ހައްޖަށް ދިޔުމަށް ރާއްޖެއަށް ކޯޓާ ލިބޭކަމެއް އަދި ނޭނގެ: އިސްލާމިކް މިނިސްޓްރީ
2 ޖޫން 2021 | ބުދަ 05:36ސައުދީ އަރަބިއްޔާއިން މި ފަހަރު ހުޅުވާލާ 60،000 ޖާގަ
ހައްޖު 1441 - ގައިދުރުކަމުގައި ހައްޖުގެ އަޅުކަން އަދާކުރަނީ
ހައްޖަށް މީހުން ގެންދިއުމުގެ ހުއްދަ ސައުދީން ބޭރު ގައުމުތަކަށް ދީފައިވީ ނަމަވެސް ހައްޖަށް ދިޔުމަށް ރާއްޖެއަށް ކޯޓާ ލިބޭނެކަން ނުވަތަ ނުލިބޭކަން ވެސް އަދި ނޭނގޭ ކަމަށް އިސްލާމިކް މިނިސްޓްރީން ބުނެފިއެވެ.
ރާއްޖެއެމްވީއަށް މައުލޫމާތު ދެމުން އެ މިނިސްޓްރީން ބުނީ ހައްޖުގެ އަޅުކަން އަދާކުރުމަށް ސައުދީ އަރަބިއްޔާއިން މި ފަހަރު ހުޅުވާލަނީ 60،000 ޖާގަ ކަމަށާއި ރަސްމީކޮށް އަދި ކޯޓާ ލިބޭކަން ނުވަތަ ނުލިބޭކަން ވެސް އަންގާފައިނުވާ ކަމަށެވެ. އަދި ކޮންމެ ގައުމަކުން ވެސް ހައްޖަށް މީހުންނަށް ދެވޭނީ ސައުދީގެ ހައްޖު އެންޑް އުމްރާ މިނިސްޓްރީއާ އެކު އެއްބަސްވުމެއްގައި ސޮއިކޮށްގެން ކަމަށް ބުންޏެވެ. އަދި ރާއްޖެއަށް ވެސް އޮންނާނީ އެ އުސޫލު ކަމަށާއި، ގައުމުތަކަށް ހުއްދަ ދޭން ނިންމި ނަމަވެސް ހުއްދަ ދެނީ ކޮން ގައުމުތަކަކަށް ކަމާއި ކިހާ މީހުންނަކަށް ކަމެއް އަދި ނޭނގޭ ކަމަށް ވެސް އެ މިނިސްޓްރީން ބުންޏެވެ.
ކޮވިޑް-19އާ ގުޅިގެން ހައްޖުގައި ވެސް ޚާއްސަ ފިޔަވަޅުތަކެއް އަޅައި ގައިދުރުކަން ބަހައްޓަން ސައުދީން ނިންމާފައިވެއެވެ. އެހެންވެ ހުރިހާ ގައުމަކަށް ހުއްދަ ލިބޭނެ ކަމަށް ނުބެލެވޭ ކަމަށާއި، އެހެން އަހަރުތަކާ އަޅައިބަލާއިރު، ކޯޓާ ވެސް މަދުވާނެ ކަމަށް ބެލެވޭ ކަމަށެވެ. އާންމުކޮށް ހައްޖަށް ދާން 1000 ކޯޓާ ދޭ ކަމަށާއި، ކޮވިޑް ގެ ސަބަބުން މި އަހަރު އެ ކޯޓާ މަދުވާނެ ކަމަށް ބެލެވޭ ކަމަށް އިސްލާމިކް މިނިސްޓްރީން ބުންޏެވެ.
ހައްޖުގެ ފުރުސަތު އެހެން ގައުމުތަކަށް ހުޅުވާލުމާ ގުޅޭގޮތުން ސައުދީގެ ހައްޖު އެންޑް އުމްރާ މިނިސްޓްރީން ބުނީ ކޮވިޑާ ގުޅިގެން ޚާއްސަ ފިޔަވަޅުތަކެއް އަޅަންޖެހޭ ކަމަށާއި ހައްޖުވެރިން އަމަލުކުރަން ޖެހޭ އުސޫލުތައް ކަނޑައެޅުމަށްޓަކައި ގުޅުން ހުރި އިދާރާތަކާ މަޝްވަރާ ކުރަންމުން އަންނަ ކަމަށެވެ. ހައްޖަށް ފުރުސަތުދެވޭ ގައުމުތަކާއި ބައިވެރިންގެ އަދަދާ މެދުވެސް މަޝްވަރާތައް ކުރިއަށްދާނެ ކަމަށް ވަނީ ބުނެފައެވެ.
އިސްލާމިކް މިނިސްޓްރީން ބުނީ ހައްޖުގެ އަޅުކަމަށް ސައޫދީއަށް އެތެރެވާ މީހުން އަމަލުކުރަން ޖެހޭ ގަވާއިދެއް އާންމުކުރާނެ ކަމަށާއި ހައްޖުވެރިންގެ ސިއްހަތަކީ އޮތް އެންމެ ބޮޑު ކަންބޮޑުވުން ކަމަށެވެ. ސައޫދީ އަރަބިއްޔާއިން ބޭރު ގައުމުތަކަށް ހައްޖު ކެންސަލްކުރަން ވިސްނަމުން އަންނަ ކަމަށް ރޮއިޓާސްއިން މިދިޔަ ހަފްތާގައި ރިޕޯޓުކޮށްފައިވެއެވެ. ސަބަބެއް ކަމަށް ބުނެފައި ވަނީ ގައުމުތަކުގައި އަދި ވެސް ކޮވިޑް ކޮންޓްރޯލްކުރެވިފައި ނުވާތީއެވެ.
ސައުދީން މިދިޔަ އަހަރު ވެސް ބޭރު ގައުމުތަކަށް ހައްޖުވުމުގެ ފުރުޞަތު ހުޅުވާލާފައެއް ނުވެއެވެ. މިދިޔަ އަހަރު ހައްޖުގައި ބައިވެރިކުރީ އެގައުމުގައި ތިބި 1،000 މީހުންނާއި، ޚާއްސަ ދައުވަތު ދިން ފަރާތްތަކެވެ.
