަމަ ކުރީމާ ޔޫރޯ ފުޓްބޯޅަ މުބާރާތް ފެށުނު އިރު ހަންގޭރީގެ ރައްޔިތުންނަށް ބޮޑެތި ލުއިތަކެއް ސަރުކާރުން ވަނީ ދީފައެވެ.

މިގޮތުން ހަންގޭރީގެ ރައްޔިތުންނަށް ދީފައިވާ ލުއިތަކުގެ ތެރޭގައި ހިމެނެނީ ވެކްސިނުގެ ދެ ޑޯޒް ފުރިހަމަކޮށްފައިވާކަން ސާބިތުކޮށްދެވޭ ކޮންމެ މީހަކަށް އެއްވުންތަކުގައި ބައިވެރިވުމުގެ ހުއްދަ ދިނުމާއި ރެސްޓޯރަންޓުތަކަށް ވަދެ ކައިބޮއި ހެދުމުގެ ހުއްދަ ދިނުމާއި ސިނަމާތަކާއި ތިއޭޓަރުތަކަށް ވަނުމުގެ ހުއްދަ ދިނުންފަދަ ކަންކަމެވެ. ހަންގޭރީގެ ރައްޔިތުންގެ ތެރެއިން ޔޫރޯގެ މެޗުތައް ބަލަން ޕުސްކާސް އެރީނާއަށް ވަންނަ ކޮންމެ މީހެއްގެ އަތުކުރީގައި ކޮވިޑް ފްރީކަން އަންގައިދޭ ބޭންޑެއް އެޅުން ލާޒިމެވެ. އެ ބޭންޑު ދޫކުރަނީ ސިއްހަތާއިބެހޭ އިދާރާއަކުންނެވެ. ގައުމުން ބޭރުގެ ސަޕޯޓަރުން މި ސްޓޭޑިއަމަށް ވައްދަނީ މެޗު ފެށުމުގެ 72 ގަޑިއިރު ކުރިން ހަދާފައިވާ ނެގެޓިވް ޕީސީއާރް ޓެސްޓަކާއެކުގައެވެ.

ނިމިގެންދިޔަ ސީޒަނުގައިވެސް ކޮވިޑާހެދި ބައެއް ގައުމުތަކުގައި މެޗު ކުޅެވެން ނެތިގެން ޔޫރަޕިއަން ޗެމްޕިއަންސް ލީގާއި ޔޫރޮޕާ ލީގުގެ ވަރަށް ގިނަ މެޗުތައްވެސް ހަމަ މި ސްޓޭޑިއަމުގައި މި އުސޫލުގެ ދަށުން ވަނީ ކުޅެފައެވެ. ހަންގޭރީގައި މިފެނުނު މަންޒަރަކީ ކޮވިޑާ ދެކޮޅަށް ކާމިޔާބު ލިބުނު މަންޒަރަކަށްވާތީ ހަންގޭރީއަށް ވެކްސިން ސަޕްލައި ކުރި ގައުމުތަކުން ވަނީ މިކަން ވަރަށް ބޮޑަށް ފާހަގަކޮށްފައެވެ. ޚާއްސަކޮށް ޗައިނާއިން މިކަން ނަގާފައިވަނީ ޗައިނާގެ ވެކްސިނަށް ލިބުނު ވަރަށްވެސް ފުރިހަމަ ބޮޑު ކާމިޔާބީއެއްގެ ގޮތުގައެވެ.