ކުރީގެ އޮޑިޓަރ ޖެނެރަލް އޮނަރަބަލް އިސްމާއީލް ފަތުހީ އަވަހާރަވެއްޖެއެވެ.

1993 ނޮވެމްބަރުން ފެށިގެން 2008 ގެ ޖެނުއަރީ 16 ވަނަ ދުވަހުގެ ނިޔަލަށް ރާއްޖޭގެ އޮޑިޓަރ ޖެނެރަލްގެ މަގާމު އަދާކުރެއްވި އިސްމާއީލް ފަތުހީ އަވަހާރަ ވެފައި ވަނީ ކޮވިޑަށް ޕޮޒިޓިވްވެ ދަރުމަވަންތަ ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށެވެ.

ފަތުހީ ވަނި ދިވެހި ސަރުކާރުން ދެއްވާ ނިޝާން އިއްޒުއްދީންގެ އިއްޒަތުގެ ޝަރަފް 2013 ވަނަ އަހަރު ހާސިލް ކުރައްވާފައެވެ.

އެކައުންޓިންގ ދާއިރާއިން ފަތުހީ ކޮށްދެއްވި ގިނަގުނަ ޚިދުމަތްތަކުގެ އަގު ވަޒަން ކުރުމުގެ ގޮތުން ލައިފްޓައިމް އެޗީވްމަންޓް އެވޯޑާއި "ފާދަރ އޮފް އެކައުންޓިންގ ޕްރޮފެޝަން" ގެ ލަގަބުވެސް އަރުވާފައިވެއެވެ.

ދިވެހި ދައުލަތަށް 46ށް ވުރެ ދިގުމުއްދަތަކަށް ޚިދުމަތް ކުރައްވާފައިވާ ފަތުހީއަކީ ބޭންކް އޮފް މޯލްޑިވްސް އުފައްދައި ހިންގެވުމުގައިވެސް ސަރުކާރަށް ލަފާދެއްވައި އެ މަސައްކަތުގައި އުޅުއްވި ބޭފުޅެކެވެ. އޭގެ އިތުރުން، ދިވެހި ރާއްޖޭގައި އޭ.އޭ.ޓީ ތައާރަފް ކުރެއްވުމުގައި އިސް ރޯލެއް އަދާކުރައްވާފައިވާއިރު، ރާއްޖޭގައި "ބުކް ކީޕިންގ" ދިވެހި ބަހުން އެންމެ ފުރަތަމަ ކިޔަވައިދެއްވަން ފެއްޓެވީވެސް ފަތުހީއެވެ. އަދި މޯލްޑިވްސް މަނިޓަރީ އޮތޯރިތީ ވުޖޫދުކޮށް އިންތިޒާމް ކުރުމުގައިވެސް އޮނަރަބްލް އިސްމާއީލް ފަތުހީގެ ރޯލް ވަރަށް ބޮޑެވެ.

ފަތުހީއަކީ ޔުނިވަރސިޓީ އޮފް ބޮމްބޭއިން ކޮމަރސްގެ ދާއިރާއިން ބެޗަލަރސް ޑިގްރީ ހާސިލްކުރައްވައިގެން ހުންނެވި ބޭފުޅެކެވެ. ފަތުހީ ފުރުއްވާފައިވާ ބައެއް މަގާމުތަކުގެ ތެރޭގައި މިނިސްޓްރީ އޮފް ފިނޭންސްގެ ޑިރެކްޓަރުގެ މަގާމާއި އެމްއެމްއޭގެ ވައިސް ގަވަރުނަރުގެ މަގާމާއި މިނިސްޓަރ އޮފް ސްޓޭޓް ފޯރ ފިނޭންސް ގެ މަގާމުވެސް ހިމެނެއެވެ. އޭގެ އިތުރުން ރާއްޖޭގެ ފުރަތަމަ އޮޑިޓް ބިލް ޑްރާފްޓް ކުރެއްވުމުގައިވެސް ފަތުހީ ވަނީ އިސްރޯލެއް އަދާކުރައްވާފައެވެ.

އޮނަރަބްލް އިސްމާއީލް ފަތުހީއަކީ ރާއްޖޭގެ ކުރީގެ ޖަސްޓިސް މިނިސްޓަރުކަމާއި އުއްތަމަ ފަނޑިޔާރުކަންވެސް ކުރެއްވި ފަޟީލަތުއްޝައިޚު މޫސާ ފަތުހީގެ ކޮއްކޯފުޅެކެވެ.