ރަހީނުކޮށް އަނިޔާކުރި މައްސަލައިގައި 4 ވަނަ މީހަކު ހައްޔަރުކޮށްފި
ހޮނިހިރު ދުވަހު ހެނދުނު ވެސް ކޯޓު އަމުރެއްގެ ދަށުން އުމުރުން 19 އަހަރުގެ ދިވެހި ފިރިހެނަކު ވަނީ ހައްޔަރުކޮށްފައި
ކުޅުދުއްފުށި ޕޮލިސް ސްޓޭޝަން
ހދ. ކުޅުދުއްފުށިން މީހަކު ރަހީނުކުރި މައްސަލައިގައި މިހާތަނަށް 4 މީހަކު ފުލުހުންގެ ބެލުމުގެ ދަށަށް ގެނެސްފިއެވެ.
މިދިޔަ ހޮނިހިރު ދުވަހުގެ ރޭ ކުޅުދުއްފުށިން ރަހީނުކޮށްފައި ވަނީ އުމުރުން 29 އަހަރުގެ ހަސަން އިބްރާހިމެވެ. އޭނާ ރަހީނުކޮށް އޭނާއަށް ބޮޑެތި އަނިޔާތައް ވެސް ކޮށްފައިވެއެވެ. ފުލުހުން ބުނީ އެ މައްސަލާގައި ކޯޓު އަމުރެއްގެ ދަށުން ހޮނިހިރު ދުވަހުގެ ރޭ 20 އަހަރުގެ ދިވެހި ފިރިހެނަކު ހައްޔަރުކޮށްފައިވާކަމަށެވެ. މީގެ އިތުރުން ހޮނިހިރު ދުވަހުގެ ދުވާލުގެ ވަގުތުގައި ވެސް ފުލުހުން ވަނީ ކޯޓު އަމުރެއްގެ ދަށުން އުމުރުން 19 އަހަރުގެ ދިވެހި ފިރިހެނަކު ހައްޔަރުކޮށްފައެވެ. މިއީ އެ މައްސަލައިގައި ހައްޔަރުކުރި ތިންވަނަ މީހާއެވެ. މީގެ ކުރިން އެ މައްސަލައިގައި 24 އަހަރުގެ މީހަކާއި 25 އަހަރުގެ މީހެއް ވެސް ހައްޔަރުކުރިއެވެ. މި މައްސަލައިގައި އެންމެ ފުރަތަމަ ހައްޔަރުކުރި ދެމީހުންގެ ބަންދަށް 15 ދުވަސް ވަނީ ޖަހާފައެވެ.
މިކަމާ ގުޅިގެން ފުލުހުން މީގެ ކުރިން ބުނީ, ކުޅުދުއްފުށީގައި މޫނު ނިވާކޮށްގެން ތިބި ބަޔަކު 29 އަހަރުގެ ޒުވާނަކު ކާރަކަށް އަރުވައިގެން ގެންގޮސް އަނިޔާކޮށްފައި ވާކަމަށެވެ. މިކަން ފުލުހުންނަށް ރިޕޯޓު ކޮށްފައިވަނީ މެއި 29 ވަނަ ދުވަހުގެ ރޭ 20:48 ހާއިރު ކަމަށް ފުލުހުން މައުލޫމާތު ދެއެވެ. ރާއްޖެ އެމްވީއާ ވާހަކަދެއްކި ކުޅުދުއްފުށި ރައްޔިތަކު ބުނީ ޒުވާނާއަށް އަނިޔާކުރީ ވައްކަން ކުރާތީކަމަށް ބުނެއެވެ. އޭނާ އެތައް ތަނަކުން ވައްކަން ކުރާ ވީޑިއޯއެއް ކަމަށް ބުނާ ވީޑިއޯއެއް މިފަހަކުން އާންމު ވިކަމަށެވެ. ހަމަލާ ދިނީ އޭނާ ވައްކަން ކުރާތީ އެކަމާ ރުޅިގަދަވެގެން ކަމަށް ވެސް މި މީހާ ކިޔައިދިނެވެ.
ޒުވާނާއަށް ލިބުނު އަނިޔާއަށް އެންމެ ފުރަތަމަ ފަރުވާ ދީފައިވަނީ ކުޅުދުއްފުށީ ރީޖަނަލް ހޮސްޕިޓަލުގައެވެ. އަދި އޭނާގެ ހާލު ދެރަވެ އިތުރު ފަރުވާއަށް މާލެ ގެނެސް މިހާރު އަންނީ އޭޑީކޭގައި ފަރުވާދެމުންނެވެ. މި ޒުވާނާގެ ބޮލުގެ ނާށިގަނޑުގެ ދެ ފަރާތުން ފަޅައިގެން ގޮސް ސިކުނޑިއަށް ގިނަ އަދަދަކަށް ލޭ އެޅިފައިވާތީ، ބޮލުގެ އޮޕަރޭޝަނެއް ވެސް ކޮށްފައިވާކަމަށް މަޢުލޫމާތުލިބެއެވެ.
މިމައްސަަލަ ފުލުހުންދަނީ ތަޙްޤީގު ކުރަމުންނެވެ.
