ދިރާސީ އަހަރު ނިމެންދެން މާލޭގެ ސްކޫލްތަކުގެ ކިޔެވުން އޮންލައިންކޮށް ކުރިއަށް ގެންދަން ނިންމައިފިއެވެ.
އެޑިޔުކޭޝަން މިނިސްޓްރީން ބުނީ ކޮވިޑުގެ މިހާރުގެ ހާލަތަށް ރިޔާއަތްކޮށް ހެލްތް ޕްރޮޓެކްޝަން އޭޖެންސީގެ ލަފާގެ މަތިން މި ހިނގާ ދިރާސީ އަހަރު ނިމެންދެން މާލެ ސަރަހައްދުގެ ސްކޫލުތަކުގެ ހުރިހާ ގްރޭޑްތަކުގެ ދަރިވަރުންގެ ކިޔެވުން ކުރިއަށް ގެންދިއުމަށް ހަމަޖެހިފައިވަނީ އޮންލައިންކޮށް ކަމަށެވެ. ދިރާސީ އަހަރުގެ ކިޔުވުން ނިމޭނީ މި ހިނގާ ޖޫން މަހުގެ 24 ވަނަ ދުވަހުއެވެ.
ކޮވިޑް19ގެ ކޭސްތައް އިތުރު ވުމާއި ގުޅިގެން މާލޭ ސްކޫލްތަކުގެ ކިޔެވުން އޮންލައިންކޮށް ކުރިއަށްގެންދާ ގޮތަށް ބަދަލުކުރީ މެއި މަހުގެ ފަސް ވަނަ ދުވަހުން ފެށިގެންނެވެ. ގިނަ ސްކޫލުތަކުގެ ކިޔެވުން އޮންލައިންކޮށް ކުރިއަށް ގެންދާއިރު ދިމާވާ ޑޭޓާ މައްސަލަ ހައްލުކުރުމަށް ލަރނިންގ މެނޭޖްމަންޓް ސިސްޓަމެއް ތައާރަފުކޮށްފައިވާ ކަމަށާއި އޮގަސްޓް މަހުގައި ބޭނުން ކުރަން ފަށާނެ ކަމަށް އެޑިޔުކޭޝަން މިނިސްޓްރީން ވަނީ ބުނެފައެވެ.
ސަރުކާރުން އިންޓަރނެޓްގެ އަގަށް ދާދި ފަހުން ގެނައި ބަދަލާއި ގުޅިގެން އިންޓަރނެޓުގެ އަގަށް ގެނައި ހެޔޮ ބަދަލުތަކާއެކު ޓީޗަރުންނަށާއި ދަރިވަރުންނަށް ބޮޑެތި ލުއިފަސޭހަތަކެއް ލިބިގެން ދާނެ ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވަނީ ވިދާޅުވެފައެވެ.
މިނިސްޓަރު އައިޝަތު ވިދާޅުވީ އިންޓަރނެޓްގެ އަގަށް މިގެނެވުނު ހެޔޮ ބަދަލާއެކު ކުރިއަށް އޮތް ތަނުގައި މިކަމުގެ ސަބަބުން ކުރާ ހެޔޮ އަސަރުތައް ފެންނާނެ ކަމަށް އުންމީދު ކުރައްވާ ކަމަށެވެ. އިންޓަރނެޓްގެ އަގަށް ގެނެވުނު ބަދަލުތަކުގެ ތެރެއިން ފިކްސްޑް ބްރޯޑްބޭންޑަށް ގެނައި ބަދަލުތަކާއެކު ޚިދުމަތްދޭން ފަށާނީ ޖުލައި މަހުގެ 1 ވަނަ ދުވަހުއެވެ. މޮބައިލް ބްރޯޑްބޭންޑަށް ގެނެވުނު ބަދަލުތަކާއެކު ޚިދުމަށް ދޭން ފަށާނީ އޮކްޓޯބަރ 1 ވަނަ ދުވަހުން ފެށިގެންނެވެ.
ބަދަލާއެކު ރެސިޑެންޝަލް އިންޓަރނެޓް ޚިދުމަތްތައް ބޭނުންކުރާ ފަރާތްތަކަށް (%60 - %75) މީހުންނަށް ސީދާކޮށް މަހުފީ އަގުހެޔޮ ވެގެންދާނެއެވެ.
