އަމިއްލަ ގޮތުން އިންތިޚާބުވި ކައުންސިލަރަކު އެމްޑީޕީއަށް ސޮއިކޮށްފި
ސޮއިކުރީ ހުކުރު ދުވަހު ރޭ
އަބްދުﷲ ރަޝީދު އެމްޑީޕީގެ މެމްބަރޝިޕް ފޯމުގައި ސޮއިކުރަނީ
ނިމިގެންދިޔަ ލޯކަލް ކައުންސިލް އިންތިޚާބުގައި އަމިއްލަ ގޮތުން ވާދަކޮށް އިންތިޚާބު ކާމިޔާބުކުރެއްވި ކައުންސިލަރު އިދިކޮޅު އެމްޑީޕީއަށް ސޮއި ކުރައްވައިފިއެވެ.
އިދިކޮޅު އެމްޑީޕީއަށް ސޮއި ކުރައްވާފައިވަނީ ނިމިދިޔަ އިންތިޚާބުގައި ގދ. ވާދޫ ކައުންސިލަށް އަމިއްލަ ގޮތުން ކުރިމަތިލެއްވި އަބްދުﷲ ރަޝީދެވެ. އޭނާ އެމްޑީޕީއަށް ސޮއިކުރެއްވީ ހުކުރު ދުވަހުގެ ރޭގަ އެވެ.
މިފަހަރުގެ ލޯކަލް ކައުންސިލް އިންތިޚާބުގައި އަމިއްލަ ގޮތުން 252 ކެންޑިޑޭޓުން ވާދަކޮށްފައިވާއިރު އޭގެ ތެރެއިން 101 ކެންޑިޑޭޓަކު އިންތިޚާބު ކާމިޔާބުކޮށްފައިޥަ ކަމަށް ދައްކައެވެ.
ކައުންސިލް އިންތިޚާބުގައި އަމިއްލަ ގޮތުން ވާދަކުރައްވާ ކާމިޔާބު ހޯއްދެވި ކެންޑިޑޭޓަކު އެމްޑީޕީއަށް ސޮއިކުރެއްވިއިރު، އަމިއްލަ ގޮތުން އިންތިހާބު ކާމިޔާބު ކުރެއްވި ގިނަ ކެންޑިޑޭޓުންނަކީ ޕީޕީއެމް ފިކުރަށް ތާއީދު ކުރައްވާ ކެންޑިޑޭޓުން ކަމަށް ރައީސް ޔާމިންގެ ފެކްޝަނުން ބުނެފައިވެއެވެ.
މިދިޔަ ހޮނިހިރު ދުވަހު ބޭއްވި ލޯކަލް ކައުންސިލް އިންތިހާބުގައި އަމިއްލަ ގޮތުން ކުރިމަތިލެއްވި ކެންޑިޑޭޓުންގެ ތެރެއިން އިންތިޚާބު ކާމިޔާބުކުރެއްވި އެހެން އެއްވެސް ކެންޑިޑޭޓެއް އެއްވެސް ޕާޓީއަކަށް ސޮއިކުރިކަން މިހާތަނަށް އެނގިފައެއް ނުވެއެވެ.
