ކޮޕާ އެމެރިކާ އާޖެންޓީނާގައިވެސް ނުބޭއްވޭނެ

އަންނަ ޖޫން މަހު ފެށުމަށް ހަމަޖެހިފައިވާ ދެކުނު އެމެރިކާގެ އެންމެ ޝަރަފުވެރި ފުޓްބޯޅަ މުބާރާތް ކަމަށްވާ ކޮޕާ އެމެރިކާ ހޯސްޓްކުރުމުގެ ފުރުސަތު އާޖެންޓީނާއަށްވެސް ގެއްލިއްޖެއެވެ.

މި އަހަރު ބާއްވާ ކޮޕާ އެމެރިކާއަކީ މިދިޔަ އަހަރުގެ ޖޫން މަހުގެ 12 ވަނަ ދުވަހު ފެށިގެން ޖުލައި މަހުގެ 12 ވަނަ ދުވަހުގެ ނިޔަލަށް އާޖެންޓީނާ އާއި ކޮލޮމްބިއާގައި ބާއްވަން ތާވަލުކުރި މުބާރާތެވެ. އެކަމަކު ކޮވިޑް-19 އާ ގުޅިގެން މި މުބާރާތް ވަނީ މި އަހަރުގެ ހޫނު މޫސުމަށް ފަސްކޮށްފައެވެ.

އެހެންކަމުން މީގެ ކުރިން ތާވަލުކޮށްފައިވަނީ ކޮޕާ އެމެރިކާ އަންނަ ޖޫން މަހުގެ 13 ވަނަ ދުވަހު ފެށިގެން ޖުލައި މަހުގެ 10 ވަނަ ދުވަހުގެ ނިޔަލަށް އާޖެންޓީނާ އާއި ކޮލޮމްބިއާގައި ބޭއްވުމަށެވެ. އޭރު ތާވަލުކޮށްފައި އޮތް ގޮތުން ގްރޫޕް އޭގެ މެޗުތައް ކުޅޭނީ އާޖެންޓީނާގައެވެ. އަދި ގްރޫޕް ބީގެ މެޗުތައް ކުޅޭނީ ކޮލޮމްބިއާގައެވެ. އަދި އެއަށްފަހު މުބާރާތުގެ ފައިނަލް މެޗު ކުޅުމަށް ހަމަޖެހިފައި އޮތީ ކޮލޮމްބިއާގެ މެޓްރޯ ސްޓޭޑިއަމުގައެވެ.

އެކަމަކު ކޮލަމްބިއާގައި ކޮވިޑުގެ ނުރައްކާ ބޮޑުވެފައިވާއިރު، އެ ގައުމުގައި ކުރިއަށްދާ ހަޅުތާލުގެ ސަބަބުން ކޮންމެބޯލްއިން މީގެ ކުރިން ވަނީ މި މުބާރާތް އެ ގައުމުގައި ނުބާއްވަން ނިންމާފައެވެ. އެއާއެކު ކޮޕާ އެމެރިކާގެ މުޅި މުބާރާތް އާޖެންޓީނާގައި ބާއްވާނެ ކަމަށް ބެލެވުނު ނަމަވެސް، ހޯމަ ދުވަހު ކޮންމެބޯލްއިން ވަނީ އާޖެންޓީނާގައިވެސް މުބާރާތް ނުބޭއްވޭނެކަން އިއުލާން ކޮށްފައެވެ.

ކޮވިޑުގެ ނުރައްކާ ބޮޑުވެ އާޖެންޓީނާ ސަރުކާރުން މި މަހުގެ ނިޔަލަށް އެ ގައުމު ލޮކްޑައުނަކަށް ދާން މީގެ ކުރިން ވަނީ ނިންމާފައެވެ. އަދި އެ އަށް ބޯލެނބުމުގެ ގޮތުން އާޖެންޓީނާގެ ފުޓްބޯޅައިގެ ރަސްމީ ހުރިހާ ހަރަކާތްތައް ސަސްޕެންޑްކުރަން އާޖެންޓީނާ ފުޓްބޯލް އެސޯސިއޭޝަން (އޭއެފްއޭ) އިން މި މަހުގެ 21 ވަނަ ދުވަހު ނިންމިއެވެ. އޭރު އޭއެފްއޭއިން ނިންމީ ހާއްސަ ހުއްދައިގެ ދަށުން ކޮޕާ އެމެރިކާ ބޭއްވުމަށެވެ. އެކަމަކު މިހާރު އެ ހުއްދަ ނެތުމުން މުބާރާތް ބޭއްވުމުގެ ފުރުސަތު އާޖެންޓީނާއަށްވެސް ވަނީ ގެއްލިފައެވެ.

ރިޕޯޓުތައް ބުނާ ގޮތުން މި ނިންމުންތަކާ ގުޅިގެން މި އަހަރުވެސް ކޮޕާ އެމެރިކާ ނުބާއްވާނެއެވެ. ނުވަތަ މުބާރާތް ފަށާ ދުވަސް ފަސްކުރުންވެސް އެކަށީގެންވާ ކަމަށް ރިޕޯޓުތައް ބުނެއެވެ. ކޮޕާ އެމެރިކާ ބޭއްވުމާ މެދު ސުވާލު އުފެދިފައިވާއިރު، މި މުބާރާތަށް ތައްޔާރުވުމަށް ގިނަ ގައުމުތަކުން ވަނީ ސްކޮޑް އިއުލާނުކޮށް، ފަރިތަކުރުންތައް ފަށާފައެވެ.