ބަންގްލަދޭޝްގެ ޗީފް އޮފް އާމީ ސްޓާފް ރާއްޖޭގައި
މިދަތުރުފުޅު ނިންމަވާލެއްވުމަށްފަހު އެނބުރި ގައުމަށް ވަޑައިގަންނަވާނީ ޖޫން ހަވަނަ ދުވަހު
ބަންގްލަދޭޝްގެ ޗީފް އޮފް އާމީ ސްޓާފް، ޖެނެރަލް އަޒީޒް އަހްމަދަށް ޗީފް އޮފް ޑިފެންސް ފޯސް، މޭޖާރ ޖެނެރަލް އަބްދުﷲ ޝަމާލް ވީއައިއޭ އިން މަރުހަބާ ދަންނަވަނީ
ބަންގްލަދޭޝްގެ ޗީފް އޮފް އާމީ ސްޓާފް، ޖެނެރަލް އަޒީޒް އަހްމަދު ރަސްމީދަތުރުފުޅެއްގައި ރާއްޖެ ވަޑައިގެންފިއެވެ.
ޖެނެރަލް އަޒީޒް ރާއްޖެ ވަޑައިގެންފައި ވަނީ ބުދަ ދުވަހުގެ ހެނދުނުގެ ވަގުތެއްގައެވެ. އެމަނިކުފާނަށް މަރުހަބާ ދެންނެވުމަށް ޗީފް އޮފް ޑިފެންސް ފޯސް، މޭޖާރ ޖެނެރަލް އަބްދުﷲ ޝަމާލް އާއި އެމްއެންޑީއެފް ސާވިސްކޯގެ ކޮމާންޑަންޓް ބްރިގޭޑިއަރ ޖެނެރަލް ހާމިދު ޝަފީގުގެ އިތުރުން މިނިސްޓްރީ އޮފް ފޮރިން އެފެއަރޒްގެ ޗީފް އޮފް ޕްރޮޓޮކޯލް އައިޝަތު ޝާން ޝާކިރު އަދި ބަންގްލަދޭޝްއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ރިއަރ އެޑްމިރަލް ހަޒްމުލް ހަސަން ވަނީ ވެލާނާ އިންޓަނޭޝަނަލް އެއަރޕޯޓަށް ވަޑައިގެންފައެވެ.
ބަންގްލަދޭޝްގެ ޗީފް އޮފް އާމީ ސްޓާފްގެ މިދަތުރުފުޅުގައި ރާއްޖޭގެ މިނިސްޓަރ އޮފް ޑިފެންސް މާރިޔާ އަހްމަދު ދީދީ އާއި ޗީފް އޮފް ޑިފެންސް ފޯސް، މޭޖާރ ޖެނެރަލް އަބްދުﷲ ޝަމާލް އަދި ވައިސް ޗީފް އޮފް ޑިފެންސް ފޯސް، ބްރިގޭޑިއަރ ޖެނެރަލް އަބްދުއްރަހީމް އަބްދުއްލަތީފާ ބައްދަލުކުރައްވަން ވަނީ ހަމަޖެހިފައެވެ.
ޖެނެރަލް އަޒީޒްގެ މިދަތުރުފުޅަކީ ފަސް ދުވަހުގެ ދަތުރުފުޅެކެވެ. މި ދަތުރުފުޅު ނިންމަވާލެއްވުމަށްފަހު އެނބުރި ގައުމަށް ވަޑައިގަންނަވާނީ ޖޫން ހަވަނަ ދުވަހުއެވެ.
ބަންގްލަދޭޝްގެ އަސްކަރިއްޔާއިން އެމްއެންޑީއެފް އަށް ގިނަ ރޮނގުރޮނގުން އެހީތެރިކަން ފޯރުކޮށްދީފައިވާއިރު، ކޮވިޑް-19 އާ އެކު ރާއްޖެއަށް ދިމާވި ގޮންޖެހުންތަކުން އަރައިގަތުމަށް ބަންގްލަދޭޝްގެ އަސްކަރިއްޔާގެ ފަރާތުން ގިނަ އެހީތަކެއް ވަނީ އެމްއެންޑީއެފްއަށް ލިބިފައެވެ. އެގޮތުން ކޮވިޑާއެކު ނޭޕާލްގައި ތާށިވެފައި ތިބި ދިވެހި ކިޔަވާކުދިން ރާއްޖެ ގެނަސްދިނުމާއި ރާއްޖޭގެ ސިއްހީ ދާއިރާއަށް އެހީތެރިކަން ފޯރުކޮށްދިނުމުގެ ގޮތުން ބަންގްލަދޭޝް އަސްކަރިއްޔާގެ މެޑިކަލް ޓީމެއް ދަނީ މިހާރު ވެސް ރާއްޖޭގައި ހަރަކާތްތެރިވަމުންނެވެ.
