މާލީގެ ސިފައިން ނުކުމެ ރައީސާއި ބޮޑުވަޒީރު ހައްޔަރުކޮށްފި

އެފްރިކާގެ ގައުމެއް ކަމަށްވާ މާލީގެ ސިފައިން އެތާގެ އިންތިގާލީ ރައީސާއި ބޮޑުވަޒީރު ހައްޔަރުކޮށްފިއެވެ.

އދ. އާއި އެފްރިކަން ޔޫނިއަނުން ނެރުނު ބަޔާނެއްގައި ބުނީ މާލީގެ އަސްކަރިއްޔާއިން އެގައުމުގެ އިންތިގާލީ ސަރުކާރުގެ ރައީސް ބާ އެންޑޯ އާއި ބޮޑުވަޒީރު މޮކްޓާ އާން ހައްޔަރު ކޮށްފައިވާ ކަމަށާއި، މި ދެ ބޭފުޅުން އެއްވެސް ޝަރުތަކާއި ނުލައި ވަގުތުން ދޫކޮށްލުމަށް ގޮވާލާ ކަމަށެވެ. އަދި އެ ދެ ބޭފުޅުންގެ އިސްތިއުފާ މަޖުބޫރުން ހޯދުން ފަދަ އަމަލެއް ބައިނަލްއަގްވާމީ މުޖުތަމައުން ބަލައި ނުގަންނާނެ ކަމަށްވެސް ބުނެފައިވެއެވެ.

މާލީގެ ސަރުކާރު އޮފިޝަލުންނާއި ހަވާލާދީ މީޑިއާތަކުން ރިޕޯޓް ކޮށްފައިވާ ގޮތުގައި ރައީސާއި ބޮޑުވަޒީރުގެ އިތުރުން ޑިފެންސް މިނިސްޓަރު ސުލެއިމާން ޑުކޯރު ވެސް ވަނީ ހައްޔަރު ކޮށްފައެވެ. މި ބޭފުޅުން ހައްޔަރު ކޮށްފައި ވަނީ ވެރިރަށް ބަމާކޯގެ ކައިރީ ހުންނަ އަސްކަރީ މަރުކަޒެއްގައެވެ.

މާލީގެ ލީޑަރުން ހައްޔަރު ކޮށްފައި ވަނީ މިދިޔަ އޮގަސްޓު މަހު އެގައުމަށް ގެނައި އަސްކަރީ ބަޣާވަތަށްފަހު އެކުލަވާލި ސަރުކާރަށް ބަދަލުތަކެއް ގެނަސް އެ ބަޣާވާތުގައި އިސްކޮށް ތިބި ސިފައިންގެ މީހުން ސަރުކާރުން ބޭރުކުރުމާ ގުޅިގެންނެވެ.