"ތަހުގީގު ކުރިއަށްދާ ސްޕީޑާމެދު ފަޚުރުވެރިވޭ"

ތަހުގީގު ކުރިއަށްދަނީ ފަހުރުވެރިވާ ބާރުމިނުގައި ކަމަށް ސުޕްރިންޓެންޑެންޓް އޮފް ޕޮލިސް މުހައްމަދު ބަޝީރު ވިދާޅުވެއްޖެއެވެ.

ރައީސް ނަޝީދަށް އަމާޒުކޮށް ދިން ޓެރަރިޓް ހަމަލާއަށް އެއްމަސް ވުމާ ގުޅިގެން ތަހުގީގަށް ލިބިފައިވާ ކުރިއެރުންތައް ހިއްސާކުރުމަށް ބޭއްވި ނޫސްވެރިންގެ ބައްދަލު ވުމުގައި ނޫސްވެރިއެއްގެ ސުވާލަށް ޖަވާބު ދެއްވަމުން ބަޝީރު ވިދާޅުވީ މިފަދަ ތަހުގީގު ތަކަކީ ވަގުތު ނަގާނެ ކަންކަން ކަމަށާއި، ތަހުގީގު ޓީމުން މަސައްކަތް ކުރަނީ ވީހާވެސް އަވަހަކަށް ތަހުގީގު ނިންމުމަށް ކަމަށް ބަޝީރު ވިދާޅުވިއެވެ. ބަޝީރު ވިދާޅުވީ ފަޚުރުވެރިވާ ބާރު މިނުގައި ތަހުގީގު ކުރިއަށްދާ ކަމަށެވެ. މައުލޫމާތުތައް އެހާ ތަފްސީލްކޮށް ހިއްސާ ނުކުރަނީ ތަހުގީގަށް ހުރަސް އެޅިދާނެތީ ކަމަށާއި، އެއީ ތަހުގީގު ބާރުމިނުގައި ކުރިއަށް ނުދާތީ ނޫން ކަމަށް ބަޝީރު ވިދާޅުވިއެެވެ.

ސުޕްރިންޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ، އެ ހަމަލާ ދިނުމުގަައި އަމަލީ ގޮތުން ބައިވެރިވި މީހުންނާއި، ފަންޑު ކުރި މީހުންނާއި، ހަމަލާ ރާވައި ހިންގުމުގައި ބައިވެރިވި މީހުން ގާނޫނުގެ ކުރިމައްޗަށް ގެނެވޭނެ ކަމުގެ ޔަގީންކަން އެބައޮތް ކަމަށެވެ. އެއްދުވަހުން އަނެއްދުވަހަށް ތަހުގީގަށް އަންނަނީ ކުރިއެރުން ލިބެމުން ކަމަށް ޝިފާއު ވިދާޅުވިއެވެ.

މިހަމަލާއާ ސީދާ ގުޅުންހުރި 4 މީހަކު ހައްޔަރުކޮށްފައިވާއިރު އެ 4 މީހުންނަކީ ވެސް ހަރުކަށި ފިކުރު މީހުންކަމަށް ބަޝީރު ވިދާޅުވިއެވެ. ޓެރަރިޒަމާ ހަރުކަށި ފިކުރާ ގުޅިގެން ހިންގާ އޮޕަރޭޝަންތަކުގައި 10 މީހަކު މިހާރު ވެސް ފުލުހުންގެ ބެލުމުގެ ދަށުގައި އެބަތިބިކަމަށް ވިދާޅުވިއެވެ. ތަހުގީގު ކުރިއަށްގެންދަނީ ޕީޖީގެ ލަފާގެ މަތިންކަމުން ދައުވާ އުފުުލުމުގައި އެއްވެސް ހުރަހެއް ނޯންނާނެ ކަންވަނީ ފާހަގަކޮށްފައެވެ.