ޔޫރޯ 2020 ގެ ގްރޫޕް އޭ ގައި ބުދަ ދުވަހުގެރޭ ދަންވަރު ބައްދަލުކުރާނީ އިޓަލީ އާއި ސްވިޓްޒަލެންޑެވެ. މުބާރާތުގެ ފެވަރިޓުންގެ ތެރޭގައި ހިމެނޭ އިޓަލީއަށް މި މެޗުން މޮޅުވެ ދެވަނަ ބުރުން ޖާގައެއް ހޯދުމުގެ ފުރުސަތު ބޮޑެވެ. އެއީ ގްރޫޕް ސްޓޭޖުގެ ފުރަތަމަ މެޗުގައި ފަސޭހަކަމާއެކު ތުރުކީ އަތުން 3-0 ގެ ނަތީޖާއަކުން މޮޅުވެފައިވާތީއެވެ. އެކަމަކު ސްވިޓްޒަލެންޑަށް މި މެޗުން މޮޅުވުން މަޖުބޫރުވާނެއެވެ. އެއީ ގްރޫޕް ސްޓޭޖު ފުރަތަމަ މެޗުން ވޭލްސްއާ 1-1 ގެ ނަތީޖާއަކުން އެ ޓީމު އެއްވަރުވެފައިވާތީއެވެ.

ސްވިޓްޒަލެންޑް މެޗުގެ ކުރިން އިޓަލީގެ ކޯޗު ރޮބާޓޯ މަންޗިނީ ބުނީ އޭނާގެ ޓީމާ މެދު އިތުބާރު އެބައޮތް ކަމަށާއި، މި މެޗަށް ނުކުންނައިރު ތުރުކީ މެޗުން މޮޅުވެފައި އޮތުން އެއީ ލިބޭ ބޮޑު ހިތްހަމަޖެހުމެއް ކަމަށެވެ. އެކަމަކު ސްވިޓްޒެލެންޑާ އަޅާބަލާއިރު އޭނާގެ ޓީމަށް އޮތް ޕްރެޝަރު ކުޑަ ނޫން ކަމަށާއި، މުބާރާތުގެ ފެވަރިޓުންގެ ގޮތުގައި އޮތުންވެސް އެއީ ބޮޑު ޕްރެޝަރެއް ކަމަށް ވަނީ ބުނެފައެވެ. އަދި މި މެޗުގައި ވީހާވެސް ކުރިން ލަނޑު ޖެހުން މުހިންމު ކަމަށާއި، އެ ނޫން ގޮތަކަށް އެޓޭކިން ގޭމެއް ކުޅެން އިޓަލީއަށް ފުރުސަތު ނުލިބޭނެ ކަމަށްވެސް މަންޗިނީ ވަނީ ބުނެފައެވެ.

މެޗުގެ ކުރިން ވާހަކަ ދައްކަމުން ސްވިޓްޒަލެންޑުގެ ކޯޗު ވްލެޑެމިއާ ޕެޓްކޮވިޗް ބުނީ މިއީ ތިން ޕޮއިންޓް ހޯދަން މަޖުބޫރު މެޗެއް ކަމަށެވެ. އަދި އަމިއްލަ ބާރާއެކު ދެވަނަ ބުރަށް ދަތުރުކުރަން ސްވިޓްޒަލެންޑުން ބޭނުންވާ ކަމަށްވެސް ވަނީ ބުނެފައެވެ. ޕެޓްކޮވިޗް އިތުރަށް ބުނީ އިޓަލީއަކީ ވަރުގަދަ ޓީމެއް ކަމަށާއި، އެހެންކަމުން މި މެޗުގައި ސްވިޓްޒަލެންޑަށް ލިބޭ ފުރުސަތުތަކުގެ ބޭނުން ހިފުން މުހިންމު ކަމަށެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ކުޅިވަރު ނޫސްވެރިޔާ އިސްމާޢީލް ޝާހެވެ. ޝާހާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް އޭ ގެ އެނަލިސްޓް އިސްމާޢީލް ޒަރިޔަންދެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއްގެ ގޮތުން އަޙްމަދު މުޖުތަބާ (ފެސްކޯ) ބައިވެރިވެވަޑައިގަންނަވާނެއެވެ.

އިޓަލީ އާއި ސްވިޓްޒަލެންޑް ބައްދަލުކުރާ މެޗު ފަށާނީ ބުދަ ދުވަހުގެރޭގެ ދަންވަރު ރާއްޖެ ގަޑިން ދަންވަރު 00:00 ގައެވެ.