''އެކުވެރިޔާ ވަކިވެ ދިޔައީ އަގުހުރި ހަދިޔާއެއް ދީފައި''

ޒުވާން ކުދިންކޮޅެކެވެ. ހަފްތާ ބަންދު ދުވަހަކަށް ވުމާއެކު ދަތުރު ދިޔައީ ދުވަހަކު ވެސް ހިތުން ނުފިލާވަރުގެ ހިތްދަތިކަމެއް ލިބޭނެ ކަމުގެ އުންމީދަކު ނޫނެއެވެ. އެފަދަ ހިތާމަވެރި ހާދިސާއެއް ހިނގާނެކަމުގެ ކުޑަ ވެސް އިހުސާސެއް ކުރެވޭނަމަ ޔަގީނުން ވެސް އެދުވަހަކު ދަތުރެއް ނުދާނެއެވެ. ނަމަވެސް ކަންތައް ދިމާކުރީ އުންމީދު ކުރި ގޮތާ ހިލާފަށެވެ. ކުޑަ ވަގުތު ކޮޅެއްގެ ތެރޭގައި ދިމާވި އެކްސިޑެންޓަކުން ޒުވާން އެކުވެރިޔާ ވިއްސައިގެން ގޮސް މޫދުގައި ޖަހާފައި ހުރި މުޑިއެއްގައި ޖެހި އުމުރަށް ވަކިވެގެންދިޔައީއެވެ. މިއެކްސިޑެންޓްގައި ނިޔާވެގެންދިޔައީ ހުނަރުން ފުރިފައިވާ ޒުވާނެކެވެ.

އެއީ ށ. ފުނަދޫ އަށް އުފަން 22 އަހަރުގެ ޝުނާން ޝަރީފެވެ. ޝުނާންގެ ކުއްލި ވަކިވުމާއެކު, ބަންގީގެ ރިވެތި ރާގާއި އެކުވެފައިވާ އެހިތްގައިމު އަޑު މީސް މީޑިއާގައި މިހާރު ވަނީ އާންމުވެފައެވެ. ގިނަބައެއްގެ ސަމާލުކަން އެއަޑާއި ހުނަރަށް ލިބިގެން ގޮސްފައިވާއިރު، އޭނާގެ އަޑުގެ ފުރިހަމަކަމާއި ލޯބިކަން ގިނަ ބަޔަކު ފާހަގަކޮށްފައިވެއެވެ.

މީގެ އިތުރުން ޝުނާނަކީ ކީރިތި ޤުރުއާނަށް ވެސް ފަރިތަ މޮޅު ޒުވާނެކެވެ. އެކިއެކި މުބާރާތްތަކުގައި ބައިވެރިވެފާއިވާއިރު، ބައެއް ހަފްލާތަކުގައި ޝުނާން ޤުރުއާން ކިޔަވައިފައިވެއެވެ. އަދި ޝުނާނަކީ ސްކޫލު ނިންމުމަށްފަހު ފުނަދޫގެ މިސްކިތްތަކުގައި ވެސް ބަންގި ގޮވާފައިވާ ޒުވާނެކެވެ. ޝުނާނަކީ އާއިލާއެއްގެ އެންމެ ދޮށީ ފިރިހެން ކުއްޖާއެވެ. އާއިލާގައި 5 ކުދިން ތިބެއެވެ. އެއީ ޝުނާނާއެކު ތިން ފިރިހެން ކުދިންނާއި، ދެ އަންހެން ކުދިންނެވެ. ޝުނާންގެ ބައްޕައަކީ ދިވެހި ޓީޗަރަކަށްވާއިރު، އެއީ ގަދަރުވެރި، ރަށުގެ އާއްމު ރައްޔިތުންގެ ލޯބި ލިބިފައިވާ އާއިލާއެކެވެ.

ޝުނާންގެ މިޒާޖާ ގުޅޭ ގޮތުން ފުނަދޫ ސްކޫލްގެ ޑެޕިއުޓީ ޕްރިންސިޕަލް އިބްރާހިމް ޝަރީފް ރާއްޖެއެމްވީއަށް ވިދާޅުވެފައިވަނީ ޝުނާނަކީ އަހުލާގު ރަނގަޅު، ދުރު މުސްތަގުބަލަކަށް ވިސްނަމުން އައި ޒުވާނެއް ކަމަށާއި، އެންމެނާއި ވެސް ގުޅޭ ހިތްހޮޔޮ މިޒާޖެއްގެ ވެރިއެއް ކަމަށެވެ. އަބަދުވެސް މީހުންނަށް އެހީތެރިވެދީ، ރަށުގައި ޒުވާނުން ކުރިއަށް ގެންދާ އެކި ހަރަކާތްތަކުގައި އިސްރޯލެއް އަދާކުރާ ލީޑަރެކެވެ.

ސްކޫލު ދައުރުގައި ވެސް އެންމެ މޮޅެތި ދަރިވަރުންގެ ތެރޭގައި ގުނާލެވޭއިރު، އިތުރު ހަރަކާތްތަކުގައި ބައިވެރިވެ ރަން ވަނަތައް ހާސިލް ކޮށްފައިވާ ޒުވާނެކެވެ. އެގޮތުން ގައުމީ ވާހަކަ ލިޔުމުގެ މުބާރާތުގައި ބައިވެރިވެފައިވެއެވެ.

ޝުނާން ފުނަދޫ ސްކޫލުން އޭލެވެލް ނިންމުމަށްފަހު ފުރަތަމަ މަސައްކަތް ކުރީ ރިސޯޓެއްގައެވެ. ނަމަވެސް ފަހުން ރަށަށް ބަދަލުވެ ރަށުގެ ޕޮލިސް ސްޓޭޝަން ކޭޓްރިންގެ ޚިދުމަތް ދިނުމުގެ މަސައްކަތުގައި ޝުނާން ހަރަކާތްތެރިވިއެވެ.

ޝުނާންގެ ގާތް އެކުވެރިއެއް ރާއްޖެއެމްވީއަށް ބުނީ އަދިވެސް ޝުނާން ވަކިވެދިއުން ގަބޫލުނުކުރެވޭ ކަމަށެވެ. އެކުރިވެރިޔާގެ އަޑު ޤުރުއާން ކިޔަވާފައިވާ އޯޑިއޯތަކާއި ބަންގީގެ އަޑު އިވުމުން މުޅި ގައިން ހީބިހި ނަގައިގެންދާއިރު، އަދިވެސް ދުނިޔޭގައި ހުރިކަމުގެ އިހުސާން ކުރެވޭ ކަމަށެވެ.

ޝުނާންގެ ކުއްލި މަރާއެކު އާއިލާއާއި އެކުވެރިންނަށް ވަނީ ފުން ހިތާމައެއް ލިބިފައެވެ. އެކަން ގަބޫލުކުރަން ދަތިވެފައެވެ. މިހާދިސާއާ ގުޅިގެން މުޅި ފުނަދޫއަށް ވަނީ ހިމޭންކަން ވެރިވެފައެވެ. ކުއްލި ގޮތަކަށް ޝުނާން ދުނިޔެއާ ވަކިވެގެން ދިޔަ ނަމަވެސް، ޝުނާންގެ ހަދާންތައް ދުނިޔެއާ ވަކިވެގެން ނުދެއެވެ. އެތައް ބައެއްގެ ހިތުގައި ޝުނާން އަށް ޚާއްސަ މަގާމެއްވެއެވެ. ދުއާ އަކީ އާހިރަތުގެ ބާއްޖަވެރިކަން ޝުނާނަށް ލިބުމެވެ.