އެމެރިކާގެ ސްޓޭޓެއް ކަމަށްވާ ކަނެކްޓިކަޓްގައި ނުރައްކާތެރި ސުއިއްޕެއް ކަމަށްވާ 'ޓިކް'ގެ އާބާދީ އިތުރުވެ އޭގެ ސަބަބުން ޖެހޭ ބަލިތައް އިތުރުވަމުން އަންނާތީ އެކަމުން އަރައިގަތުމަށް ސެނެޓުގައި ހިމެނިވަޑައިގަންނަވާ ބޭފުޅުން 50 މިލިއަން ޑޮލަރުގެ އެހީއަކަށް ސެނެޓުގައި އެދެފިއެވެ.
އިންސާނުންގެ ލޭބޯ އަދި ނުރައްކާތެރި އެތައް ބައްޔެއް ޖައްސާ 'ޓިކް' ގެ މުޅިން އައު ތިން ވައްތަރެއް ސައިންސްވެރިން މިހާރު ވަނީ ހޯދާފައެވެ. ކަނެކްޓިކަޓްގައި މި ސޫފި އިންތިހާއަށް އިތުރުވަމުން އަންނައިރު މި ސޫފީގެ ބައެއް ވައްތަރުތަކަކީ އިންސާނާއަށް ގިނަވެގެން ތިން ބަލި ޖައްސާ ސޫފިތަކެކެވެ. އެގޮތުން މި ސޫފިން ޖައްސާ ނުރައްކާތެރި އެއް ބައްޔަކީ 'ލައިމް' އެވެ.
'ޓިކް'ގެ އާއިލާއަށް ނިސްބަތްވާ 'ޑިއަރ ޓިކް'ގެ 46 އިންސައްތަ ސޫފިން ލައިމް ޖެހޭއިރު ލައިމް ބައްޔަކީ އާންމުކޮށް ހަމަށް ޖެހޭ ބައްޔަކަށް ވާއިރު ބައެއް ހާލަތުގައި މި ބަލިން ރަނގަޅުވުމަށް 6 މަސް ދުވަސް ނަގާކަމަށް ދިރާސާތަކުން ވަނީ ދައްކާފައެވެ. އެންމެ ފަހުން ކަނެކްޓިކަޓް އެގްރިކަލްޗަރަލް އެކްސްޕެރިމަންޓް ސެންޓަރު (ސީއޭއީއެސް)ގައި މަސައްކަތްކުރާ ސައިންވެރިއެއް ކަމަށްވާ ކިރްބީ ސްޓެފޯޑް ހަދާފައިވާ ދިރާސާއެއްގެ ތަފާސްހިސާބުތައް ދައްކާގޮތުން އަހަރެއްގެ މައްޗަށް އެމެރިކާއިން 475,000 މީހުންނަށް މި ބަލި ޖެހެއެވެ.
ހަމުގެ އިތުރުން 'ލައިމް' ބަލީގެ ސަބަބުން ދިގު މުއްދަތަކަށް ނާރުތަކަށް ވެސް އޭގެ އަސަރު ކުރެއެވެ. ސީއޭއީއެސް ގެ ޑިރެކްޓަރ ޖޭސަން ވައިޓް ވިދާޅުވީ މި ސޫފީގެ އާއިލާއަށް ނިސްބައްވާ އިތުރު ސޫފިތަކެއް ފެންނަމުންދާ ކަމަށާއި، މިއީ މީގެ ކުރިން އެ ސްޓޭޓުން ފެނިފައި ނުވާ ސުއިއްޕަކަށް ވުމާއެކު އޭގެން މީހުންނަށް ކުރާނީ ކޮންކަހަލަ އަސަރުތައް ދެނެގަތުމަށް ރިސަރޗްތަކެއް ހަދަން ޖެހިފައިވާ ކަމަށެވެ.
މިކަމާ ގުޅިގެން ސެނެޓުގައި ތިއްބަވާ ބައެއް ބޭފުޅުން މި ސޫފިން ޖެހޭ ބަލިތައް ދިރާސާ ކުރުމާއެކު ބަލިތައް ކޮންޓްރޯލު ކުރުމަށް އެހީގެ ގޮތުގައި ސެނެޓުން 50 މިލިއަން ޑޮލަރުގެ އެހީއެއް ދިނުމަށް މި ޖޫން މަހުގެ 11 ވަނަ ދުވަހު ވަނީ އެދިފައެވެ.
