އެސްޓީއޯގެ ހިއްސާއަކަށް 60 ރުފިޔާ ބަހަން ނިންމައިފި
31 މެއި 2021 | ހޯމަ 16:24އެސްޓީއޯގެ ޑިރެކްޓަރުންގެ ބޯޑަށް އާންމުންގެ ފަރާތުން އިންތިޚާބުކޮށްފައި ވަނީ އާމިނަތު ރުޝްމާ
އެސްޓީއޯ
ސްޓޭޓް ޓްރޭޑިންގ އޮގަނައިޒޭޝަން (އެސްޓީއޯ)އަށް 2020 ވަނަ އަހަރު ލިބުނު ފައިދާ އިން ހިއްސާއަކަށް 60 ރުފިޔާ ބަހަން، އެކުންފުނީގެ އަހަރީ އާންމު ޖަލްސާއިން ފާސްކޮށްފިއެވެ.
ހޯމަ ދުވަހުގެ ހަވީރު އޮންލައިންކޮށް ކުރިއަށް ގެންދިޔަ ޖަލްސާގައި، ހިއްސާގެ ފައިދާ ބަހާނެ އަދަދު ފާސްކޮށްފައިވާއިރު، ފާއިތުވި އަހަރު އެސްޓީއޯ އަށް ވަނީ އާމްދަނީގެ ގޮތުގައި 8.5 ބިލިއަން ރުފިޔާ ލިބިފައެވެ. އަދި ސާފު ފައިދާގެ ގޮތުގައި އެކުންފުންޏަށް ވަނީ 127 މިލިއަން ރުފިޔާ ލިބިފައެވެ.
މި ޖަލްސާގައި ވަނީ، ކުރިއަށް އޮތް އަހަރަށް އެސްޓީއޯގެ ޑިރެކްޓަރުންގެ ބޯޑަށް އާންމުންގެ ފަރާތުން އާމިނަތު ރުޝްމާ އިންތިޚާބުކޮށްފައެވެ. ރުޝްމާ ވަނީ ފާއިތުވި ދެ އަހަރުވެސް އެސްޓީއޯގެ ބޯޑުގައި އާންމު ހިއްސާދާރުން ތަމްސީލު ކޮށްފަ އެވެ.
އެސްޓީއޯގެ އެކްސްޓާނަލް އޮޑިޓަރެއްގެ ގޮތުގައި ޕްރައިސް ވޯޓާ ހައުސްކޫޕާސް ކަނޑައަޅާފައިވާއިރު، 2019 ވަނަ އަހަރުގެ އަހަރީ އާންމު ޖަލްސާގެ ޔައުމިއްޔާ އާއި 2020 ވަނަ އަހަރުގެ ޑިރެކްޓަރުންގެ ރިޕޯޓު އަދި މާލީ ރިޕޯޓުވެސް ވަނީ މިޖަލްސާގައި ފާސްކޮށްފައެވެ.
މިޖަލްސާގައި ވާހަކަދައްކަވަމުން އެސްޓީއޯގެ މެނޭޖިން ޑިރެކްޓަރ ހުސެއިން އަމްރު ވަނީ، ކުންފުނީގެ އަމާޒަކީ ރާއްޖޭގެ ފުޑް ސެކިއުރިޓީ ކަށަވަރުކުރުމަށް މަސައްކަތްކުރުން ކަމަށާއި، ރާއްޖޭގައި ގޮދަންފުށް ފެކްޓްރީއެއް ގާއިމުކުރުމަކީ މިކަން ހާސިލުކުރުމުގެ އެއް އަމާޒުކަމަށް ވިދާޅުވެފައެވެ.
