މީރާގެ އަތޮޅުތެރޭގެ ޚިދުމަތްތަކަށް ބަދަލުގެނެސްފި
ޖޫން މަހުގެ 10 ވަނަ ދުވަހާއި ހަމައަށް އަތޮޅުތަކުގައި ހުރި މީރާގެ ކަލެކްޝަން ސެންޓަރުތަކުން ނަގުދު ފައިސާ ބަލައިނުގަންނާނެ
ނިއު ނޯމަލްގައި މީރާއިން މަސައްކަތް ކުރަމުންދާ ގޮތް
ޖޫން މަހުގެ 10 ވަނަ ދުވަހާއި ހަމައަށް އަތޮޅުތަކުގައި ހުރި މީރާގެ ކަލެކްޝަން ސެންޓަރުތަކުން ނަގުދު ފައިސާ ބަލައިނުގަންނާނެކަމަށް އެ އިދާރާއިން ބުނެފިއެވެ.
މި ފިޔަވަޅު އެޅީ ކޮވިޑް-19 ފެތުރުން އިތުރުވުމާއެކު މޯލްޑިވްސް އިންލެންޑް ރެވެނިއު އޮޓޯރިޓީ، މީރާގެ ކަސްޓަމަރުންނާއި މުވައްޒަފުންގެ ސަލާމަތާއި ރައްކާތެރިކަމަށްޓަކައި ކަމަށް މިރާއިން ބުނެއެވެ. އެގޮތުން މެއި 30ން ފެށިގެން އަންނަ މަހުގެ 10 ވަނަ ދުވަހާއި ހަމައަށް މީރާގެ އަތޮޅުތަކުގެ އޮފީސްތަކުން ނަގުދު ފައިސާއާއި ޗެކު ބަލައިގަތުން ވަގުތީގޮތުން ހުއްޓާލާފައިވާކަމަށް އެ އިދާރާއިން ބުނެއެވެ. މި މުއްދަތުގައި މީރާއިން ފައިސާ ބަލައިގަތުން ކުރިއަށްދާނީ ޑެބިޓް އަދި ކްރެޑިޓް ކާޑު މެދުވެރިކޮށެވެ. އަތޮޅުތެރޭގައި އުޅޭ ޓެކްސް ދައްކާ ފަރާތްތަކަށް ފަސޭހަކޮށްދިނުމުގެ ގޮތުން މީރާގެ ކަލެކްޝަން ސެންޓަރުތައް ރާއްޖޭގެ އެކި އަތޮޅުތަކުގައި ވަނީ ގާއިމްކޮށްފައެވެ. މިހާތަނަށް މީރާއިން އަންނަނީ 17 އަތޮޅެއްގައި 18 އޮފީސް ގާއިމްކޮށް އެ އޮފީސްތައް މެދުވެރިކޮށް ޚިދުމަތް ފޯރުކޮށްދެމުންނެވެ.
މާލޭގައި ހުރި މީރާގެ ކަލެކްޝަން ސެންޓަރުންވެސް ކޮވިޑް-19އާ ގުޅިގެން ޚިދުމަތްދޭ ގޮތްތަކަށް ވަނީ ބަދަލު ގެނެސްފައެވެ. އެގޮތުން އަންނަ މަހުގެ 8 ވަނަ ދުވަހާއި ހަމައަށް މީރާގެ އޮފީސް ވަނީ ބަންދުކޮށްފައެވެ. މީރާއިން ވަނީ އެ އޮތޯރިޓީއަށް ދައްކަންޖެހޭ ޓެކުހާއި ފީތައް އެ އޮތޯރިޓީގެ އޮންލައިން ޚިދުމަތް މީރާ ކަނެކްޓް އަދި ވާރުޕޭ މެދުވެރިކޮށް ދެއްކުމުގެ އިންތިޒާމް ހަމަޖައްސާފައެވެ. އަދި މީރާއިން ފޯރުކޮށްދޭ އެހެނިހެން ޚިދުމަތްތައްވެސް އޮންލައިންކޮށް ލިބޭނެ އިންތިޒާމް ހަމަޖެހިފައިވާއިރު، ހުރިހާ ފަރާތްތަކުންވެސް އޮންލައިންކޮށް ޚިދުމަތްތައް ހޯދުމަށް މީރާއިން އިލްތިމާސްކުރެއެވެ.
