ބީއެމްއެލްގެ ކާޑު ސިސްޓަމް އަޕްގްރޭޑްކުރާތީ މުހިންމު މުއާމަލާތްތައް ކުރިން ނިންމުމަށް ބީއެމްއެލުން އިލްތިމާސްކޮށްފި

ބޭންކް އޮފް މޯލްޑިވްސްގެ ކާޑު ސިސްޓަމް އަޕްގްރޭޑް ކުރުމުގެ މަސައްކަތް ކުރިއަށް ގެންދާތީ ކާޑު ބޭނުންކޮށްގެން ހިންގޭ ހުރިހާ ޚިދުމަތެއް ވަގުތީ ގޮތުން މެދުކަނޑާލެވޭނެ ކަމަށް ބޭންކު އޮފް މޯލްޑިވްސް (ބީއެމްއެލް)އިން ބުނެފިއެވެ.

ބީއެމްއެލުން ބުނީ ކާޑު ސިސްޓަމް އަޕްގްރޭޑް ކުރުމުގެ މަސައްކަތް ކުރިއަށް ގެންދިޔުމަށް ބުރާސްފަތި ދުވަހުގެ ރޭ 10:00ން ފެށިގެން ހުކުރު ދުވަހުގެ ހެނދުނު 9:00ށް، ކާޑު ބޭނުންކޮށްގެން ހިންގޭ ހުރިހާ ޚިދުމަތެއް ވަގުތީ ގޮތުން މެދުކަނޑާލެވޭނެ ކަމަށެވެ.

Advertisement

މިކަމާ ގުޅޭ ގޮތުން ބީއެމްއެލްގެ މެނޭޖަރ ޕަބްލިކް ރިލޭޝަންސް މުހައްމަދު ސައީދު ވިދާޅުވީ ކަސްޓަމަރުންނަށް ދެމުންދާ ބޭންކިންގ ޚިދުމަތުގެ ފެންވަރު ރަނގަޅުކުރުމަށް ބޭންކުން ކުރަމުންދާ މަސައްކަތުގެ ދަށުން ކުރިއަށް އޮތް ތާނގައި ޚިދުމަތަށް ގެންނަން ބޭނުންވާ މުހިންމު ބަދަލުތައް ގެނައުމަށާއި މި ސިނާއަތުގައި ކަނޑައެޅިފައިވާ މިންގަޑުތަކާ އެއްގޮތަށް ހަރުދަނާ ކަމާއެކު ޚިދުމަތް ދިނުމުގެ ގޮތުން  ކުރެވޭ މުހިންމު މަސައްކަތެއް ކަމަށެވެ. މި މަސައްކަތްކުރުމަށް ވަގުތު ކަނޑައެޅިފައި މިވަނީ ކަސްޓަމަރުންނަށް ވީހާވެސް ދަތިތަކާ ދިމާނުވާނެހެން ބަލާފައި ކަމަށް ސައީދު ވިދާޅުވިއެވެ.

މެދުކެނޑިގެންދާ ޚިދުމަތްތަކާއި ބެހޭ ގޮތުން ސައީދު ވިދާޅުވީ މި މަސައްކަތްތައް ކުރެވެމުންދާ ވަގުތުގައި ރާއްޖެއާއި ރާއްޖޭން ބޭރުގައި ދެމުންދާ އެންމެހާ ކާޑުގެ ޚިދުމަތްތައް ވަގުތީ ގޮތުން މެދުކެނޑޭނެ ކަމަށެވެ. އެހެންކަމުން އޭޓީއެމް، ޕީއޯއެސް، އެމްޕޮސް، މަރޗަންޓް ޕޯޓަލް، ޕޭމަންޓް ގޭޓްވޭގެ އިތުރުން މޮބައިލް ޕޭ ގެ ޚިދުމަތާއި ބީއެމްއެލް އިން ދޫކޮށްފައިވާ ކްރެޑިޓް ކާޑަށް ފައިސާ ދެއްކުމާއި ފައިސާ ފޮނުވުމުގެ އިތުރުން ޑިޖިޓަލް ޕިންގެ ޚިދުމަތް ވެސް މެދު ކެނޑޭނެ ކަމަށް ސައީދު ވިދާޅުވިއެވެ.

މީގެ އިތުރުން ސައީދު ވިދާޅުވީ ކާޑުގެ ޚިދުމަތްތައް މެދުކެނޑިގެން ދާ ވަގުތުގައިވެސް އިންޓަރނެޓް ބޭންކިންގ އާއި މޮބައިލް ބޭންކިންގެ ޚިދުމަތް ލިބޭނެ ކަމަށެވެ. އެހެން ކަމުން ކަސްޓަމަރުންނަށް އެކައުންޓް ބެލެންސް ޗެކް ކުރުމާއި، އެކައުންޓުން ފައިސާ ޓްރާންސްފަރ ކުރުމާއި އެކައުންޓް ހިސްޓްރީވެސް ޗެކް ކުރެވޭނެ ކަމަށެވެ. އަދި އިންޓަރނެޓް ބޭންކިންގ މެދުވެރިކޮށް ޚިދުމަތްތަކަށް އެދި ހުށަހެޅުމާއި ބޭންކަށް މެސެޖް ނުވަތަ މެއިލްވެސް ފޮނުވޭނެ ކަމަށް ބީއެމްލުން ބުނެއެވެ.

ބީއެމްއެލުން ބުނީ މި މަސައްކަތްކުރުމަށް ވަގުތު ކަނޑައެޅިފައި މިވަނީ ކަސްޓަމަރުންނަށް ވީހާވެސް ދަތިތަކާ ދިމާނުވާނެހެން ބަލާފައި ކަމަށެވެ. ނަމަވެސް މިވަގުތާ ދިމާކޮށް ކާޑު ބޭނުންކޮށްގެން މުއާމަލާތެއް ކުރަންޖެހޭ ނަމަ އެ މުއާމަލާތެއް ކުރިން ނިންމުމަށް ވަނީ އިލްތިމާސްކޮށްފައެވެ.

އެގޮތުން ހޮޓަލަކުން ޗެކް-އައުޓް ވާންޖެހޭ ވަގުތު ފައިސާ ދައްކަން ޖެހޭ ހާލަތެއް މެދުވެރިވާނަމަ، ނުވަތަ އޭޓީއެމް އިން ފައިސާ ނެގުން ފަދަ ކަންކަން ކުރީބައިގައި ނިންމުމަށް އެދިފައިވެއެވެ. އަދި އޮންލައިންކޮށް ފައިސާ ދައްކަން ޖެހޭ ފްލައިޓް ޓިކެޓް، ބިލް ނުވަތަ ސަބްސްކްރިޕްޝަނެއްގެ ސުންގަޑި ހަމަވާނަމަ އެކަންވެސް ކުރިން ނިންމުމަށް އިލްތިމާސްކޮށްފައިވެއެވެ.

އަޕްގްރޭޑްގެ މަސައްކަތް ނިމުމުން ކުރިއެކޭ އެއްގޮތަށް ޚިދުމަތްތައް ދެމުންދާނެކަން ބީއެމްލުން ހާމަކޮށްފައިވެއެވެ.