އިންތިގާލީ އިންސާފުގެ ގާނޫނުގެ ދަށުން މައްސަލަ ހުށަހެޅުމަށް ހުޅުވާލައިފިއެވެ.

މިގާނޫނުގެ ދަށުން މައްސަލަ ހުށަހަޅަން ޖެހެނީ، އިންތިގާލީ އިންސާފުގެ އޮމްބަޑްސްޕާރސަންގެ އޮފީހަށެވެ. ޖޫން މަހުގެ 13 ވަނަ ދުވަހުން ފެށިގެން 2 މަސް ދުވަހުގެ މުއްދަތަށް މައްސަލަ ހުށަހެޅޭނެއެވެ.

އޮމްބަޑްސްޕާރސަންގެ އޮފީހަށް ހުށަހެޅޭނީ، ދައުލަތުގެ މުއައްސަސާއަކުން ނިޒާމީ ސިފައެއްގައި ރާވައި ހިންގި އަމަލެއްގެ ސަބަބުން، ނުވަތަ އެފަދަ އަމަލެއްގެ ނަތީޖާއެއްގެ ސަބަބުން އިންސާނީ ހައްގެއް ނުވަތަ އަސާސީ ހައްގެއް ނިގުޅައިގެންފައިވާ މައްސަލަތަކެވެ.

އެގޮތުން 1 ޖެނުއަރީ 1953ން ފެށިގެން 17 ނޮވެމްބަރ 2018 އާ ހަމައަށް ހިނގާފައިވާ މިފަދަ މައްސަލަތައް އެ އޮފީހުން ބަލާނެ ކަމަށް ޗީފް އޮމްބަޑްސްޕާރސަން ޢަބްދުއްސަލާމް ޢާރިފް ވިދާޅުވިއެވެ.

އެ އޮފީހުގެ މަސައްކަތްތައް ކުރިއަށްދާގޮތާ ބެހޭގޮތުން ނޫސްވެރިންނަށް މައުލޫމާތު ދެއްވަމުން ޢާރިފް ވިދާޅުވީ، ކުރިއަށް އޮތް ދެ އަހަރުގެ ތެރޭގައި މިފަދަ މައްސަލަތައް ބަލައި އިންސާފު ހޯދައިދިނުމަށް މަސައްކަތް ކުރައްވާނެ ކަމަށެވެ.

އަދި ލިބިފައިވާ ގެއްލުމުގެ ބަދަލު ހޯދައިދީ، އެފަދަ އަމަލުތައް ހިނގަން މެދުވެރިވާ ސަބަބުތައް ދެނެގަންނަން މަސައްކަތް ކުރައްވައި، އެކަންކަން ތަކުރާރު ނުކުރުމަށް އެ މުއައްސަސާއަކަށް އެންގޭނެ ކަމަށެވެ. ހޭލުންތެރި ކުރުމުގެ ޕްރޮގްރާމްތައް ކުރިއަށް ރޭވިފައި އެބަހުރި ކަމަށާއި، އެއްމެ ބޮޑު އަމާޒަކީ ހައްގުތައް ކަށަވަރު ކޮށްދިނުން ކަމަށެވެ.

މައްސަލަ ބެލުމަށް ގަވައިދުތައް އެކުލަވާލެވިފައިވާ ކަމަށް އެ އޮފީހުން ބުނެއެވެ. މި ކަމުގައި ދައުލަތުގެ ހުރިހާ މުއައްސަސާއަކުންވެސް އެއްބާރުލުން ލިބޭނެ ކަމުގެ ޔަގީންކަން ލިބިފައިވާ ކަމަށް އޭނާ ވިދާޅުވިއެވެ.

އާއްމުން ހުށަހަޅާ މައްސަލަ ތަކުގެ އިތުރުން އަމިއްލަ އަށް އިސްނަގައިގެންވެސް މައްސަލަ ބެލުމުގެ ބާރު އެ އޮފީހަށް ލިބިގެންވާއިރު، އެގޮތަށް ބަލާނީ ޕަބްލިކް އިންޓަރެސްޓް ހިމެނޭ މައްސަލަތައްކަަމަށް އެ އޮފީހުން ބުނެއެވެ. ޕަބްލިކް ހިއަރިން އަކަށް ދާން ޖެހޭ މައްސަލަ ތަކުގައި އެކަން އެގޮތަށް ކުރާނެ ކަމަށްވެސް އެ އޮފީހުން ވަނީ މައުލޫމާތުދީފައެވެ.

މައްސަލަ ބަލައި ދައުވާ ކުރުމުގެ ބާރު ލިބިގެންވީ ނަމަވެސް ބޮޑަށް ބަލާނީ، ދެފަރާތް ސުލްހަ ކުރުމަށް ކަމަށެވެ. އެހެންނަމަވެސް އެކަމުން ހައްލު ނުލިބިއްޖެނަމަ، ޖިނާއީ ދައުވާ ކުރުމަށްޓަކައި ޕްރޮސެކިއުޓަރ ޖެނެރަލްގެ އޮފީހަށް ފޮނުވުމާއި، ތަހުގީގުކުރި މައްސަލައެއްގެ މަދަނީ ގެއްލުމުގެ ބަދަލު ހޯދުމާއި، މުދަލާއި ފައިސާ އަނބުރާ ހޯދުމުގެ ކަންކަން ހިމެނޭނަމަ، ފިޔަވަޅު އެޅުމަށް ޓަކައި އެޓަރނީ ޖެނެރަލްގެ އޮފީހަށް ފޮނުވުމުގެ ބާރު އެ އޮފީހަށް ލިބިގެންވެއެވެ.