ބުދަ ދުވަހުން ފެށިގެން ވެކްސިން ޖަހަންދާ މީހުންނަށް ވެސް ފުލުހުންގެ ޚާއްސަ ހުއްދަ ބޭނުންވާނެއެވެ.

26 މެއި ވާ ބުދަ ދުވަހުން ފެށިގެން މާލެ ސަރަހައްދުގައި އެޅި ޚާއްސަ ފިޔަވަޅު ތަކަކާއެކު މިވަނީ ފުރަބަންދު ކޮށްފައެވެ. އެހެންކަމުން ވެކްސިން ޖަހަންދާން ވެސް ހުއްދަ ހޯދުމަށް އެޗްޕީއޭއިންވަނީ އެދިފައެވެ. މާލެ ސަރަހައްދުގައި މިހާރު އާއްމުކޮށް ހުޅުވާލައިގެން ޖަހަނީ ސިނޮފާރމް ވެކްސިނެވެ. މާލެ ސަރަހައްދުގައި ވެކްސިން ޖަހަނީ ހެނދުނު 9:00 ފެށިގެން 11:00ށް ނޭޝަނަލް އާރޓް ގެލަރީ، ވިލިމާލެ ޔޫތް ސެންޓަރ އަދި ޓްރީ ޓޮޕްގައެވެ.

ފުލޫ ކްލިނިކްތަކާއި، ސާމްޕަލް ކަލެކްޝަން ސެންޓަރު ތަކަށް ސާމްޕަލް ނަގަން ދާއިރު ވެސް ފުލުހުންގެ ހުއްދަ ބޭނުންވެއެވެ. މާލެ ސަރަހައްދުގައި މިހާރު 5 ފްލޫ ކްލިނިކާއި، 4 ސާމްޕަލް ކަލެކްޝަން ސެންޓަރު އެބަހުއްޓެވެ.

މާލެ ސަރަހައްދުގައި އިއުލާނުކޮށްފައިވާ ކާފިއު ގަޑި މިހާރު މިވަނީ ހަވީރު 4:00ން ހެނދުނު 8:00ށް އިތުރުކޮށްފައެވެ. އަދި ކާފިއު ނޫން އެހެން ގަޑިތަކުގައި ބޭރަށް ނުކުމެ އުޅުމުގައި އިތުރު ހިފެހެއްޓުންތަކެއް އަޅަން ނިންމާފައިވާއިރު، ކާފިއު ނޫން ގަޑީގައި ކޮންމެ ގެއަކަށް ވެސް ދެ ރެސިޑެންޝަލް ޕާމިޓް ދޫކުރުމަށް ވަނީ ނިންމާފައެވެ.

ރެސިޑެންޝަލް ޕާމިޓް ދޫކުރާނީ ދެ ބަޔަކަށް ބަހާލައިގެންނެވެ. އެގޮތުން ހެނދުނު 8:00ން މެންދުރު 12:00ށް އަދި މެންދުރު 12:00ން ހަވީރު 4:00ށް ގެއަކަށް 2 ޕާމިޓް ދެ ގަޑިއެއްގައި ދޫކުރެވޭނެ ކަމަށް އެޗްއީއޯސީން ބުނެއެވެ. އެގޮތުން ހޯމަ ދުވަހުގެ ރޭ 8:00ން ފެށިގެން ރެސިޑެންޝަލް ޕާމިޓަށް ރިކުއެސްޓް ކުރެވޭނެ ކަމަށް އެޗްއީއޯސީން ބުނެއެވެ. ރެސިޑެންޝަލް ޕާމިޓަށް އެދޭއިރު ވެރިފިކޭޝަނެއްގެ ގޮތުގައި ގޭގެ ކަރަންޓް މީޓަރުގެ ނަންބަރު ހުށަހަޅަން ޖެހޭނެކަމަށާއި ކޮންމެ ގެއަކުން ވެސް 2 މީހަކަށް ފާސް ލިބޭނެ ކަމަށް އެޗްއީއޯސީން ބުނެއެވެ.

މީގެ އިތުރުން ގްރޭޓަރ މާލެ ސަރަހައްދު ބަހާލާފައިވާ ގޮތަށް ވެސް ވަނީ ބަދަލުތަކެއް ގެނެސްފައެވެ. އެގޮތުން މާލެ އަދި ވިލިމާލެ އަކީ ވަކި ޒޯނެއްގެ ގޮތަށް އަދި ހުޅުމާލެއަކީ ވަކިޒޯނެއްގެ ގޮތުގައި ބަލަން ނިންމާފައިވާއިރު، މާލެ އަދި ވިލިމާލެއަށް ދޫކުރާ ފާސްތައް ހުޅުމާލޭގައި ބޭނުން ނުކުރެވޭނެކަމަށާއި ހުޅުމާލެއަށް ދޫކުރާ ފާސްތައް މާލޭގައި ބޭނުން ނުކުރެވޭނެ ކަމަށް ވަނީ ބުނެފައެވެ. މިއާއެކު މާލެ އަދި ވިލިމާލޭގައި ދިރިއުޅޭ ފަރާތްތަކަށް ހުޅުމާލެ ނުދެވޭ އިރު ހުޅުމާލޭގައި ދިރިއުޅޭ ފަރާތްތަކަށް މާލެ ނާދެވޭނެއެވެ. ރެސިޑެންޝަލް ޕާމިޓް ކާފިއު ގަޑީގައި ބޭނުން ނުކުރެވޭ އިރު، ގެބިސީތަކުން ހުއްދަދޭ ފަރާތްތަކުގެ ނަން ބަދަލު ކުރާނަމަ ނަން ބަދަލު ކުރެވޭނީ ފުރަތަމަ ހުއްދަ ދޭތާ 72 ގަޑި އިރު ފަހުންނެވެ.

އޭގެ އިތުރުން ޑެލިވަރީގެ ޚިދުމަތް ދެވޭނީ ހެނދުނު 6:00ން މެންދަމު 12:00ށް ކަމަށާއި ކުރިން ދޫކޮށްފައިވާ ޑެލިވަރީ ފާސް ބޭނުންކުރެވޭނެ ކަމަށް އެޗްއީއޯސީން ބުނެއެވެ. އަދި ކާފިއުގަޑީގައި ފިހާރަ ތެރެއަށް ވަދެ ވިޔަފާރި ކުރާނަމަ ފިޔަވަޅު އަޅާނެ ކަމަށް ވެސް އެޗްއީއޯސީން ބުނެއެވެ.