އަގަށް ބަދަލު ގެނައީ ހުރިހާ ގިންތި އަކަށް ބަލައިގެން ކަމަށް ކޮމިއުނިކޭޝަން އޮތޯރިޓީ އޮފް މޯލްޑިވްސްގެ ސީއީއޯ އިލްޔާސް އަހްމަދު ވިދާޅުވެއްޖެއެވެ.

އިލްޔާސް ވިދާޅުވީ، މިހާރު ތައާރަފްކުރި ތިން ޕެކޭޖާއެކުވެސް ރައްޔިތުންގެ ޖީބަށް ލުއިތަކެއް ލިބިގެންދާނެ ކަމަށެވެ. ތިން ޕެކޭޖަކީ ސާމްޕަލެއްގެ ގޮތުގައި ޚިދުމަތްދޭ ފަރާތްތަކަށް ދިން ޕެކޭޖްތަަކެއް ކަމަށާއި، މިޕެކޭޖްތަކުގެ އަގަށް ބަލައި، އިތުރު ޕެކޭޖްތަކުންްވެސް ލުއިތައް ލިބިގެންދާނެ ކަމަށެވެ. ބޭނުން ކުރާ މީހުންނަށް ދެރަ ނުވާނެހެން ސާރވިސް ޕްރޮވައިޑަރުންގެ ވާދަވެރިކަމަވެށްސް ފުރުސަތު އޮންނަ ގޮތަށް އިތުރު ޕެކޭޖްތައް ކުރިއަށް އޮތް ތަނުގައި ތައާރަފް ކުރުމުގެ ފުރުސަތު އޮންނާނެ ކަމަށް ވިދާޅުވިއެވެ. މި ހުރިހާ ޕެކޭޖެއްވެސް ޑިޒައިން ކުރެވިގެންދާނީ، ނިސްބަތުން މި އަގުތަކަށް ބަލއިގެން ކަމަށް އިލްޔާސް ވިދާޅުވިއެވެ.

މިފަހަރު ގެނައި ބަދަލުތަކުގައި ބެލީ މެދުކެނޑުމެއްނެތި ޚިދުމަތް ލިބޭނެ ގޮތަށް ޕެކޭޖްތައް ޑިޒައިން ކުރުމަށް ކަމަށާއި، ވިސްނުމަކަށްވީ، މެއިން ޑޭޓާ ހުސްވި ނަމަވެސް މެދުނުކެނޑި ޚިދުމަތް ފޯރުކޮށްދިނުން ކަމަށެވެ. އެގޮތުން ތްރޮޓްލް ސްޕީޑަށް މިގެނައި ބަދަލާއެކު ރައްޔިތުންގެ އެ ޝަކުވާއަށް ނިމުމެއް އަންނާނެ ކަން ޔަގީން ކުރައްވާ ކަމަށް ވިދާޅުވިއެވެ.

ވަކި އަގެއް ކަނޑައަޅައި ޚިދުމަތް ފޯރުކޮށްދޭ ކުންފުނިތަކަށް ދިނުމަކީ ސަރުކާރުގެ އަމާޒެއް ނޫން ކަމަށާއި، 250ރ އިން ދަށުގެ ޕެކޭޖްތައްވެސް މިހާރު ހުރި އަގަށް ބަލައިގެން ހެޔޮ އަގުގައި ދެވޭނެ ކަމަށް އިލްޔާސް ވިދާޅުވިއެވެ. މޮބަައިލް ޑޭޓާގެ ޕެކޭޖް ތަކުގެ ތަފްސީލް އޮކްޓޯބަރ މަހާ ގާތް ކޮށްފައި އިއުލާން ކުރެވިގެންދާނެ ކަމަށެވެ.

އިތުރު ސާރވިސް ޕްރޮވައިޑަރުންނަށްވެސް ރާއްޖޭގެ މާރކެޓްގައި ފުރުސަތު އޮތް މިންވަރަކުން ފުރުސަތުތައް ދެވޭނެ ކަމަށް ވިދާޅުވިއެވެ.

ޚިދުމަތްތައް މޮނިޓަރ ކުރުމަށް ބޭނުންވާ އިންސާނީ ވަސީލަތްތަކެއް ގާއިމް ކުރުމުގެ މަސައްކަތް އޮތޯރިޓީން މިހާރު ފަށާފައިވާ ކަމަށާއި، އުންމީދަކީ، ވަކި ޔުނިޓެއް ގާއިމް ކުރެވި މޮނިޓަރިންގގެ މަސައްކަތް ފެށުން ކަަމަށް އިލްޔާސް ވިދާޅުވިއެވެ. މޮނިޓަރިންގެ މަސައްކަތް ފަށައި، ފުރަތަމަ މަރުހަލާގައި ނަތީޖާތައް ޝާއިއު ކޮށް، ޚިދުމަތުގެ ފެންވަރު ދަށް ނަމަ ޖޫރިމަނާ ކޮށް ފިޔަވަޅު އަޅާނެ ކަމަށް ވިދާޅުވިއެވެ.

ޑިޖިޓަލް ރާއްޖެއާ ދިމާއަށް މިސްރާބު ޖަހާއިރު އަދިވެސް ކުރަންޖެހޭ ވަރަށް ގިނަ ކަންކަން އެބަހުރި ކަމަށާއި، އައިސީޓީ ނެޓްވާރކް ގާއިމް ކުރުމުގެ މަަސައްކަތް ބާރަށް ކުރިއަށް ދާ ކަމަށް އިލްޔާސް ވިދާޅުވިއެވެ.

އިލްޔާސް ވިދާޅުވީ، ކުރިއަށް އޮތް 3 އަހަރުގެ ތެރޭގައި ޚިދުމަތުގެ ވާދަވެރިކަމުގެ ތެރެއިން ބަދަލުތައް އަންނާނެސް ކުރިއަށްދާނެ ކަަމަށް އުންމީދު ކުރައްވާ ކަމަށާއި، ސަރުކާރަށް ފޯރުކޮށްދޭންޖެހޭ އެހީތައް ފޯރުކޮށްދޭނެ ކަމަށެވެ.