މެއި 6 ވަނަ ދުވަހު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެން، މިހާތަނަށް 25 ތަނެއް ބަލައި ފާސްކޮށްފައިވާ ކަމަށާއި، ފުލުހުން ހިންގި އޮޕަރޭޝަންތަކުގެ ތެރެއިން 14 މީހަކު ހައްޔަރުކޮށްފައިވާ ކަމަށް ފުލުހުން ބުނެފިއެވެ.
ރައީސް ނަޝީދަށް ދިން ހަމަލާއަށް މަސް ދުވަސް ވެފައިވާ އިރު، އާދީއްތަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސްޕްރިންޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ ރައީސް ނަޝީދަށް ދެވުނު ހަމަލާއަށްފަހު މިހާރު ކުރިއަށްގެންދެވޭ ތަހުގީގަށް އެކި ގޮތްގޮތުން މައުލޫމާތު ހާމަކޮށްފައިވާ 150ށް ވުރެ ގިނަ މީހުން އެބަތިބި ކަމަށެވެ. އަދި އާންމު ފަރާތްތަކުން ލިބުނު މައުލޫމާތާއި ފުލުހުންގެ ތެރެއިން ލިބުނު މައުލޫމާތުގެ މައްޗަށް މިހާތަނަށް ޖުމްލަ 25ށް ވުރެ ގިނަ ތަންތަން ބަލައި ފާސްކޮށް 14 މީހަކު ފުލުހުންގެ ބެލުމުގެ ދަށަށް ގެނެވިފައިވާ ކަމަށެވެ.
މީގެ އިތުރުން މި މައްސަލައިގައި އާންމު ރައްޔިތުންގެ ފަރާތުން ހޯދުނު ކެމެރާގެ ފުޓޭޖްގެ އިތުރުން ފުލުހުންގެ ކެމެރާ ފުޓޭޖްތައް ހިމެނޭ ގޮތަށް 200ށް ވުރެ ގިނަ ފުޓޭޖްގެ ތެރެއިން ފުޓޭޖްތައް ބަލައި އެނަލައިޒްކުރުމުގެ މަސައްކަތް މިހާރު ވެސް ކުރިއަށްދޭ. އަދި ސީސީޓީވީގެ ފުޓޭޖްތަކުގެ އެނަލިސިސްތަކުން މި މައްސަލައިގެ ތަހުގީގަށް ވަރަށްބޮޑު ކުރިއެރުންތަކެއް ލިބިފައިވޭ. އަދި ތަހުގީގަށް ވަރަށް ގިނަ ކުރިއެރުންތަކެއް ލިބިފައި އެބަހުރިސްޕްރިންޓެންޑެންޓް އޮފް ޕޮލިސް ހަސަން ޝިފާއު
ޝިފާއު ވިދާޅުވީ މި ތަހުގީގަށް އާންމުންގެ ފަރާތުން ވަރަށްބޮޑު އެއްބާރުލުން ލިބެމުންދާ ކަމަށާއި، މި މައްސަލައާ ގުޅިގެން ކްރައިމް ސީން އަދި ބަލައި ފާސްކުރެވުނު ތަންތަނުގެ ތެރެއިން ހޯދުނު ތަކެތީގެ ތަހުލީލުތައް ދިވެހި ފުލުހުންގެ ފޮރެންސިކް ސަރވިސް އިން ކުރަމުންދާ ކަމަށެވެ. އަދި މިފަދަ މައްސަލަތަކަށް ބޭނުންވާ ވަސީލަތްތައް ބޭނުންކޮށްގެން ފޮރެންސިކްކޮށް ތަހުގީގު އެކިއެކި މަރުހަލާތަކުގައި ތަހުގީގަށް ބޭނުންވާ އެކިއެކި އެހީތެރިކަން ފޯރުކޮށްދެމުންދާކަމަށް ޝިފާއު ވިދާޅުވިއެވެ.
