ޒުވާން ޑިފެންޑަރު ކޮނާޓޭ ލިވަޕޫލަށް

އާރްބީ ލައިޕްޒީގަށް ކުޅެމުން އަންނަ ފްރާންސްގެ ޒުވާން ޑިފެންޑަރު އިބްރާހިމާ ކޮނާޓޭ ލިވަޕޫލަށް ބަދަލުވެއްޖެއެވެ.

އުމުރުން 22 އަހަރުގެ ކޮނާޓޭ، 2017 ވަނަ އަހަރު ލައިޕްޒީގާ ގުޅުނީ ފަސް އަހަރުގެ އެއްބަސްވުމެއްގެ ދަށުންނެވެ. އެހެންކަމުން އޭނާގެ އެއްބަސްވުން ހަމަވާން އޮތީ އަންނަ އަހަރުގެ ޖޫން މަހުއެވެ. ނަމަވެސް ލިވަޕޫލުން ވަނީ ލައިޕްޒީގާއެކު ކޮނާޓޭ ހަދާފައިވާ އެއްބަސްވުން އުވާލަން 35 މިލިޔަން ޕައުންޑް ދައްކާފައެވެ. ރިޕޯޓުތައް ބުނާ ގޮތުން ލިވަޕޫލާއެކު ކޮނާޓޭ 2026 ވަނަ އަހަރުގެ ޖޫން މަހުގެ ނިޔަލަށް އެއްބަސްވުން ހަދާނެއެވެ.

ލައިޕްޒީގް ދޫކޮށް ކޮނާޓޭ ލިވަޕޫލަށް ބަދަލުވިއިރު، އޭނާ ވަނީ ލައިޕްޒީގަށް 95 މެޗު ކުޅެދީ ހަތަރު ލަނޑު ޖަހާފައެވެ. އަދި މީގެ ކުރިން ލިވަޕޫލާ ދެކޮޅަށް ކުޅެން ކޮނާޓޭއަށް ދެ ފުރުސަތެއް ލިބުނު ނަމަވެސް، މި ފަހަރުގެ ޔުއެފާ ޗެމްޕިއަންސް ލީގުގެ ދެވަނަ ބުރުގައި ލިވަޕޫލާއި ލައިޕްޒީގް ބައްދަލުކުރި ދެ މެޗުގައިވެސް އޭނާ އިނީ ބެންޗުގައެވެ.

އަންނަ ސީޒަނަށް ޑިފެންސް އިތުރަށް ވަރުގަދަކުރުމުގެ ގޮތުން ލިވަޕޫލުން ކޮނާޓޭ ގެނައިރު، މި ސީޒަނުގައި ލިވަޕޫލުގެ ޑިފެންޑަރުންނަށް އަނިޔާގެ ގިނަ މައްސަލަތަކެއް ކުރިމަތިވިއެވެ. އެގޮތުން ކަކުލަށް ލިބުނު އަނިޔާގެ ސަބަބުން ލިވަޕޫލުގެ ތަޖުރިބާކާރު ޑިފެންޑަރު ވާޖިލް ވެން ޑައިކާއި ޖޯ ގޯމޭޒަށް މި ސީޒަނުގެ ބޮޑުބައި ގެއްލުނެވެ.

އެއާއެކު މިދިޔަ ފިނި މޫސުމުގެ ޓްރާންސްފާގައި ލިވަޕޫލުން ވަނީ ދެ ޑިފެންޑަރުން ގެނެސްފައެވެ. އެއީ އިނގިރޭސި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ގެ ޕްރެސްޓަންއަށް ކުޅެމުން އައި އުމުރުން 25 އަހަރުގެ ބެން ޑޭވިސް އާއި ޖަރުމަނުގެ ޝާލްކާއަށް ކުޅެމުން އައި އުމުރުން 21 އަހަރުގެ ޑިފެންޑަރު އޮޒާން ކަބަކެވެ.

މީގެތެރެއިން ކަބަކް ލިވަޕޫލާ ގުޅުނީ މި ސީޒަނުގެ ނިޔަލަށް ލޯނު އެއްބަސްވުމެއްގެ ދަށުންނެވެ. ލިވަޕޫލުން ކަބަކަށް އެއް މިލިޔަން ޕައުންޑުގެ ލޯން ފީއެއް ދެއްކިއިރު، އެ ޓީމުން ބޭނުންނަމަ މި ސީޒަނަށް ފަހު 18 މިލިޔަން ޕައުންޑް ދެއްކުމަށްފަހު ކަބަކުގެ އެއްބަސްވުން ދާއިމީ ކުރެވޭނެއެވެ. އެކަމަކު ކަބަކުގެ އެއްބަސްވުން ދާއިމީ ނުކުރަން ލިވަޕޫލުން ނިންމާފައިވާ ކަމަށް ރިޕޯޓުތައް ބުނެއެވެ.