ހައުސިންގ ޔުނިޓްތަކުގެ މަސައްކަތް ނިމި، ކުރިއަށް އޮތް ދެ އަހަރުގެ ތެރޭގައި މީހުންނަށް ވަދެވޭވަރު ވާނެ ކަމަށް ހައުސިންގ މިނިސްޓަރ ވިދާޅުވެއްޖެއެވެ.
މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވީ، ސަރުކާރުގެ ބޯހިޔާވިކަމުގެ ސިޔާސަތަށް ގެނައި ބަދަލާއެކު އަލަށް އިމާރާތްކުރާ ހައުސިންގ ޔުނިޓްތަކުގެ މަސައްކަތް ނިންމުމަށް އަމާޒުކޮށްފައިވާ މުއްދަތުގައި ނިމޭނެ ކަމަށް އުންމީދު ކުރައްވާ ކަމަށެވެ. އެގޮތުން 9 ޓަވަރުގެ ތެރެއިން ފުރަތަމަ ޓަވަރުގެ 20 އިންސައްތަ މި އަހަރުގެ ނިޔަލަށް ނިމި، ދެން ހުރި ޓަވަރުގެ މަސައްކަތް ފެށިގެންދާނެ ކަމަށާއި، 2 އަހަރުގެ ތެރޭގައި މީހުންނަށް އެތަނުގައި ދިރިއުޅެން ފެށޭނެ ކަމަށެވެ.
ފޯމް ހުށަހެޅުމަށް ވަރަށް އަވަހަށް ހުޅުވާލާނެ ކަމަށާއި، ފޯމް ހުށަހެޅުން ލަސްކުރީ، ހައުސިން ޔުނިޓްތަކުގެ ބިންގާ އެޅެންދެން ކަމަށް މިނިސްޓަރ ވިދާޅުވިއެވެ. މަޝްރޫއު ފެށުމަށް ލަސްކަމެއް އައީ، އަސްލު ބިންގާ އަޅަން ބޭނުން ވުމުން ކަމަށްވެސް އެމަނިކުފާނު ވިދާޅުވިއެވެ.
އަސްލު ބިންގަލެއް ނޫން ގޮތަކަށް އަޅަން ބޭނުން ނުވާތީ މަޑު ޖެހިފައި އޮތީ. 9 ޓަވަރުގެތެރެއިން ފުރަތަމަ ޓަވަރުގެ އަސްލު ފައުންޑޭޝަން މަސައްކަތުގެ، މިއަދު އޮއްސާލާނީ ކޮންކްރީޓް. މަސައްކަތް މިއަދުން ފެށިގެން ކުރިއަށްދާނެ.މުޙައްމަދު އަސްލަމް، މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ
މިނިސްޓަރ ވިދާޅުވީ މި މަޝްރޫއު ކުރިއަށްގެންދަނީ، ސައްތައިންސައްތަ ދިވެހި ކުންފުންޏަކުން ކަމަށާއި، މިއީ ސަރުކާރުން ލޯން އުސޫލެއްގެ ދަށުން ކުރިއަށްގެންދާ މަޝްރޫއެއް ކަމަށެވެ.
ސަރުކާރުން ގެރެންޓީއެއްގެ ގޮތުގައި ދިނީ، ކައުންސިލް ހައުސިން އަދި މެދު ފަންތީގެ ހައުސިން މީހުން ގަންނާނެ ކަމުގެ ޔަގީންކަން ކަމަށާއި، އެ ޔަގީންގަމާއެކު މަޝްރޫއުގެ ކޮންޓްރެކްޓަރ އެޕޯލޯއިން މަސައްކަތް ކުރިއަށް ގެންދާނެ ކަމަުގެ ޔަގީންކަން އެބައޮތް ކަަމަށް ވިދާޅުވިއެވެ.
ކައުންސިލް ހައުސިން އަކީ ކުރިން ރާއްޖޭގައި ޕްރެކްޓިސް ކޮށްފައި އޮތް ކަމެއް ކަމަށާއި، އެހެން ކަމުން ބޯހިޔާވަހިކަމުގެ ސިޔާސަތަށް ސަރުކާރުން ގެނައި ބަދަލާއެކު ގިނަ ބަޔަކަށް ބޯހިޔާވަހިކަމަށް ފުރުސަތު ހުޅުވިގެންދާނެކަން މިނިސްޓަރ ފާހަގަ ކުރެއްވިއެވެ.
ސަރުކާރުގެ ބޯހިޔާވަހިކަމުގެ ސިޔާސަތު މިހާރު އެކުލަވާލާފައިވަނީ، މުޖުތަމައުގެ މީހުންގެ ތަނަވަސްކަން ބެހިފައިވާ މިންވަރަށް ބަލައިގެންނެވެ. އެއް ތައްގަނޑަކަށް އޮންނަ ހައުސިންގ މަޝްރޫއުގެ ބަދަލުގައި، އެކި ފަންތީގެ އާމްދަނީ ލިބޭ ފަރާތްތަކަށް ޚާއްސަކޮށްގެން ހައުސިން ކެޓެގަރީތައްވަނީ ބަހާލެވިފައެވެ. މި ސިޔާސަތުގެ ދަށުން ފަށާ ފުރަތަމަ މިކްސްޑް ހައުސިން މަޝްރޫއުގެ ދަށުން 5000 ހައުސިންގ ޔުނިޓްގެ މަސައްކަތް ކުރިއަށް ގެންދިޔުމަށް ނިންމާފައިވާއިރު، މިއީ އޭގެ ތެރޭގައި ހިމެނޭ 1000 ޔުނިޓެވެ.
މިނިސްޓަރ ވިދާޅުވީ، ބާކީ ހުރި 4000 ޔުނިޓްގެ މަސައްކަތުގެ ކޮންޓްރެކްޓްގައި މިހާރު ސޮއި ކުރެވިފައިވާއިރު، ލޯން އެގްރީމެންޓްގެ މަސައްކަތް ނިމުމާއެކު އަމަލީ މަސައްކަތް ފަށާނެ ކަމަށެވެ.
މަޝްރޫއުގެ މަސައްކަތް ކުރިއަށްދާއިރު، ދިމާވާ ކަންކަމުގައި ހައްލު ހޯދައި ދިނުމަށް ސަރުކާރު އޮންނާނީ ތައްޔާރަށް ކަމަށް އެމަނިކުފާނު ވިދާޅުވިއެވެ.
މީގެ އިތުރުން މިނިސްޓަރ ވިދާޅުވީ، ކޮވިޑްގެ ބަލިމަޑު ކަމުގެ ސަބަބުން، ސަރުކާރުން ހުޅުމާލޭގައި ދޫކޮށްފައި ހުރި 704 ހައުސިންގ ޔުނިޓާއި، އަތޮޅުތެރޭގައި ހުރި ހައުސިންގ ޔުނިޓް ތަކުގެ ކުރިއަށް އޮތް 3 މަހުގެ ފީ ދެއްކުން ލަސްކޮށް ދިނުމަށް އެޗްޑީސީއާއެކު މަޝްވަރާ ކުރަމުން އަންނަ ކަމަށެވެ. އެކަން ވަރަށް އަވަހަށް ހަމަޖެހޭނެ ކަމަށް އުންމީދު ކުރައްވާ ކަމަށް ވިދާޅުވިއެވެ.
