އިންތިގާލީ އިންސާފުގެ ދަށުން އޮމްބަޑްސްޕާރސަންގެ އޮފީހުން އަމިއްލައަށް އިސްނަގައިގެން މައްސަލަ ބަލާނެ އުސޫލު އެކުލަވާލައިފި
އިންތިގާލީ އިންސާފުގެ ގާނޫނުގެ ދަށުން މައްސަލަ ހުށަހެޅުމަށް މިހާރު ވަނީ ހުޅުވާލާފައި
އިންތިގާލީ އިންސާފުގެ އޮމްބަޑްސްޕާރސަންގެ އޮފީހުން ފަލަ ސުރުޚީ ޕްރޮގްރާމްގައި މަޢުލޫމާތުދެނީ
އިންތިގާލީ އިންސާފުގެ ދަށުން އޮމްބަޑްސްޕާރސަންގެ އޮފީހުން އަމިއްލައަށް އިސްނަގައިގެން މައްސަލަ ބަލާނެ އުސޫލު އެކުލަވާލާފައިވާ ކަމަށް އެ އޮފީހުން ހާމަކޮށްފިއެވެ.
އިންތިގާލީ އިންސާފުގެ ދަށުން އޮމްބަޑްސްޕާރސަންގެ އޮފީހުގެ މަސައްކަތްތަކުގެ މަޢުލޫމާތު ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ހިއްސާކުރައްވަމުން ޗީފް އޮމްބަޑްސްޕާރސަން އަބްދުލް ސަލާމް އާރިފް ވަނީ އިންތިގާލީ އިންސާފުގެ ދަށުން އޮމްބަޑްސްޕާރސަންގެ އޮފީހުން އަމިއްލައަށް އިސްނަގައިގެން މައްސަލަ ބަލާނެ އުސޫލު އެކުލަވާލައިފައިވާކަމަށް ވިދާޅުވެފައެވެ. މިގޮތައް އެ އޮފީހުން އަމިއްލައަށް އިސްނަގައިގެން ބަލާނީ މަތީ ދަރަޖައަކަށް އާންމު މަސްލަހަތު ހުރި މައްސަލަތަކާއި، މައްސަލައިގެ ވާހަކަ މުޖުތަމަޢުގައި ގިނައިން ދެކެވޭ މައްސަލަތަކާއި، މައްސަލައިގެ މަޢުލޫމާތު ސާފުވެ އިހުމާލުވުމާއި ދަޢުވާކުރެވޭނެ ވަރަށް ހެކިހުރި މައްސަލަތަކެވެ. މިއިން ކޮންމެ ހާލަތެއްގައި ވެސް މި ނިންމުން ނިންމާނީ އޮމްބަޑްސްޕާރސަންގެ އޮފީހުން މަޝްވަރާކުރުމަށް ފަހުގައި ކަމަށް އާރިފް ވިދާޅުވިއެވެ.
އިންތިގާލީ އިންސާފުގެ ގާނޫނުގެ ދަށުން މައްސަލަ ހުށަހެޅުމަށް މިހާރު ވަނީ ހުޅުވާލާފައެވެ. މިގާނޫނުގެ ދަށުން މައްސަލަ ހުށަހަޅަން ޖެހެނީ، އިންތިގާލީ އިންސާފުގެ އޮމްބަޑްސްޕާރސަންގެ އޮފީހަށެވެ. ޖޫން މަހުގެ 13 ވަނަ ދުވަހުން ފެށިގެން 2 މަސް ދުވަހުގެ މުއްދަތަށް މައްސަލަ ހުށަހެޅޭނެއެވެ.
އޮމްބަޑްސްޕާރސަންގެ އޮފީހަށް ހުށަހެޅޭނީ، ދައުލަތުގެ މުއައްސަސާއަކުން ނިޒާމީ ސިފައެއްގައި ރާވައި ހިންގި އަމަލެއްގެ ސަބަބުން ނުވަތަ އެފަދަ އަމަލެއްގެ ނަތީޖާއެއްގެ ސަބަބުން އިންސާނީ ހައްގެއް ނުވަތަ އަސާސީ ހައްގެއް ނިގުޅައިގެންފައިވާ މައްސަލަތަކެވެ. އެގޮތުން 1 ޖެނުއަރީ 1953ން ފެށިގެން 17 ނޮވެމްބަރ 2018 އާ ހަމައަށް ހިނގާފައިވާ މިފަދަ މައްސަލަތައް އެ އޮފީހުން ބަލާނެ ކަމަށް ޗީފް އޮމްބަޑްސްޕާރސަން ޢަބްދުއްސަލާމް ޢާރިފް ވިދާޅުވިއެވެ.
