އައްޑޫ ސިޓީން އިތުރު ހަތަރު މީހަކު ކޮވިޑަށް ޕޮޒިޓިވްވެ، ޖުމްލަ އަދަދު 274ށް
މިހާތަނަށް އައްޑޫ ސިޓީން މި ބަލީގައި ދެމީހަކު ނިޔާވެފައިވޭ
އައްޑޫސިޓީ
ފާއިތުވި 24 ގަޑިއިރު އައްޑޫ ސިޓީން އިތުރު 04 މީހަކު ކޮވިޑަށް ޕޮޒިޓިވްވެ ޖުމްލަ 274ށް އަރައިފިއެވެ.
އައްޑޫ އިކުއެޓޯރިއަލް ހޮސްޕިޓަލުން ބުނީ ހުކުރު ދުވަހުގެ އިރުއޮއްސި 6:00ން ހޮނިހިރު ދުވަހުގެ އިރުއޮއްސި 6:00ށް ނެގުނު 129 ސާމްޕަލްގެ ތެރެއިން އިތުރު 4 މީހަކު ޕޮޒިޓިވްވެފައިވާ ކަމަށެވެ. މި ހަތަރު މީހުން ވެސް ޕޮޒިޓިވްވެފައިވަނީ ހިތަދޫ އިންނެވެ. 93 މީހަކު ބަލިން ރަނގަޅުވެފައިވާކަން ފާހަގަކޮށް އިކުއެޓޯރިއަލް ހޮސްޕިޓަލުން ބުނީ ސާމްޕަލް ނެގުމުގެ މަސައްކަތަށް ޚާއްސަ ސަމާލުކަމެއް ދީގެން ކުރިއަށް ގެންދާ ކަމަށާއި، މިމަސައްކަތަށް އާއްމު ރައްޔިތުންގެ ފަރާތުން ވެސް ވަރަށް ބޮޑު އެއްބާރުލުމެއް ލިބޭ ކަމަށެވެ. އެގޮތުން މިހާތަނަށް 3920 ސާމްޕަލެއް ނަގާފައިވާކަން އެ ހޮސްޕިޓަލުން ފާހަގަކުރެއެވެ.
ތަފާސްހިސާބުތަކަށް ބަލާއިރު، ފޭދޫއިން 9 މީހުން، މަރަދޫ-ފޭދޫއިން އެކަކު، މަރަދޫއިން 11، ހިތަދޫއިން 123، ރިސޯޓުތަކުން 2 މީހުން، މީދޫއިން 8 މީހުން، ހުޅުދޫއިން 24 މީހުން އަދި ގަމުން އެކަކު ބައްޔަށް ޕޮޒިޓިވްވެފައިވެއެވެ.
މިހާތަނަށް އައްޑޫ ސިޓީން މި ބަލީގައި ދެމީހަކު ނިޔާވެފައިވެއެވެ.
އައްޑޫ ސިޓީ ދެވަނަ ފަހަރަށް މޮނިޓަރިންގެ ހާލަތަށް ގެނައީ 1 މެއި ވީ ހޮނިހިރު ދުވަހުގެ ވަގުތެއްގައެވެ. އޭގެފަހުން ކޮންމެ ދުވަހަކު ވެސް އެސިޓީން ޕޮޒިޓިވް ކޭސްތައް ރިޕޯޓު ކުރެވެއެވެ. އައްޑޫގައި ކޮވިޑްގެ ހާލަތު ރަނގަޅު ނޫން ކަމަށާއި، ކޮންޓްރޯލް ކުރުމަށް އާއްމު ރައްޔިތުންގެ އެއްބާރުލުން ބޭނުންވާ ކަމަށް އައްޑޫ ސިޓީ ކައުންސިލުން ބުނެއެވެ.
ކޮވިޑް ކޮންޓްރޯލް ކުރުމުގެ ގޮތުން ވަނީ ގިނަ ފިޔަވަޅުތަކެއް އަޅާފައެވެ. އެގޮތުން ކޮންމެހެން ނުކުންނަން ޖެހިގެން މެނުވީ ނުނިކުތުމަށް އިލްތިމާސްކޮށްފައިވާއިރު، އަސާސީ ޚިދުމަތްތައް ފޯރުކޮށްދިނުމުގައި ރައްޔިތުންނަށް ލުއި ފަސޭހަވާނެ ގޮތަށް ކަންކަން އިންތިޒާމް ކުރުމުގެ މަސައްކަތް އައްޑޫ ސިޓީ ކައުންސިލުން ދަނީ ކުރަމުންނެވެ.
