ނޫސްވެރިން ކަމުގައި ހެދިގެން ނަގުލީ ފާސް ބޭނުންކުރޭ: ފުލުހުން
12 ޖޫން 2021 | ހޮނިހިރު 07:59ނޫސްވެރިން ކަމަށް ބުނެ ދޮގު މައުލޫމާތު ދީފައިވޭ
ނޫސްވެރިންނަށް ދޫކޮށްފައިވާ ސްޕެޝަލް ފާސް،
ކޮވިޑް-19ގެ ކޮންޓްރޯލް ކުރުމަށް ހަރުކަށި ފިޔަވަޅުތަކެއް އަޅާފައިވާ މިދުވަސްވަރު ނޫސްވެރިންނަށް ދޫކޮށްފައިވާ ސްޕެޝަލް ފާހުގެ ''ފޭކު'' ފާސްތައް ބޭނުންކުރާ ކަމަށް ފުލުހުން ބުނެފިއެވެ.
ރާއްޖެއެމްވީއަށް ފުލުހުންގެ މީޑިއާ އޮފިސަރު ވިދާޅުވީ ކާފިއުގެ ވަގުތު ވެސް ނޫސްވެރިންނަށް ދޫކޮށްފައިވާ ފޭކް ފާސް އަޅައިގައިގެން އުޅޭ މައްސަލަ ފާހަގަކުރެވިފައިވާ ކަމަށެވެ. ކާފިއު ނޫން ވަގުތުގައި ވެސް ޚާއްސަ ހުއްދައެއްގެ ދަށުން ބޭރަށް ދެވޭއިރު މިފަދަ ހުއްދަ ނުނަގާ ފޭކް ފާސް ބޭނުން ކުރަމުންދާ ކަމަށެވެ.
ނޫސްވެރިން ކަމަށް ބުނެ ދޮގު މައުލޫމާތު ދިނުމާއި، ފޭކް ފާސް ބޭނުންކުރާ މައްސަލަ ސަމާލުކަމަށް އައުމާއެކު އިތުރަށް ބަލައި ކަށަވަރުކުރާނެ ކަމަށް އޮފިސަރު ވިދާޅުވިއެވެ. ނަމަވެސް މިހާތަނަށް ހުށަހެޅިގެން ދިޔައީ މިފަދަ ކިތައް މައްސަލަ ކަމެއް ފުލުހުން ހާމައެއް ނުކުރެއެވެ.
މީގެ އިތުރުން އޮފިސަރު ވިދާޅުވީ ހުޅުމާލޭގެ ގަރާޖެއްގައި ހުރި ޓެކްނީޝަނަކަށް ހަމަލާ ދިން މީހުން ނޫސްވެރިންގެ ފޭކް ފާސްތަކެއް އަޅައިގެން ތިބިކަން ފާހަގަކުރެވިފައި ނުވާ ކަމަށެވެ. އަދި ސީންއަށް އެޓެންޑްވި ފުލުހުންނަށް ވެސް އެކަން ފާހަގަކުރެވިފައި ނުވާ ކަމަށް އޮފިސަރު ވިދާޅުވިއެވެ.
ހުކުރު ދުވަހުގެ ހަވީރު 06:25 ގައި ގަރާޖެއްގައި ހަމީހުންގެ ގުރޫޕަކުން ވަނީ ހަމަނުޖެހުން ހިންގާފައެވެ. މިހަމަ ނުޖެހުމުގައި ބިދޭސީ ޓެކްނީޝަނަށް ދަގަނޑު ބުރިއަކުން ހަމަލާ ދީފައިވެއެވެ. ދެ ސައިކަލެއް ސާވިސް ކުރުމަށްފަހު ފައިސާ ދިނުމަށް ދެކޮޅު ހެދުމުން ހިނގި މިހަމަނުޖެހުމުގައި މިހާތަނަށް އެއްވެސް މީހަކު ހައްޔަރުކޮށްފައިނުވެއެވެ.
ކޮވިޑް-19އާ ގުޅިގެން މާލެ ސިޓީގައި އަޅާފައިވާ ފިޔަވަޅުތައް ތަންފީޒު ކުރުމަށް ފުލުހުންނާއި ސިފައިން ދަނީ ހަރަކާތްތެރިވަމުންނެވެ. ގަވާއިދާ ހިލާފަށް ބޭރަށް ނުކުމެ އުޅޭނަމަ ފިޔަވަޅު އަޅާނެއެވެ.
