ބުދަ ދުވަހު 1،645 މީހުން ވެކްސިން ޖަހާފައިވޭ
ވެކްސިންގެ ފުރަތަމަ ޑޯޒު ޖަހާފައި ވާ މީހުންގެ އަދަކީ 429
ޓްރީ ޓޮޕް ހޮސްޕިޓަލުގައި ވެކްސިން ޖެހުމުގެ މަސައްކަތް ކުރިއަށް ދަނީ
ބުދަ ދުވަހު 1،645 މީހުން ވެކްސިން ޖަހާފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން އެންމެ ފަހުން އާންމުކުރި ތަފާސް ހިސާބުތައް ދައްކާ ގޮތުން، ބުދަ ދުވަހު 429 މީހުން ވަނީ ވެކްސިންގެ ފުރަތަމަ ޑޯޒް ޖަހާފައެވެ. އެއީ މާލެ ސަރަހައްދުން ވެކްސިން ޖެހި 88 މީހަކާއި، އަތޮޅުތެރެއިން ވެކްސިން ޖެހި 341 މީހުންނެވެ.
އެއާއިއެކު ވެކްސިންގެ ފުރަތަމަ ޑޯޒު ޖެހި މީހުން އަދަދުވަނީ 310،834 (ތިން ލައްކަ ދިހަ ހާސް އަށްސަތޭކަ ތިރީސް ހަތަރެއް) އަށް އަރާފައެވެ. މީގެ އިތުރުން ބުރާސްފަތި ދުވަހު 1،216 މީހުން ވަނީ ވެކްސިންގެ ދެވަނަ ޑޯޒް ފުރިހަމަ ކޮށްފައެވެ. އެއީ މާލެ ސަރަހައްދުން ވެކްސިން ޖެހި 287 މީހުންނާއި، އަތޮޅު ތެރެއިން ވެކްސިން ޖެހި 929 މީހުންނެވެ. އެއާއެކު ވެކްސިން ފުރިހަމަ ކުރި މީހުންގެ އަދަދު ވަނީ 170،105 (އެއްލައްކަ ހަތްދިހަ ހާސް އެއްސަތޭކަ ފަހެއް) އަށް އަރާފައެވެ.
ރާއްޖޭގައި ކޮވިޝީލްޑްގެ އިތުރުން ފައިޒަރ އަދި ސިނޮފަރމް ވެކްސިނަށް ހުއްދަ ދީފައިވާއިރު، މޯލްޑިވްސް ފުޑް އެންޑް ޑްރަގް އޮތޯރިޓީ (އެފްޑީއޭ)އިން ވަނީ ރަޝިއާގެ ސްޕަޓްނިކް ވެކްސިން ވެސް ރާއްޖޭގައި ބޭނުން ކުރުމުގެ ހުއްދަ ދީފައެވެ. މިވަގުތު ރާއްޖޭގައި ޖަހަމުން އަންނަނީ ފައިޒާ، ސިނޮފާމް، އަދި ކޮވިޝީލްޑް ވެކްސިނެވެ.
ކޮވިޝީލްޑް ވެކްސިންގެ ދެވަނަ ޑޯޒު އެންމެނަށް ނުޖެހެނީސް އެ ވެކްސިން ހުސްވެފައިވާއިރު، އެ ވެކްސިން ދެން ލިބޭނެ ދުވަހެއް ނޭނގޭ ކަމަށް އެޗްޕީއޭއިން ވަނީ ބުނެފައެވެ. ބަދަލުގައި އެސްޓްރަޒެނެކާ ވެކްސިން ޖެހޭނެ ކަމަށް ބުނެފައިވާއިރު އެ ވެކްސިން ގެނައުމުގެ މަސައްކަތްކުރަމުން އަންނަ ކަމަށް ބުނެފައިވެއެވެ. އެކަމަކު އަންނަ މަހުގެ ފުރަތަމަ ހަފްތާގައި ވެސް ވެކްސިން ނުލިބޭނެ ކަމަށް ހެލްތު މިނިސްޓަރ ނަސީމް ވިދާޅުވެފައިވެއެވެ.
މިދިޔަ ފެބްރުއަރީ 1 ވަނަ ދުވަހުން ފެށިގެން ކޮވިޝީލްޑް ވެކްސިން ޖަހަން ފަށާފައިވާއިރު، އޭގެ ދެވަނަ ޑޯޒް ޖެހޭނީ ވެކްސިން ޖަހާތާ 8 ހަފްތާއާއި 16 ހަފްތާއާ ދެމެދުގެ މުއްދަތެއްގައެވެ.
