ޔޫރަޕުގެ ގައުމުތަކުގެ މެދުގައި ބާއްވާ އެންމެ ޝަރަފުވެރި ފުޓްބޯޅަ މުބާރާތް ކަމަށްވާ ޔުއެފާ ޔޫރޯ 2020 ފަސް އަހަރަށްފަހު ހުކުރު ދުވަހުގެ ރޭ މިވަނީ އިޓަލީގެ ރޯމުގެ އޮލިމްޕިކް ސްޓޭޑިއަމުގައި ފެށިފައެވެ.

މި ސްޓޭޑިމްގައި މިޔުޒިކް ހަރަކާތްތަކާއެކު ޔޫރޯ ފެށިގެންދިޔައިރު އެންމެ ގިނަ ބަޔެއްގެ ސަމާލުކަން ހުއްޓިގެން ދިޔައީ އިޓަލީގެ މަޝްހޫރު ލަވަކިޔުންތެރިޔާ އެންޑްރިއާ ބޮޗާލީ ހުށަހަޅައިދިން ލަވައަށެވެ. ކުޅިވަރާއި ޕޮޕް ކަލްޗަރ ގައިވެސް ހިޓެއްގެ ގޮތުގައި ފާހަގަކުރެވިފައިވާ މިލަވައަކީ އިޓަލީގެ މަޝްހޫރު މިޔުޒިކް ކޮމްޕޯސަރ ޖަކަމޯ ޕުޗިނީގެ "ނެސުން ޑޯރުމާ"އެވެ.

ނެސުން ޑޯރުމާ މިލަވައަކީ 1990 ވަނަ އަހަރުގެ ވޯރލްޑް ކަޕްގައި ލޫޗިއާނޯ ޕަވަރޮތީ ހުށަހަޅައިދިން ފަހުން ގިނަ ބަޔެއްގެ މެދުގައި މަގްބޫލުކަން ލިބިގެންގޮސްފައިވާ ލަވައެކެވެ. މިފަހަރު މިލަވަ ހުށަހަޅައިމިދިނީ އެންޑްރިއާ ބޮޗާލީއެވެ. ޔޫރޯ ހުޅުވުމުގެ ރަސްމިއްޔާތުގައި ލަވައެއް ހުށަހަޅުމުގެ ފުރުސަތު ލިބިގެންދިޔުމާއެކު ބޮޗާލީ ބުނީ ރޯމްގެ އޮލިމްޕިކް ސްޓޭޑިއަމްގައި އޭނާގެ އަޑު އިއްވާލުމުގެ ފުރުސަތު ލިބިގެންދިޔުމަކީ އޭނާއަށް ލިބޭ ވަރަށް ބޮޑު ފަހުރަކާއި އުފަލެއްކަމަށެވެ.

އަދި މިއީ އުންމީދާއި ޕޮޒިޓިވްކަންތަކުގެ ވަރުގަދަ މެސެޖް ދުނިޔެއަށް ފޯރުކޮށްދިނުމަށް ލިބިގެންދިޔަ ރަނުގެ ފުރުސަތެއްކަމަށް އޭނާ ބުންޏެވެ.

ޔޫރޯ ހުޅުވުމަށް ބޭއްވިގެންދިޔަ ރަސްމިއްޔާތުގައި ބޮޗާލީގެ އަޑު މުޅި ދުނިޔެއަށް އިވިގެން ގޮސްފައިވާއިރު އެންމެ ފުރަތަމަ ބޮޗާލީގެ އަޑު ދުނިޔެއަށް އިވިގެންދިޔައީ 1995 ވަނަ އަހަރު ބޭއްވި ލަވަ މުބާރާތެއްގެ ތެރެއިންނެވެ. ޕަވަރޮތީ މަޝްހޫރުވެގެންދިޔައީ "ނެސުން ޑޯރުމާ" ލަވައިން ކަމަށްވާއިރު ބޮޗާލީ މަޝްހޫރުވެގެންދިޔަ ލަވައަކީ "ޓައިމްޓު ސޭ ގުޑްބައި" އެވެ.

