އިނގިރޭސިވިލާތުގައި، އުމުރުން 12 އަހަރާ 15 އަހަރާ ދެމެދުގެ ކުދިންނަށް ފައިޒަރ ވެކްސިން ޖެހުމުގެ ހުއްދަ ދީފިއެވެ.

ފައިޒަރ ވެކްސިން އެންމެ ފުރަތަމަ ބޭނުންކުރަން ފަށާފައިވާ އިނގިރޭސިވިލާތުން، 12 އަހަރުން މަތީގެ ކުދިންނަށް މި ވެކްސިން ޖެހުމުގެ ހުއްދަ ދީފައި ވަނީ ގިނަ ދިރާސާތަކަކަށްފަހު އެވެ. އެގޮތުން މިހާތަނަށް ކުރިއަށް ގެންދެވިފައިވާ ދިރާސާތަކުން ދައްކާގޮތުގައި ފައިޒަރގެ ވެކްސިނަކީ ކުޑަކުދިންނަށް ޖަހަން އެކަށީގެންވާ ވެކްސިނެކެވެ. މި ވެކްސިނުން ކުޑަކުދިންނަށް ގެއްލުން ނުވާއިރު، މިވެކްސިނުން ކުޑަކުދިން ކޮވިޑުން ރައްކާތެރިކޮށްދެއެވެ.

އިނގިރޭސިވިލާތުން މިކަމަށް ހުއްދަ ދިނުމާއި އެކު އެގައުމުގެ ސްކޫލް ދަރިވަރުންނަށް ވެކްސިން ކެމްޕޭނެއް ފެށުމުގެ ފުރުސަތު ވަނީ ލިބިފައެވެ. ކުޑަކުދިންނަށް ކޮވިޑުން ކުރާ އަސަރު ކުޑަ ކަމަށް ދައްކާއިރު، ކޮވިޑަށް ޕޮޒިޓިވްވި ކުޑަކުދިންގެ ތެރެއިން ބަލީގެ ބޮޑު އަސަރެއް ކޮށްފައި ވަނީ މަދު ކުދިންނަށެވެ.

އަދި މީގެ އިތުރުން ޔޫރަޕިއަން ޔޫނިއަން މެޑިސިން އެޖެންސީ، އެމެރިކާ އާއި ކެނެޑާއިންވެސް ވަނީ މިއުމުރުފުރައިގެ ކުދިންނަށް ފައިޒަރ ވެކްސިން ދިނުމުގެ ހުއްދަދީފައެވެ. މީގެއިތުރުން ޔޫރަޕިއަން ޔޫނިއަންގެ ގައުމުތަކުގައި އުމުރުން 16 އަހަރުން މަތީގެ މީހުންނަށް އަންނަނީ ފައިޒަރ ވެކްސިން ދެމުންނެވެ.

ފައިޒަރ އާއި ބައޯއެންޓެކް ވެކްސިނުން ކުޑަކުދިންނަށް ކުރާ އަސަރު ދެނެގަތުމަށް ކުރިޔަށް ގެންދިޔަ ޓްރެއަލްގެ ނަތީޖާ ވަނީ މާޗް މަހު ހާމަކޮށްފައެވެ. މިޓްރެއަލްގައި އުމުރުން 12 އަހަރާއި 15 އަހަރާ ދެމެދުގެ 2260 ކުދިން ބައިވެރިކޮށްފައި ވާއިރު، މީގެ ނަތީޖާ ދައްކާގޮތުން އެކުދިންނަށް ވެކްސިން ދިނުމުން 100 އިންސައްތަ ވައިރަސް އިން ރައްކާތެރިކޮށްދެއެވެ.

ފައިޒަރގެ ޓްރެއަލްތަކުން ވެކްސިން ކާމިޔާބުކަން އެނގިފައިވާއިރު ކުޑަކުދިންނަށް ވެކްސިން ދިނުމުން ވައިރަސް އިން ދިފާއުވާ މިންވަރު ދެނެގަތުމުގެ ޓްރެއަލްތައް ވެކްސިން އުފައްދާ އެހެން ކުންފުނިތަކުން ވެސް އަންނަނީ ކުރަމުންނެވެ. އެގޮތުން އެސްޓްރަޒެނިކާ އާއި މޮޑާނާ އަދި ޖޯންސަން އަދި ޖޯންސަން އިން އަންނަނީ އުމުރުން 6 މަހުގެ ކުދިންނާ ހަމައިން ވެކްސިން އިން ރައްކާތެރިކަން ލިބޭ މިންވަރު ދެނެގަތުމަށް ޓްރެއަލްތައް ކުރިޔަށް ގެންދަމުންނެވެ.