މާލެސިޓީގައި އިއުލާންކޮށްފައިވާ ކާފިއުގެ ވަގުތު ކުޑަކޮށް މިސްކިތްތައް ހުޅުވާލައި އެކަނި ކަސްރަތަށް ނުކުމެވޭ ގޮތަށް ލުއިތައް ދީފިއެވެ.
އަންގާރަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި, ހެލްތް އިމަޖެންސީ އޮޕަރޭޝަން ސެންޓަރު (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީގު ވިދާޅުވީ މާލެސިޓީގައި އިއުލާންކޮށްފައިވާ ކާފިއުގެ ވަގުތަކީ ހަވީރު 4:00ން ޖެހިގެން އަންނަ ދުވަހުގެ ހެނދުނު 8:00ށް ކަމަށެވެ. ނަމަވެސް ބުދަ ދުވަހުން ފެށިގެން ހަވީރު 4:00ން ފަތިހު 4:00ށް ކުރުކޮށްފައިވާ ކަމަށެވެ. އޭގެ އިތުރުން ފަތިހު 4:00ން ހެނދުނު 8:00 އާ ދެމެދު ޕާމިޓާ ނުލާ އެކަނި ކަސްރަތު ކުރުމަށް ބޭރަށް ނުކުމެވޭނެ ކަމަށް ޑރ.ނަޒްލާ ވިދާޅުވި އެވެ.
ޑރ. ނަޒްލާ ވިދާޅުވީ ހެނދުނު 8:00ން ފެށިގެން ހަވީރު 4:00ށް ޒަރޫރީ ބެނުންތަކަށް ބޭރުގައި އުޅެވޭނީ މިހާރު ވެސް އަމަލުކުރަމުންދާ ގޮތަށް ޕާމިޓާއެކު ކަމަށެވެ. އެގޮތުން ކެފޭ/ރެސްޓައުރެންޓްތަކުންނާއި ފިހަރާތަކުން ވެސް އަމަލުކުރަން ޖެހޭނީ މިހާރު އަމަލުކުރަމުންދާ އުސޫލަށް ކަމަށް ޑރ.ނަޒްލާ ވިދާޅުވިއެވެ. އަދި ވިދާޅުވީ އިކޮނޮމިކް މިނިސްޓްރީން އާއްމުކޮށްފައިވާ އުސޫލާ އެއްގޮތަށް ޑެލިވަރީގެ ޚިދުމަތް ދެވޭނެ ކަމަށެވެ.
މާލެ ސިޓީގެ ހުރިހާ މިސްކިތްތަކެއް ހުޅުވާލާފައިވާކަން ފާހަގަކުރައްވައި ޑރ.ނަޒްލާ ވިދާޅުވީ މިސްކިތްތަކުގައި ޖަމާއަތް ނުހެދުނު ނަމަވެސް, އެކަނި މިސްކިތްތަކުގައި ނަމާދު ކުރެވޭނެ ކަމަށެވެ.
މީގެ އިތުރުން ޑރ.ނަޒްލާ ވިދާޅުވީ ސެލޫން/ބޯކޮށާ ތަންތަނަށް ވަރަށް އަވަހަށް ގައިޑްލައިންއެއް އާއްމުކުރާނެ ކަމަށާއި، ވަރަށް އަވަހަށް ލުއި ދޭނެ ކަމަށެވެ. އެގޮތުން އެފަދަ ތަންތަން ހުޅުވުމަށް ހުއްދަ ދޭނީ, އެތަންތަނުން ޚިދުމަތް ދޭނެ ޕްލޭން ހުށަހަޅައި, ޚާއްސަ ގައިޑްލައިނެއްގެ ދަށުން އެޕޮއިންޓްމަންޓު އުސޫލުން ކަމަށް ޑރ. ނަޒްލާ ވިދާޅުވި އެވެ. އަދި ވިދާޅުވީ ޕްލޭން ހުށަހެޅުމުން އެޗްއީއޯސީ/އެޗްޕީއޭގެ ފަރާތުން އެތަނަކަށް ގޮސް އިންސްޕެކްޓް ކުރާނެ ކަމަށެވެ.
ކޮންސްޓްރަކްޝަން މަސައްކަތަކަށް އަލިއަޅުވާލައި ޑރ. ނަޒްލާ ވިދާޅުވީ ގައިޑްލައިންއާ އެއްގޮތަށް އެމަސައްކަތްތައް ކުރެވޭނެ ކަމަށެވެ. އެގޮތުން ކޮންސްޓްރަކްޝަންގެ މަސައްކަތް ކުރުމަށް ހުއްދަ ދޫކުރަމުންދާނީ މާލެ ސިޓީ ކައުންސިލުން ކަމަށެވެ. އަދި ވިދާޅުވީ މިމަސައްކަތުގައި އުޅޭ މީހުންނަކީ އައިސޮލޭޝަން ނުވަތަ ކަރަންޓީންގައި ތިބެންޖެހޭ ބައެއް ނޫންކަން ވަޒީފާ ދޭ ފަރާތުން ކަށަވަރު ކުރަން ޖެހޭ ކަމަށާއި، މަސައްކަތް ކުރާ ސައިޓް ނޫން އެހެން ތަންތަނަށް ދިއުން މަނާ ވާނެ ކަމަށެވެ.
ޑރ.ނަޒްލާ ވިދާޅުވީ ފިޔަވަޅުތަކަށް ލުއިތައް ދެމުންދަނީ ކޭސްތަކަށް ބެލުމަށްފަހު ކަމަށެވެ. އަދި މިފަހަރުގެ ހާލަތުން ކޮވިޑް ކޭސްތަކުގެ ހަގީގީ މަންޒަރު އަދި ސާފުވެފައި ނުވާ ކަމަށް ޑރ.ނަޒްލާ ވިދާޅުވިއެވެ.
އެގޮތުން ރާއްޖޭގެ އެތެރޭގެ ދަތުރުފަތުރުތަކަށް ކުރިއަށް އޮތް ދެހަފްތާއަށް ލުއި ދެވެން ނެތް ކަމަށާއި، ދެކުނު އޭޝިޔާގެ ގައުމުތަކުން ރާއްޖެއަށް ދަތުރުކުރާ ފަރާތްތަކަށް ކޮންމެވެސް ރެސްޓްރިކްޝަންތަކެއް އެބަހުރި ކަމަށެވެ. ނަމަވެސް މާލޭގެ ހާލަތު އޮތް ގޮތުން ކުރިއަށް އޮތް ދެހަފްތާއަށް ލުއި ދެވެން ނެތް ކަމަށް ޑރ.ނަޒްލާ ވިދާޅުވިއެވެ.
