މާޗު މަހު ގްރީން ފަންޑަށް 93 މިލިއަން ރުފިޔާ ޖަމާކުރި

މިއަހަރުގެ މާޗު މަހު ގްރީން ފަންޑަށް 93 މިލިއަނަށް ވުރެ ގިނަ ރުފިޔާ ޖަމާކޮށްފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ފިނޭންސް މިނިސްޓްރީން އާންމުކޮށްފައިވާ މާޗު މަހުގެ ގްރީންފަންޑު ރިޕޯޓް ދައްކާގޮތުން 93,443,056.39 ރުފިޔާ ގްރީން ފަންޑަށް ވަނީ ޖަމާކޮށްފައެވެ. އެއީ ރިސޯޓްތަކުން ގްރީން ޓެކުހުގެ ގޮތުގައި ލިބުނު 89,404,547.36 ރުފިޔާ އާއި ހޮޓާ ތަކުން ލިބުނު 1,101,077.46 ރުފިޔާގެ އިތުރުން ގެސްޓް ހައުސްތަކުން ލިބުނު 1,750,490.93 ރުފިޔާ އަދި ސަފާރީތަކުން ލިބުނު 1,186,940.64 ރުފިޔާއެވެ.

Advertisement

ވަކިވަކި އަތޮޅުތަކުން ގްރީން ޓެކުހުގެ ގޮތުގައި ލިބުނު އަދަދުތަކަށް ބަލާއިރު، އެންމެ ގިނަ އަދަދެއް ލިބިފައި ވަނީ ކ. އަތޮޅުންނެވެ. އެއީ 32,280,917.67 ރުފިޔާއެވެ. މާލެ ސިޓީން ގްރީން ޓެކުހުގެ ގޮތުގައި ލިބިފައި ވަނީ 621,933.80 ރުފިޔާއެވެ.

ފިނޭންސްގެ ތަފާސްހިސާބުތައް ދައްކާގޮތުން ފެބްރުއަރީ މަހު ސަރުކާރުން ވަނީ ގްރީން ފަންޑުން 31,164,094.76 ރުފިޔާ ޚަރަދުކޮށްފައެވެ. އޭގެ ތެރޭގައި އަތޮޅުތެރޭގެ އެކި ރަށްރަށުގެ ފެނާއި ނަރުދަމާ އާއި ތަފާތު އެކި މަޝްރޫއުތައް ހިންގުމަށް ކުރި ޚަރަދު ހިމެނެއެވެ.

އަހަރު ފެށުނު އިރު ގްރީން ފަންޑުގައި 809,590,720.39 ރުފިޔާ ހުރި އިރު، އަހަރުގެ ޖެނުއަރީ މަހު ގްރީން ފަންޑަށް 57,347,607.85 ވަނީ އިތުރުވެފައެވެ. އަދި 12,873,713.84 ރުފިޔާ ވަނީ ފަންޑުން ޚަރަދުކޮށްފައެވެ. ފެބްރުއަރީ މަހު ފަންޑަށް އިތުރުވި 63,543,334.54 ރުފިޔާ އާއި އެމަހު ޚަރަދު ކުރި 58,045,957.88 ރުފިޔާއާ އެކު ފެބްރުއަރީ މަހުގެ ނިޔަލަށް ގްރީން ފަންޑުގައި ޖުމްލަ ހުރީ 859,561,991.06 ރުފިޔާއެވެ. އަދި މާޗު މަހު ފަންޑަށް ޖަމާވި އަދަދާއި ފަންޑުން ކުރި ޚަރަދާއި އެކު މާޗު މަހު ގްރީން ފަންޑުގެ ބެލެންސްގައި ހުރީ 62,278,961.63 ރުފިޔާއެވެ.

މިއަހަރުގެ ފުރަތަމަ ތިން މަހު ގްރީން ފަންޑަށް ޖުމްލަ 214.3 މިލިއަން ރުފިޔާ ޖަމާވި އިރު، 102 މިލިއަން ރުފިޔާ ވަނީ ފަންޑުން ޚަރަދުކޮށްފައެވެ. އަދި މާޗު މަސް ނިމުނު އިރު ގްރީން ފަންޑުގައި ޖުމްލަ ހުރީ 921.8 މިލިއަން ރުފިޔާއެވެ.