ކޮވިޑް-19އާ ގުޅިގެން މެދުކެނޑުނު މިލަންދޫ މަގުތަކުގެ އަމަލީ މަސައްކަތް ފަށައިފި
15 އިންސައްތަ މަސައްކަތް ވަނީ ނިމިފައި
މިލަންދޫ މަގުތަކުގެ މަސައްކަތުގެ ތެރެއިން
ކޮވިޑް-19އާ ގުޅިގެން މެދުކެނޑުނު ށ. މިލަންދޫ މަގުތައް ޒަމާނީ ފެންވަރަށް ތަރައްގީކުރުމުގެ އަމަލީ މަސައްކަތް ފަށައިފިއެވެ.
ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ން ބުނީ މި މަޝްރޫއުގެ މަސައްކަތް މެދުކެނޑިގެން ދިޔައީ ކޮވިޑް-19އާ ގުޅިގެން މިލަންދޫ މޮނިޓަރިންގެ ހާލަތަށް ގެނައުމާ ގުޅިގެން ކަމަށެވެ. ނަމަވެސް އާއްމު ހާލަތަށް އައުމާއެކު އަމަލީ މަސައްކަތް ބުރާސްފަތި ދުވަހު ފަށާފައިވާ ކަމަށް އާރްޑީސީން ބުނެއެވެ.
މަސައްކަތް ބާރު ސްޕީޑްގައި ކުރިއަށްދާކަން ފާހަގަކޮށް އާރްޑީސީން ބުނީ މިހާރު ކުރިއަށްދަނީ ކޭބަލް ޖަންގްޝަން ވަޅުލުމުގެ މަސައްކަތް ކަމަށެވެ. މިހާރު ރޯޝަނީ މަގުގެ މަސައްކަތްތައް ކުރިއަށްދާއިރު، 15 އިންސައްތަ މަސައްކަތް ނިމިފައިވާ ކަމަށް އާރްޑީސީން ބުނެއެވެ.
މިނިސްޓްރީ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ރޯޑް ޑިވެލޮޕްމަންޓް ކޯޕަރޭޝަންއާ ހަވާލުކޮށްގެން ކުރިއަށް ގެންދާ މި މަޝްރޫއުގައި 8 މަގެއްގައި ތާރު އެޅުމަށް ވަނީ ނިންމާފައެވެ. މިލަންދޫގެ 6.15 ކިލޯ މީޓަރުގެ މަގު ހެދުމަށް ނިންމާފައިވާއިރު، މި މަޝްރޫއުއަށް ދައުލަތުގެ ބަޖެޓުން 156.4 މިލިއަން ރުފިޔާ ހަރަދުވާނެއެވެ.
520 ދުވަހުގެ ތެރޭގައި މަސައްކަތް ނިންމުމަށް ޝަރުތުކޮށް އާރްޑީސީއާ މި މަޝްރޫއު ހަވާލުކުރެވުނީ މާރޗް މަހުގެ 12 ވަނަ ދުވަހުއެވެ.
