ބުދަ ދުވަހުގެރޭ 8 ޖެހުމާ ހަމައަށް ގޭބީސީތަކަށް އެކަނި 26،000 ފާސް ދޫކޮށްފައިވޭ

ބުދަ ދުވަހުގެރޭ 8 ޖެހުމާ ހަމައަށް ގޭބީސީތަކަށް އެކަނި 26،000 ފާސް ދޫކޮށްފައިވާ ކަމަށް ފުލުހުން ބުނެފިއެވެ.

ހެލްތު އެމަޖެންސީ އޮޕަރޭޝަން ސެންޓަރ، (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޗީފް ސުޕްރިންޓެންޑަންޓް އޮފް ޕޮލިސް އަބްދުﷲ ޝަރީފް ވިދާޅުވީ ފާސްތަކަށް ހުށަހަޅަން ހުޅުވާލި އިރުން ފެށިގެން ވަރަށް ގިނަ ރިކުއެސްޓްތައް ލިބިފައިވާ ކަމަށެވެ. އޭގެ ސަބަބުން ސިސްޓަމަށް ވެސް ކޮންމެވެސް ވަރަކަށް ލޯޑު ބޮޑުވެ ބުރޫ އަރާފައިވާ ކަމަށެވެ. އެކަމަކު ގިނަ ފާސްތައް މިހާރު ވެސް ދޫކޮށްފައިވާ ކަމަށް ވިދާޅުވިއެވެ. އެގޮތުން ބުދަ ދުވަހުގެ ރޭ 8:00އާ ހަމައަށް 26،300 ފާސް ދޫކޮށްފައިވާ ކަމަށާއި މިހާރު ޕެންޑިންގައި ހުރީ 6،939 ފާސް ކަމަށް ވިދާޅުވިއެވެ.

އަބްދުﷲ ޝަރީފް ވިދާޅުވީ ފާސް ދޫކުރުމުގައި އެކި ސަބަބުތަކާ ހެދި ލަސްތައް ދިމާވަމުން އަންނަ ކަމަށެވެ. އެގޮތުން އާންމުން ފާސްތަކަށް އެދޭ އިރު ވެސް ސަމާލުކަން ދޭން ޖެހޭ ކަންކަމަށް ސަމާލުކަން ނުދިނުމާއި އެފަދަ ސަބަބުތަކަށްޓަކާ ވެސް ލަސްވަމުން އަންނަ ކަމަށް ވިދާޅުވިއެވެ.

އޭނާ ވިދާޅުވީ ބައެއް ބޭފުޅުން ފާހަށް އެދޭ އިރު، ފެން މީޓަރު ނަމްބަރު ޖަހާފައި ހުންނަކަން ފާހަގަވެފައިވާ ކަމަށެވެ. މީގެ އިތުރަށް ބައެއް ގޭބީސީތަކުން ހުއްދައަށް އެދޭ އިރު، ދެ ގަޑީގައި ވެސް އެއް ބޭފުޅަކު ނިކުންނަށް އެދިފައި ހުންނަކަން ފާހަގަވެފައިވާ ކަމަށާއި، ބައެއް ގޭބީސީތަކުން ދެ މީހުންނަށް ވުރެ ގިނަ މީހުން ވެސް ފާހަށް އެދި ހުށަހަޅަމުންދާ ކަމަށް ވިދާޅުވިއެވެ. އެހެންވެ އެކަންކަމާ ގުޅިގެން ހުއްދައަށް އެދޭ ފަރާތާ ކޮމިއުނިކޭޓްކުރުމަށް ދާ ވަގުތަކީ ވެސް ފާސް ދޫކުރުމުގައި ލަސްވުން ދިމާވާ އެއް ސަބަބު ކަމަށާއި ފާހަށް އެދޭ އިރު ވީހާ ވެސް ބޮޑަށް އެކަންކަމަށް ސަމާލުކަން ދިނުމަށް އެދިވަޑައިގެންނެވިއެވެ.

ކޮވިޑް-19 ކޭސްތައް އިތުރުވަމުންދާތީ، ހަވީރު ހަތަރަކުން އަނެއް ދުވަހުގެ ހެނދުނު އަށަކަށް ކާފިއު އިއުލާންކޮށްފައިވާއިރު، ކާފިއު ނޫން ގަޑިތަކުގައި ވެސް ކޮންމެ ގޭބީސީއަކުން ބޭރުގައި އުޅެވެނީ ދެމީހަކަށެވެ. އެ ދެ މީހުންނަށް ވެސް ފާސް ދޫކުރަނީ ދެ ގަޑިއަކަށެވެ. މި ހުއްދައަށް އެދި ހުށަހަޅަން ޖެހެނީ ފުލުހުންގެ ޕޯޓަލްއަށް، އެ ގޭބީސީއެއްގެ ކަރަންޓު މީޓަރު ނަމްބަރާ އެކުގައެވެ. އެކެއްގެ ނަމުގައި ފާސް ނެގުމަށް ފަހު އެ ފާސް ބަދަލުކުރެވޭނީ 72 ގަޑި އިރު ފަހުންނެވެ.

ގޭބީސީތަކަށް ދޫކުރާ ފާސްތަކަކީ ކޮންމެހެން ކުރަން ޖެހޭ ޒަރޫރީ ބޭނުންތަކަށް އެކަނި ބޭނުންކުރެވޭ ފާސްތަކަކަށް ވާއިރު އެ ފާސްތައް ބޭނުންކޮށްގެން، މާލެ އިން ހުޅުމާލެއަށް އަދި ހުޅުމާލެއިން މާލެއަށް ދިއުން ވަނީ މަނާ ކޮށްފައެވެ. އެގޮތުން މާލޭގައި ބޭނުން ކުރެވޭނީ މާލެ އަދި ވިލިމާލެ އަށް ދޫކޮށްފައިވާ ފާސްތައް އެކަންޏެވެ. އަދި ހުޅުމާލޭގައި ބޭނުން ކުރެވޭނީ ހުޅުމާލޭގެ ގޭބީސީތަކަށް ދޫކޮށްފައިވާ ފާސް އެކަންޏެވެ.

ގޭބީސީތަކަށް ދޫކުރާ ފާސްތަކުގެ އިތުރަށް ވެސް އެކި ކުންފުނިތަކުގައި މަސައްކަތްކުރާ މީހުންނަށް ކުންފުނީގެ ނަމުގައި ފާސް ދޫކުރަމުންދާއިރު، ކެފޭ ރެސްޓޯރަންޓުތަކާއި، ފިހާރަތަކަށް ވެސް ޑެލިވަރީ ޚިދުމަތާއި އެހެނިހެން ޚިދުމަތްތަކަށް ވެސް 4 ފާހާއި 8 ފާހާއި ދެމެދުގައި ފާސް ދޫކުރެއެވެ. އަދި އިތުރަށް ފާސް ބޭނުންވާނަމަ އެދުމުގެ ފުރުސަތު ވެސް ވަނީ ހުޅުވާލާފައެވެ. އަދި މީގެ އިތުރަށް ހޮސްޕިޓަލަށާއި، ކޮންމެހެން ބޭނުންވާ އެފަދަ ޒަރޫރީ ބޭނުމަކަށް ބޭރަށް ދާން ބޭނުން ވެއްޖެ ނަމަ ފުލުހުންގެ ޚާއްސަ ފާހެއް ކާފިއު ގަޑީގައި އަދި އެނޫން ގަޑީގައި ވެސް ދޫކުރާނެއެވެ.