އަހަރު ނިމޭއިރު މޫޑީސްގެ ރިވިއު ރަނގަޅު ވެގެން ދާނެ – މިނިސްޓަރު

މިއަހަރު ނިމޭއިރު ކްރެޑިޓް ރޭޓިން އެޖެންސީ މޫޑީސްގެ ރިވިއު ރަނގަޅުވެގެން ދާނެ ކަމަށް އުންމީދު ކުރައްވާ ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

ބުރާސްފަތި ދުވަހު ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީން) ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މިނިސްޓަރ ވިދާޅުވީ އެންމެފަހުން މޫޑީސްއިން ނެރުނު ރިޕޯޓަކީ އިތުރު އާ ރިވިއުއެއް ހެދުމަށް ފަހު ނެރެވުނު ރިޕޯޓެއް ނޫން ކަމަށެވެ. މޫޑީސްގެ ރިޕޯޓަކީ ކުއާޓަލީ ރިޕޯޓެއްކަން ފާހަގަ ކުރައްވާ މިނިސްޓަރު ވިދާޅުވީ, ފަހުން ނެރުނު ރިޕޯޓުގައި މޫޑީސްއިން ބުނެފައިވަނީ މިދިޔަ އަހަރު ހެދި ރިވިއު އަދިވެސް ދަމަހައްޓާ ވާހަކަ ކަމަށެވެ.

މޫޑީސް އިން އެންމެ ފަހުން ނެރުނު ރިޕޯޓުގައި ރާއްޖެ އަށް ދީފައިވަނީ ބީ3 ރޭޓިން އެކެވެ. އެއީ ކްރެޑިޓް ރިސްކް މަތިކަން ނުވަތަ ފައިނޭންޝަލް ސްޓެބިލިޓީ ދަށްކަން އަންގައިދޭ ރޭޓިން އެކެވެ. ރާއްޖޭގެ އިކޮނޮމިކް ސްޓްރެންތަށް ދީފައިވަނީ ބީއޭ3 ރޭޓިން އެވެ. އެއީ އިގްތިސާދީ ހާލަތު ދަށްކަން އަންގައިދޭ ރޭޓިންއެކެވެ. މީގެ އިތުރުން މޫޑީސްއިން ރާއްޖޭގެ ފިސްކަލް ސްޓްރެންތަށް ދީފައިވަނީ ބީ1 ރޭޓިން އެކެވެ. އެއީ ރާއްޖޭގެ ދަރަނި އިތުރުވެ، ލޯނު ހޯދަން ދަތިވާނެ ކަމަށް ލަފާކޮށް ދީފައިވާ ރޭޓިން އެކެވެ.

މިކަމާ ގުޅިގެން މިނިސްޓަރު ވިދާޅުވީ, އެންމެފަހުން ހުސްވި އަހަރު މޫޑީސް އަދި ފިޗްގެ ރިޕޯޓުގައި ރޭޓިން ދަށްވި މައިގަނޑު ސަބަބަކީ ޝޯޓް ޓާމް ލިކުއިޑިޓީ ރިސްކާއި ރޯލްއޯވާ ރިސްކް އޮތުން ކަމަށެވެ. އެކަމަކު ސުކޫކް ވިއްކައިގެން ޔޫރޯ ބޮންޑުގެ 290 މިލިއަންގެ ތެރެއިން 191 މިލިއަން ދައްކާފައި ވުމުން ލިކުއިޑިޓީ ރިސްކް ނުވަތަ ރޯލްއޯވާ ރިސްކް މިހާރު ރާއްޖެއަށް ނެތް ކަމަށް މިނިސްޓަރު ވިދާޅުވިއެވެ.

މީގެ އިތުރުން މިނިސްޓަރު ވިދާޅުވީ މިއަހަރު ފެށިގެން އައި އިރު އަންދާޒާ ކުރި ވަރަށްވުރެ އިތުރަށް ރާއްޖޭގެ ފަތުރުވެރިކަމުގެ ސިނާއަތް ރަނގަޅުވެގެން ގޮސްފައި ވުމާއެކު, ދެން އަންނަ ރިވިއުއެއްގެ ރޭޓިން ރަނގަޅުވެގެން ދާނެކަމުގެ އުންމީދު އެބަ އޮތް ކަމަށެވެ. އެކަމަކު އެކަން އެގޮތަށް ވެގެން ދާނީ މިހާރު މިއޮތް ކޮވިޑް ސާޖް ރަނގަޅު ކުރެވިގެން ކަމަށް ވިދާޅުވިއެވެ. ހަމަ އެހެންމެ އެކަމަށްޓަކައި ހުރިހާ ރައްޔިތުން ގުޅިގެން މަސައްކަތް ކުރުމުގެ މުހިންމުކަން މިނިސްޓަރު ފާހަގަކުރެއްވިއެވެ.