730 ޓޫރިސްޓު ފެސިލިޓީއެއް ދަނީ އޮޕަރޭޓްކުރަމުން
މިހާރު އޮޕަރޭޓް ކުރަމުން ދަނީ 88 އިންސައްތަ އެނދު
އިންޓާރ ކޮންޓިނެންޓަލް މޯލްޑިވްސް މާމުނަގައު ރިސޯޓް
ފަތުރުވެރިންނަށް ޚިދުމަތްދޭ 730 ޓޫރިސްޓު ފެސިލިޓީ ރާއްޖޭގައި އޮޕަރޭޓްކުރަން ފަށައިފިއެވެ.
ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން ޖޫން 9 ވަނަ ދުވަހުގެ ނިޔަލަށް ރާއްޖޭގައި ފަތުރުވެރިންނަށް ޚިދުމަތްދޭ 730 ޓޫރިސްޓު ފެސިލިޓީގެ 47,474 އެނދު ވަނީ އޮޕަރޭޓްކުރަން ފަށާފައެވެ. މިއީ ރާއްޖޭގައި މިވަގުތު ހުރި 1،033 ޓޫރިސްޓް ފެސިލިޓީގެ ޖުމްލަ 53،818 އެނދުގެ 88 އިންސައްތައެވެ. ރާއްޖޭގައި 303 ޓޫރިސްޓް ފެސިލިޓީ އަދި އޮޕަރޭޓްކުރަން ނުފަށައެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ރާއްޖޭގައި ތަރައްގީކޮށްފައި ހުރި 162 ރިސޯޓްގެ ތެރެއިން އޮޕަރޭޓްކުރަމުން ދަނީ 154 ރިސޯޓެވެ. އެއީ 35،640 އެނދެވެ. ހޮޓާ އަދި ގެސްޓް ހައުސްތަކަށް ބަލާއިރު 711 ފެސިލިޓީގެ ތެރެއިން 437 ތަން ވަނީ އޮޕަރޭޓް ކުރަން ފަށާފައެވެ. އެއީ 9،108 އެނދެވެ. ގެސްޓް ހައުސްތައް އޮޕަރޭޓްކުރަމުން ދަނީ 18 އަތޮޅެއްގެ 58 ރަށުގައެވެ.
މީގެ އިތުރުން 160 ސަފާރީގެ ތެރެއިން 139 ސަފާރީއެއްގެ 2،726 އެނދު މިހާރު ވަނީ އޮޕަރޭޓްކުރަން ފަށާފައެވެ.
ފާއިތުވި އަހަރުގެ މާރޗް 27 ވަނަ ދުވަހު ރާއްޖޭގެ ބޯޑަރު ބަންދުކުރުމަށްފަހު ޖުލައި 15 ވަނަ ދުވަހު އަލުން ހުޅުވާލިއިރު ފަތުރުވެރިންނަށް ޚިދުމަތްދިނުމުގެ ހުއްދަ އެންމެ ފުރަތަމަ ލިބުނީ ހަމައެކަނި ރިސޯޓްތަކަށާއި ސަފާރީތަކަށެވެ. އަތޮޅުތެރޭގެ ރަށްރަށުގެ ގެސްޓް ހައުސްތައް އަލުން ހުޅުވުމުގެ ހުއްދަ 2020ގެ އޮކްޓޫބަރ 15 ވަނަ ދުވަހު ދީފައިވާއިރު މާލެ ސަރަހައްދުގެ ގެސްޓް ހައުސްތައް ހުޅުވާފައިވަނީ އެ އަހަރުގެ ޑިސެމްބަރ 14 ވަނަ ދުވަހުއެވެ.
