ޖީ7 ގެ ގައުމުތަކަށް އދ: އިތުރު ވެކްސިން ބޭނުން
12 ޖޫން 2021 | ހޮނިހިރު 04:17ވެކްސިން ބޭނުންވާ މިންވަރާއި ބޭނުންވާ ތަންތަން ބަލައި ވެކްސިން ފޯރުކޮށްދިނުމުގެ ކަންކަން ކުރިއަށް ގެންދިޔުމުގެ ޕްލޭނެއް ބޭނުންވޭ
ކޮވިޑް-19 ވެކްސިން
ޖީ7 ގައުމުތަކުން ފަގީރުގައުމުތަކަށް 1 ބިލިއަން ޑޯޒްދޭނެކަމަށް ހާމަކުރުމާއެކު އދ ން އެކަމަށް މަރުހަބާ ކިޔައިފިއެވެ.
އދ ގެ ޑިރެކްޓަރ ޖެނެރަލް އެންތޯނިއޯ ގުޓަރޭސް ވަނީ ޖީ7 ގައުމުތަކުގެ ނިންމުމަށް މަރުހަބާ ވިދާޅުވެ އަދިވެސް އިތުރަށް ވެކްސިން ބޭނުންވާކަމަށް ވިދާޅުވެފައެވެ. ގުޓަރޭސް ވިދާޅުވީ ތަރައްގީވަމުން އަންނަ ގައުމުތަކުގައި ވެކްސިން ދިނުމުގެ ކަންކަން ބާރު ސްޕީޑެއްގައި ކުރިޔަށްނުދާ ކަމަށެވެ. އެހެންކަމުން ވައިރަސް މިޔުޓޭޓްވުމުގެ ފުރުސަތު ބޮޑުކަމުގެ އިންޒާރުދެއްވިއެވެ. އަދި އެކަމުގެ ސަބަބުން ވެކްސިންގެ އަސަރު ވައިރަސްއަށް އެންމެ އެދެވޭ ގޮތުގައި ނުކޮށްފާނެ ކަމުގެ އިންޒާރު ދެއްވިއެވެ.
ގުޓަރޭސް ވިދާޅުވީ ދުނިޔޭގެ ފެންވަރުގައި އެކުލަވާލާފައިވާ ވެކްސިނޭޝަން ޕްލޭނެއް ބޭނުންވާކަމަށެވެ. ވެކްސިން ބޭނުންވާ މިންވަރާއި ބޭނުންވާ ތަންތަން ބަލައި ވެކްސިން ފޯރުކޮށްދިނުމުގެ ކަންކަން ކުރިޔަށް ގެންދިޔުމުގެ ޕްލޭނެއް ބޭނުންވާ ކަމަށާއި ނަމަވެސް އިގްތިސާދީގޮތުން ދިމާވެފައިވާ ގޮންޖެހުންތަކާއެކު އެކަން ކުރުމުގައި ލަސްތަކެއް ދިމާވަމުން އަންނަކަމަށެވެ.
އެމެރިކާގެ ރައީސް ޖޯ ބައިޑަން އާއި އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ވަނީ ޖީ7 ގައުމުތަކުގެ ސަމިޓްގައި ފަގީރު ގައުމުތަކަށް އެގައުމުތަކުން ފޯރުކޮށްދޭނެ ވެކްސިންގެ ޑޯޒްގެ އަދަދު ހާމަކުރައްވާފައެވެ. އެގޮތުން އެމެރިކާއިން 500 މިލިއަން ޑޯޒް އަދި އިނގިރޭސިވިލާތުން 100 މިލިއަން ޑޯޒް ފޯރުކޮށްދޭނެކަމަށް ވަނީ އިއުލާންކޮށްފައެވެ.
ކެނެޑާއިންވެސް 100 މިލިއަން ޑޯޒް ފޯރުކޮށްދޭނެކަމަށް ބެލެވެއެވެ. އެހެންނަމަވެސް ޖީ7 ގެ ގައުމުތަކުން ވެފައިވާ މިވައުދަކީ އަދި ދުނިޔެއަށް ކޮވިޑްގެ ޕެންޑަމިކުން އަރައިގަނެވޭނެ އަދަދެއް ނޫންކަމަށް ހިލޭ ސާބަހަށް މަސައްކަތްކުރާ ފަރާތްތަކުން އަންނަނީ ބުނަމުންނެވެ.
ދުނިޔެއަށް މިހާރުން މިހާރަށްވެސް ވެކްސިން ބޭނުންވާ ކަމަށާއި މިއަހަރު ފަހުކޮޅު ވެކްސިން ފޯރުކޮށްދެންދެން ބަލަން ތިބެވެން ނެތްކަމަށް އެފަރާތްތަކުން ބުނެއެވެ. އެއަށްވުރެ ކޮވިޑްގެ ހާލަތު އަންނަނީ ގޯސްވަމުން ކަމަށް އެފަރާތްތަކުން ދެކެއެވެ.