މީގެ އިތުރުން އިންޓަރނޭޝަނަލް ޕާޓްނަރުންގެ ފަރާތުން ވެސް އަންނަނީ ބައެއް ފޮރެންސިކް ތަހުލީލުތަކަށް އެހީތެރިކަން ފޯރުކޮށްދެމުން. މި މައްސަލައިގެ ތަހުގީގަށް އެއްކުރެވުނު ފޮރެންސިކް ހެކިތަކުން ވެސް މުހިންމު ހެކިތަކެއް ވަނީ ލިބިފައި. މިއީ މި މައްސަލައިގެ އިންސާފަށް ވާސިލްވުމަށް މުހިންމު ދައުރެއް އަދާކުރާނެ ހެކިތަކެއް ކަމަށްވާތީ ހެކިތަކާ ގުޅޭ ތަފްސީލުތައް މިވަގުތު އަޅުގަނޑުމެން ހާމަނުކުރަނީ ތަހުގީގު ސްޓްރެޓެޖީ ރޭވިފައިވާ ގޮތް ހެއްކާ ގުޅޭ އިތުރު ތަފްސީލު އާންމުކުރަން ނިންމާފައި ނުވާތީކަން ފަހަގަކުރަންސްޕްރިންޓެންޑެންޓް އޮފް ޕޮލިސް ހަސަން ޝިފާއު
ޝިފާއު ވިދާޅުވީ ތަހުގީގުގައި ފޯކަސްކޮށްގެން މަސައްކަތް ކުރަމުން ދަނީ އަމަލީގޮތުން ބައިވެރިވި މީހުންގެ އިތުރުން ހަމަލާ ރާވައި ހިންގުމުގައި ބައިވެރިވާ ފަރާތްތަކާއި އަދި ހަމަލާ ދިނުމަށް މާލީ ގޮތުން އެއްވެސް އެހީތެރިކަމެއް ދީފައިވޭތޯ ބެލުމަށް ކަމަށެވެ. އެގޮތުން މި މައްސަލައިގައި އެކި ދައުރު އަދާކުރި ސަސްޕެކްޓުންގެ ތެރެއިން މުހިންމު މީހުން ފުލުހުންގެ ބެލުމުގެ ދަށަށް ގެނެވިފައިވާ ކަމަށް އޭނާ ވިދާޅުވިއެވެ.
ޓެރަރިޒަމަށް ފައިނޭންސް ކުރުމާއި ފައިނޭންޝިއަލް ކްރައިމްސްއާ ގުޅުން ހުރި ތަހުގީގުގެ ދާއިރާއިން ފުލުހުންގެ ގާބިލްކަން އިތުރުކުރުމަށް އެމެރިކާގެ ސަރުކާރާ ގުޅިގެން އެމެރިކާގެ މާހިރެއްގެ ލަފަޔާއި އިރުޝާދާއެކީގައި މަސައްކަތްތަކެއް ކުރެވެމުން އެބަދޭ. އެގޮތުން ރައީސް ނަޝީދަށް ދެވުނު ހަމަލާއާ ގުޅުން ހުރި މައްސަލައިގައި ތަހުގީގުގައި ފައިނޭންޝިއަލް އެންގަލްއިން އެބޭފުޅާގެ ލަފަޔާއި އިރުޝާދު ހޯދަމުންދާ ކަން ފާހަގަކޮށްލަން،ސްޕްރިންޓެންޑެންޓް އޮފް ޕޮލިސް ހަސަން ޝިފާއު
މާލީ ގޮތުން މިކަމަށް ބަޔަކު ހޭދަކޮށްފައިވޭތޯ ބަލައި މި އޭރިއާގެ ތަފްސީލީ ތަހުގީގެއް ކުރިއަށް ގެންދާކަމަށް ފުލުހުން ބުނެއެވެ. އަދި ރައްޔިތުންގެ ސަލާމަތާއި ރައްކާތެރިކަމާއި، އަންނަ ފަރާތްތަކުގެ ރައްކާތެރިކަން ކަށަވަރު ކުރުމަށްޓަކައި ރާއްޖޭގައި ޓެރަރިޒަމްގެ އަމަލުތައް ހިންގާ އެކަމަށް ވާގިވެރިވާ ފަރާތްތައް އަދި އެފަރާތްތަކުން އެ މޭރުމުން ހިންގާ މަސައްކަތްތައް ހުއްޓުވުމަށް ފުލުހުންނަށް ލިބިފައިވާ އެންމެހާ ބާރުގެ ބޭނުން ކުރަމުން ގެންދާނެ ކަމަށް ފުލުހުން ބުނެއެވެ.
ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެން މިހާތަނަށް ސީދާ އެ މައްސަލައާ ގުޅުންހުރި 4 މީހަކު ވަނީ ހައްޔަރުކޮށްފައެވެ. އަދި ހަރުކަށި ފިކުރު ފަތުރާ އަދި ރާވައި ހިންގާކަމުގެ ތުހުމަތުގައި 10 މީހަކު ހައްޔަރުކުރެވިފައިވާ ކަމަށެވެ.
ފުލުހުން ބުނީ މި ތަހުގީގަކީ ވަރަށް ފުޅާ ދާއިރާއެއްގައި ކުރަމުންދާ ތަހުގީގެއް ކަމަށާއި، މި ތަހުގީގުގައި ވަކިވަކި ފަރާތްތައް ބައިވެރި މިންވަރާއި އެ ހުރިހާ މައުލޫމާތެއް ހޯދަމުންދާ ކަމަށެވެ. އަދި ހައްޔަރު ކުރެވުނު 4 މީހުންނަކީ ލިމިޓެއް ނޫން ކަމަށާއި، މި މައްސަލަ އަދިވެސް ބަލައި ކަންކަން ހޯދާ ފުޅާ ދާއިރާއެއްގައި ތަހުގީގު ހިންގަމުންދާނެ ކަމަށެވެ.