ބޮޗާލީ ބުނީ އެންމެ ފުރަތަމަ އޭނާއަށް ޓައިމްޓު ސޭ ގުޑްބައި ކިޔުމުގެ ފުރުސަތު ލިބުނުއިރު އެލަވައަކީ އޭނާގެ ކެރިއަރ އިތުރު ހަރުފަތްތަކަށް ގެންގޮސްދޭނެ ލަވައަކާމެދު އޭނާއަށް ޝައްކުވި ކަމަކަށެވެ. އޭނާއަށް އެންމެ ފުރަތަމަ ލަވަ ލިބުނުއިރު އެލަވައަކީ ފެސްޓިވަލެއްގައި އެހެން މީހަކު ކިޔުމަށް ހަމަޖެހިފައިވާ ލަވައެކެވެ. އަދި އެފެސްޓިވަލްގައި ބައިވެރިވުމަށް ބޮޗާލީވެސް ދިޔައި ތައްޔާރުވަމުންނެވެ.

އަދި އެފެސްޓިވަލަކީ މުބާރާތަކަށްވާއިރު މިއީ އެފަދަ މުބާރާތެއްގައި ކިޔުމަށް އެންމެ ރަނގަޅު ލަވަ ނޫންކަމަށް ބުނި ކަމަށް ބޮޗާލީ ކިޔައިދިނެވެ. އެއަށްވުރެ އެއީ މާ މާނަފުން ލަވައެއް ކަމަށް ބޮޗާލީ ބުންޏެވެ. ކަންތައްވީވެސް އެހެންނެވެ. ބޮޗާލީއަށް އެމުބާރާތުން ލިބުނީ ހަތަރު ވަނައެވެ.

ނަމަވެސް އެލަވަ ވެގެންދިޔައީ ބޮޗާލީގެ މުޅި ކެރިއަރ ދިއްލާލަދިން ދަންމަރަށެވެ. ހަމައެހަރު ބޮޗާލީ އޭނާގެ އަމިއްލަ އަލްބަމެއް ރިކޯޑް ކުރިއިރު އެލަވަ އަލްބަމްގައި ހިމެނިއެވެ. ފްރާންސްގެ ޓޮޕް ޗާޓުތަކުން އެލަވަ ޖާގަ ހޯދިއިރު ބެލްޖިއަމްގައިވެސް ގިނަ ރިކޯޑްތަކެއް އެލަވަ ގާއިމުކުރިއެވެ.

1996 ވަނަ އަހަރު ފެށުނުއިރު އެލަވަ ވަނީ ގިނަ ބަޔަކާ ހިސާބަށް ފޯރާފައެވެ. އަދި އިނގިރޭސިވިލާތުގެ މަޝްހޫރު ސޮޕްރާނޯ ލަވަކިޔުންތެރިޔާ ސާރާ ބްރައިޓްމަން އަށް ލަވަ އަޑުއިވި އޭނާ އާއެކު އެލަވަ ކިޔުމަށް ހުށަހެޅިއެވެ. އެލަވައަށް އިނގިރޭސި ބައިތަކެއް ލުމަށްފަހު ދެމީހުން ހުށަހަޅާއިދިން ހުށަހެޅުމަކީ އިޓަލީ އާއި އިނގިރޭސި އެއްވެގެން އުފަންވި ނުހަނު ހިތްގައިމު ހުށަހެޅުމަކަށް ވެގެންދިޔައެވެ. އަދި ކްލާސިކް ޕޮޕް ހިޓަކަށް " ޓައިމްޓުސޭ ގުޑް ބައި" ވެގެންދިޔައެވެ.

މިލަވައާއެކު ބޮޗާލީގެ ލަވަކިޔުމަކަށް މަޑުޖެހުމެއްނެތެވެ. އުމުރުން އެންމެ ފަސް މަހުގައި ލޮލުގެ ބައްޔެއްކަމުގައިވާ ގްލޮކޯމާއަށް ފަރުވާ ހޯދާފައިވާއިރު އުމުރުން އެންމެ 12 އަހަރުގައި ފުޓްބޯޅަ ކުޅެނިކޮށް ހިނގި ހާދިސާއެއްގައި އޭނާގެ ލޮލުގެ ފެނުން ވަނީ އެއްކޮށް ގޮސްފައެވެ. ނަމަވެސް މިކުޅަ ދާނަ ލަވަކިޔުންތެރިޔާގެ އުމުރުން 62 އަހަރުވެފައިވާއިރު 15 ސޯލޯ އަލްބަމް އޭނާ ވަނީ މިހާތަނަށް އައިއިރު ރިކޯޑް ކޮށްފައެވެ. އޭނާ ރިކޯޑްކޮށްފައިވާ ލަވަތަކުގެ 75 މިލިއަނަށްވުރެ ގިނަ ކޮޕީ ވަނީ މުޅި ދުނިޔޭގައި ވިކިފައެވެ.