ސީރިއާ އަތުން ބަލިވެ ރާއްޖެއަށް ހުރަސްތަކެއް

ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގައި ހުކުރު ދުވަހުގެރޭ ކުޅުނު މެޗުން ސީރީއާ އަތުން ރާއްޖެ ބަލިވެއްޖެއެވެ.

ހުކުރު ދުވަހުގެރޭ ދުބާއީގައި ކުޅުނު މެޗުން ރާއްޖެ ބަލިވީ 4-0 ގެ ނަތީޖާއަކުންނެވެ.

މީގެ ކުރިން ކޮވިޑް-19 އަށް ޕޮޒިޓިވްވި ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އަށް މި މެޗުގައި ކުޅުމުގެ ފުރުސަތު ލިބިފައެއް ނުވެއެވެ. ރާއްޖޭގެ ފަރާތުން އާދައިގެ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ސީރިއާއިން ވަނީ ގިނަ ހަމަލާތަކެއް އުފައްދާފައެވެ. މި ހާފުގައި ރާއްޖެއަށް އެންމެ ހަމަލާއެއް އުފެއްދުނު ނަމަވެސް، މިޑްފީލްޑަރު މުޙައްމަދު އުމެއިރު ފޮނުވާލި ހަމަލާ ދިޔައީ ގޯލު އަރިމަތީ ދަނޑި ކައިރިން ބޭރަށެވެ.

ފުރަތަމަ ހާފުގައި ސީރިއާއިން ތިން ލަނޑުގެ ލީޑެއް ނެގިއިރު، މެޗުގެ 29 ވަނަ މިނެޓުގައި އެ ގައުމުން ވަނީ ލީޑު ނަގާފައެވެ. މި ލަނޑު އެ ގައުމަށް ކާމިޔާބުކޮށްދިނީ މަހުމޫދު އަލް-މަވާސްއެވެ. އޭގެ ފަހުން މެޗުގެ 34 ވަނަ މިނެޓުގައި އޭރިއާ ތެރެއިން ރާއްޖޭގެ ކެޕްޓަން އަކުރަމް އަބްދުލް ޣަނީ (އަކޫ) ކުރި ފައުލަކަށް ސީރިއާއަށް ޕެނަލްޓީއެއް ދިންއިރު، އަޔަން އޮސްމަން ވަނީ މި ޕެނަލްޓީ އެ ގައުމަށް ކާމިޔާބުކޮށްފައެވެ. އަދި ފުރަތަމަ ހާފުގެ އިތުރު ވަގުތުގައި ލިބުނު އިތުރު ޕެނަލްޓީއަކުން ސީރިއާގެ އަލް-މަވާސް ވަނީ އެ ގައުމުގެ ތިންވަނަ ލަނޑު ޖަހާފައެވެ. މިއީ އޭރިއާ ތެރެއިން ރާއްޖޭގެ ސަމޫހު އަލީ (ސަމުއްޓެ) ގެ އަތުގައި ބޯޅަ ޖެހުމުން ރެފުރީ ދިން ޕެނަލްޓީއެކެވެ.

މި މެޗުގެ ދެވަނަ ހާފުގެ ކުރީކޮޅު ރާއްޖެއަށް ވަނީ ލަނޑެއް ޖަހަން ހުސް ފުރުސަތެއް ލިބިފައެވެ. އެގޮތުން އޭރިއާ ތެރެއިން ރާއްޖޭގެ ހަމްޒާ މުޙައްމަދު (ހަމްޕު) އަށް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ ސީރިއާގެ ގޯލްކީޕަރު ވަނީ ދިފާއުކޮށްފައެވެ. އެކަމަކު މެޗުގެ 72 ވަނަ މިނެޓުގައި ސީރިއާއަށް އިތުރު ޕެނަލްޓީއެއް ދިންއިރު، މި ޕެނަލްޓީ ކާމިޔާބުކޮށް އަލް-މަވާސް ވަނީ މެޗުގައި ހެޓްރިކް ހަދާފައެވެ. މިއީ އޭރިއާ ތެރެއިން ރާއްޖޭގެ މުޙައްމަދު ސާއިފް ކުރި ފައުލަކަށް ރެފުރީ ދިން ޕެނަލްޓީއެކެވެ.

މި މެޗުން ސީރިއާ މޮޅުވި ނަމަވެސް، އެ ގައުމުން މެޗު ނިންމާލަން ޖެހުނީ އެއް ކުޅުންތެރިއަކު މަދުކޮށެވެ. އެއީ މެޗު ނިމެން ފަސް މިނެޓަށް ވެފައި ވަނިކޮށް އެ ގައުމުގެ މުޙައްމަދު އަޖާނަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ. ރެފުރީ އޭނާއަށް ދެވަނަ ރީނދޫ ކާޑު ދެއްކީ އޭރިއާ ތެރެއިން ޑައިވްކުރި ކަމަށް ނިންމުމަށްފަހުއެވެ.

މި މެޗުން ހޯދި މޮޅާއެކު ސީރިއާއިން ވަނީ ގްރޫޕް އޭގެ އެއްވަނައިގައި އަށް ޕޮއިންޓުގެ ލީޑެއް ނަގާފައެވެ. އެގޮތުން ގްރޫޕުގެ އެއްވަނައިގައި ސީރިއާ އޮތީ ހަ މެޗުން 18 ޕޮއިންޓާއެކުއެވެ. ދެވަނައިގައި އޮތް ޗައިނާއަށް ފަސް މެޗުން ލިބިފައިވަނީ 10 ޕޮއިންޓެވެ. ތިންވަނައިގައި އޮތް ފިލިޕީންސަށް ފަސް މެޗުން ހަތް ޕޮއިންޓް ލިބިފައިވާއިރު، ކޮލިފައިންގައި ރާއްޖެ އޮތީ ހަ މެޗުން ހަ ޕޮއިންޓާއެކު ހަތަރުވަނައިގައެވެ. އަދި ފުލުގައި އޮތީ ފަސް މެޗު ކުޅެގެން ޕޮއިންޓެއް ލިބިފައިނުވާ ގުއާމެވެ.

އޭޝިއަން ކަޕަށް ކޮލިފައިވުމަށް ރާއްޖެއިން އަމާޒުހިފާފައިވާއިރު، 2023 ވަނަ އަހަރު ބާއްވާ މުބާރާތުގެ ގްރޫޕް ސްޓޭޖުގެ ސީދާ ޖާގައެއް ލިބޭނީ ތާވަލުގެ ކުރީގައި އޮންނަ ތިން ގައުމަށެވެ. އަނެއް ދެ ގައުމު ޖެހޭނީ ގްރޫޕް ސްޓޭޖުން ޖާގައެއް ހޯދުމަށް ޕްލޭއޮފް ކުޅެންށެވެ.