ނިއު ރޭޑިއަންޓާއި ވިކްޓަރީގެ ސަސްޕެންޝަން އަނެއްކާވެސް ދަމަހައްޓައިފި

ކުޅުންތެރިންގެ މުސާރައިގެ މައްސަލައިގަައި ދިވެހި ފުޓްބޯޅައިގެ މަޝްހޫރު ދެ ކުލަބު ކަމަށްވާ ނިއު ރޭޑިއަންޓް ސްޕޯޓްސް ކުލަބާއި ވިކްޓަރީ ސްޕޯޓްސް ކުލަބަށް ދީފައިވާ ސަސްޕެންޝަން އަނެއްކާވެސް ދަމަހައްޓައިފިއެވެ.

ފުޓްބޯޅައިގެ ހުރިހާ ހަރަކާތަކުން ނިއު ރޭޑިއަންޓް ސަސްޕެންޑް ކުރަން އެފްއޭއެމުން ނިންމާފައިވަނީ ކުޅުންތެރިންނަށް މުސާރަ ނުދޭ ކަމަށް 2019 ވަނަ އަހަރުގެ ޖެނުއަރީ މަހުގެ ތެރޭގައެވެ. އަދި ފުރަތަމަ ޑިވިޝަނުގައި ވާދަކުރަމުން އައި އެންމެ ޒަމާންވީ ކުލަބު ކަމަށްވާ ވިކްޓަރީ ސަސްޕެންޑް ކުރީ އެ ކުލަބުން ކުޅުންތެރިންނާއި ކޯޗުންނަށް ނުދީ ހުރި މުސާރަ ދިނުމަށާއި، ކުލަބު ލައިސަންސްގެ ކަންކަން ފުރިހަމަކުރަން އެފްއޭއެމުން ދިން މުއްދަތުގައި އެކަންކަންކޮށްފައި ނުވާތީ ހަމަ އެ އަހަރުގެ ޑިސެމްބަރު މަހުގެ ތެރޭގައެވެ. މި ސަސްޕެންޝަނުތަކުގެ ސަބަބުން ނިއު އާއި ވިކްޓަރީ މިހާރު ވަނީ ދެވަނަ ޑިވިޝަނަށް ރެލިގޭޓް ވެފައެވެ.

އެއަށްފަހު މިހާތަނަށް ބޭއްވި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ހުރިހާ އަހަރީ އާންމު ޖަލްސާއެއްގައި ކުލަބުތަކުން ވަނީ އެ ދެ ކުލަބުގެ ސަސްޕެންޝަން ދަމަހައްޓާފައެވެ. އެގޮތުން އާދީއްތަ ދުވަހު ކުރިއަށްދިޔަ އެފްއޭއެމުގެ މި އަހަރުގެ އަހަރީ އާންމު ޖަލްސާގައި 22 ކުލަބުންވެސް ވަނީ ނިއު ރޭޑިއަންޓާއި ވިކްޓަރީގެ ސަސްޕެންޝަން ދަމަހައްޓަން ތާއީދުކޮށްފައެވެ.

މީގެ ކުރިން ރާއްޖެ ޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަވަމުން ބައްސާމް ވަނީ އެ ދެ ކުލަބުގެ ސަސްޕެންޝަން އުވާލައި، އެކަމުން ސަލާމަތް ކުރުމަށް އެފްއޭއެމުގެ ރައީސްގެ ހައިސިއްޔަތުން ވަރަށް ގިނަ މަސައްކަތްތަކެއް ކުރެއްވި ކަމަށް ވިދާޅުވެފައެވެ. އަދި އެކަމަށް ގޮތެއް ނުނިމި އޮތީ އެ ކުލަބުތަކުން އެއްބާރުލުން ނުދިނުމުގެ ސަބަބުން ކަމަށް ބައްސާމް ވިދާޅުވިއެވެ.

އަދި ބޮޑެތި ނަން މަޝްހޫރު ކުލަބުތަކުން މުބާރާތްތަކުގައި ވާދަކުރާތަން ފެންނަން ބޭނުންވާ ކަމަށާއި، އެހެން ނަމަވެސް ކޮންމެ ކުލަބެއްވެސް ހިންގަން ވާނީ ހެދިފައިވާ ގަވާއިދުތަކާއި އުސޫލުތަކުގެ ތެރެއިން ދައްކަން ޖެހޭ ފައިސާގެ ދަރަންޏެއް އޮތް ނަމަ، އެ ދަރަނި އަދާކޮށްގެން ކަމަށްވެސް ބައްސާމް ވަނީ ވިދާޅުވެފައެވެ.

ފުޓްބޯޅައިގެ ހުރިހާ ހަރަކާތަކުން ނިއު ރޭޑިއަންޓް ސަސްޕެންޑް ކޮށްފައިވާއިރު، އެ ކުލަބުން ދިވެހި ކުޅުންތެރިންނަށް މުސާރައިގެ ގޮތުގައި 2.4 މިލިޔަން ރުފިޔާ ދޭން އޭރު ޖެހުނެވެ. އެކަމަކު އެފްއޭއެމުގައި ހުރި ނިއު ރޭޑިއަންޓުގެ ފައިސާއިން ދިވެހި ކުޅުންތެރިންނަށް ވަނީ މުސާރަ ދީފައެވެ. އެކަމަކު އަފްގާނިސްތާނުގެ ޑިފެންޑަރު ހާރޫން އަމީރީއަށް މުސާރައިގެ ގޮތުގައި އަދި އުސޫލުން ބޭރުން އެއްބަސްވުން ބާތިލުކޮށްފައިވާތީ 703،707 (ހަތް ލައްކަ ތިންހާސް ހަތްސަތޭކަ ހަތް) ރުފިޔާ ދޭން ދުނިޔޭގެ ފުޓްބޯޅައާ ބެހޭ މައި ޖަމުއިއްޔާ (ފީފާ) އިން ވަނީ ނިއު ރޭޑިއަންޓަށް އަންގާފައެވެ. އަދި ކުރީގެ ކޯޗު ބެނާޑޯ ޓަވަރޭޒަށް 511،342 (ފަސް ލައްކަ އެގާރަހާސް ތިންސަތޭކަ ސާޅީސް ދޭއް) ރުފިޔާ ދޭންވެސް ވަނީ އަންގާފައެވެ. އެކަމަކު ޖޫރިމަނާ އާއެކު މި އަދަދުތައް މިހާރު އެތައް ގުނައެއް ބޮޑުވާނެ ކަމަށް ގަބޫލުކުރެވޭއިރު، މީގެ ކުރިން ފީފާއިންވެސް ވަނީ ނިއު ސަސްޕެންޑްކޮށްފައެވެ.