ވަކި ސަރަހައްދަކީ ޓެރަރިޒަމްގެ އަމަލު އިތުުރުވެދާނެ ސަރަހައްދެއް ކަމަށް ކަނޑައަޅާފައެއް ނެތް - ފުލުހުން

ރާއްޖޭގެ ވަކި ސަރަހައްދަކީ ޓެރަރިޒަމްގެ އަމަލު އިތުުރުވެދާނެ ސަރަހައްދެއް ކަމަށް ކަނޑައަޅާފައި ނެތް ކަަމަށް ފުލުހުން ބުނެފިއެވެ.

މެއި 6 ވަނަ ދުވަހުގެ ރޭ ރައީސް ނަޝީދަށް އަމާޒުކޮށްދިން ޓެރަރިސްޓް ހަމަލާއާ ގުޅިގެން ހިންގާ ތަހުގީގުގަަށް ލިބިފައިވާ ކުރިއެރުންތައް ހާމަކުރުމަށް ބޭއްވި ނުސްވެރިންގެ ބައްދަލުވުމުގައި ޗީފް ސުޕްރިންޓެންޑެންޓް އޮފް ޕޮލިސް މުހައްމަދު ބަޝީރު ވިދާޅުވީ، ރާއްޖޭގެ ވަކި ސަރަހައްދަކީ ޓެރަރިޒަމްގެ އަމަލުތައް ހިންގާ ނުވަތަ އިތުރުވެފައިވާ ސަރަހައްދެއް ކަމަށް ފާހަގަކޮށްފައިނުވާ ކަމަށާއި، ލިބޭ މައުލޫމާތައް ބިނާކޮށް ތަހުގީގު ހިންގަމުން އަންނަ ކަމަށެވެ.

ބަޝީރު ވިދާޅުވީ، ލިބޭ މައުލޫމާތަށް ބިނާކޮށް އެވަގުތަކަށް އަވަސްކުރަން ޖެހޭ ސަރަހައްދެއްގައި އޮޕަރޭޝަންތައް އަވަސް ކުރަމުން އަންނަ ކަމަށެވެ.

އާދީއްތަ ދުވަހުގެ ޕްރެސް ކޮންފަރެންސްގައި ނޫސްވެރިންގެ ގިނަ ސުވާލުތަކަށް ފުލުހުންގެ ފަރާތުން ޖަވާބު ނުލިބޭކަން ފާހަގަކުރެވުނެވެ. ތަހުގީގަށް ކުރިއެރުން ލިބިފައިވާކަމަށް ފުލުހުން ފާހަގަކުރި ނަމަވެސް އިތުރު އެއްވެސް ތަފްސީލެއް ނުދެއްވައެވެ. ރައީސް ނަޝީދަށް ދިން ހަމަލާއާ ސީދާ ގުޅުންހުރި 4 މީހަކު ހައްޔަރު ކޮށްފައިވާއިރު، މި ހަމަލާއާ ގުޅިގެން ފަށާފައިވާ ޓެރަރިޒަމާ ހަރުކަށި ފިކުރާ ގުޅުންހުރި މީހުން ހޯދުމަށް ކުރިއަށް ގެންދިޔަ އޮޕަރޭޝަންގައި 10 މީހަކު ހައްޔަރު ކޮށްފައިވާ ކަމަށް ފުލުހުން ވިދާޅުވިއެވެ.

ބަޝީރު ވިދާޅުވީ، ރައީސް ނަޝީދަށް ދިން ހަމަލާއާ ސީދާ ގުޅުންހުރި 4 މީހުންނަކީ ވެސް ހަރުކަށި ފިކުރުގެ މީހުންކަން ޔަގީންކުރެވޭ ކަމަށެވެ.

އެމެރިކާގެ ތަހުގީގު ޓީމެއްގެ އެހީގައި މި ހަމަލާއަށް ފަންޑު ކޮށްފައިވޭތޯއާއި ފަންޑުކުރި މީހުން ދެނެގަތުމަށް މަސައްކަތް ކުރަމުން އަންނަ ކަމަށް ފުުލުހުން ބުނެފައިވެއެވެ. ހަމަލާގެ މޯޓިވް ދެނެގަނެވިފައިވޭތޯ ނޫސްވެރިން ތަކުރާރުކޮށް ކުރި ސުވާލުގެ ޖަވާބުގައި މޯޓިވް ދެނެގަނެވިފައިވާ ކަމާމެދު ފުލުހުން އިންކާރެއް ނުުކުރައްވައެވެ. އެހެންނަމަވެސް އެއްވެސް ތަފްސީލެއް ދެވެން ނެތް ކަމަށް ތަކުރާރުކޮށް ވިދާޅުވިއެވެ.