އެ އޮފީހުގެ މަސައްކަތްތައް ކުރިއަށްދާގޮތާ ބެހޭގޮތުން ނޫސްވެރިންނަށް މައުލޫމާތު ދެއްވަމުން ޢާރިފް ވިދާޅުވީ، ކުރިއަށް އޮތް ދެ އަހަރުގެ ތެރޭގައި މިފަދަ މައްސަލަތައް ބަލައި އިންސާފު ހޯދައިދިނުމަށް މަސައްކަތް ކުރައްވާނެ ކަމަށެވެ. އަދި ލިބިފައިވާ ގެއްލުމުގެ ބަދަލު ހޯދައިދީ، އެފަދަ އަމަލުތައް ހިނގަން މެދުވެރިވާ ސަބަބުތައް ދެނެގަންނަން މަސައްކަތް ކުރައްވައި، އެކަންކަން ތަކުރާރު ނުކުރުމަށް އެ މުއައްސަސާއަކަށް އެންގޭނެ ކަމަށެވެ. ހޭލުންތެރި ކުރުމުގެ ޕްރޮގްރާމްތައް ކުރިއަށް ރޭވިފައި އެބަހުރި ކަމަށާއި، އެއްމެ ބޮޑު އަމާޒަކީ ހައްގުތައް ކަށަވަރު ކޮށްދިނުން ކަމަށެވެ.
މައްސަލަ ބެލުމަށް ގަވައިދުތައް އެކުލަވާލެވިފައިވާ ކަމަށް އެ އޮފީހުން ބުނެއެވެ. މި ކަމުގައި ދައުލަތުގެ ހުރިހާ މުއައްސަސާއަކުން ވެސް އެއްބާރުލުން ލިބޭނެ ކަމުގެ ޔަގީންކަން ލިބިފައިވާ ކަމަށް އޭނާ ވިދާޅުވިއެވެ. އާއްމުން ހުށަހަޅާ މައްސަލަތަކުގެ އިތުރުން އަމިއްލައަށް އިސްނަގައިގެން ވެސް މައްސަލަ ބެލުމުގެ ބާރު އެ އޮފީހަށް ލިބިގެންވާއިރު، އެގޮތަށް ބަލާނީ ޕަބްލިކް އިންޓަރެސްޓް ހިމެނޭ މައްސަލަތައްކަަމަށް އެ އޮފީހުން ބުނެއެވެ. ޕަބްލިކް ހިއަރިން އަކަށް ދާން ޖެހޭ މައްސަލަތަކުގައި އެކަން އެގޮތަށް ކުރާނެ ކަމަށް ވެސް އެ އޮފީހުން ވަނީ މައުލޫމާތުދީފައެވެ.
މައްސަލަ ބަލައި ދައުވާކުރުމުގެ ބާރު ލިބިގެންވީ ނަމަވެސް ބޮޑަށް ބަލާނީ، ދެފަރާތް ސުލްހަ ކުރުމަށް ކަމަށެވެ. އެހެންނަމަވެސް އެކަމުން ހައްލު ނުލިބިއްޖެނަމަ، ޖިނާއީ ދައުވާ ކުރުމަށްޓަކައި ޕްރޮސެކިއުޓަރ ޖެނެރަލްގެ އޮފީހަށް ފޮނުވުމާއި، ތަހުގީގުކުރި މައްސަލައެއްގެ މަދަނީ ގެއްލުމުގެ ބަދަލު ހޯދުމާއި، މުދަލާއި ފައިސާ އަނބުރާ ހޯދުމުގެ ކަންކަން ހިމެނޭނަމަ، ފިޔަވަޅު އެޅުމަށް ޓަކައި އެޓަރނީ ޖެނެރަލްގެ އޮފީހަށް ފޮނުވުމުގެ ބާރު އެ އޮފީހަށް ލިބިގެންވެއެވެ.
