ކޮވިޑް ފެތުރުން ކޮންޓްރޯލް ކުރުމަށް އަޅާފައިވާ ފިޔަވަޅުތަކާ ޚިލާފުވެގެން ބްރެޒިލްގެ ރައީސް ޖައިރް ބޮލްސޮނާރޯ ޖުރިމަނާކޮށްފިއެވެ.
ރައީސް ބޮލްސޮނާރޯ ޖުރިމަނާކުރީ ބްރެޒިލްގެ މަރަންހާއޯ ސްޓޭޓްގެ ސިއްހަތާބެހޭ އިދާރާގެ ފަރާތުންނެވެ. އެ ސްޓޭޓްގައި ކޮވިޑް ފެތުރުން ހުއްޓުވުމަށް އަޅާފައިވާ ފިޔަވަޅުތަކުގެ ތެރޭގައި ސަތޭކަ މީހުންނަށްވުރެ ގިނަ މީހުން ހިމެނޭހެން އެއްވެސް ކަހަލަ އެއްވުމެއް ނުބޭއްވުމާއި ބޭރުތެރޭގައި އުޅޭއިރު މާސްކު އެޅުން މަޖުބޫރު ކުރުން ހިމެނެއެވެ. އެކަމަކު ހުސްވި ހަފުތާ ތެރޭގައި ރައީސް ބޮލްސޮނާރޯ އެ ސްޓޭޓަށް ވަޑައިގެން ސަޕޯޓަރުންނާ ބައްދަލު ކުރެއްވުމަށް ވަރަށް ބޮޑު އެއްވުމެއް ވަނީ ބާއްވަވާފައެވެ. މި އެއްވުމުގައި ރައީސް ހުންނެވީ މާސްކެއްވެސް ނެތިއެވެ.
މަރަންހާއޯ ސްޓޭޓްގެ ގަވަރުނަރު ފްލޭވިއޯ ޑީނޯ ވިދާޅުވީ އެތާގެ ސިއްހަތާބެހޭ އިދާރާގެ ފަރާތުން ރައީސް ޖުރިމަނާކޮށްފައިވާ ކަމަށާއި ރައީސަކަސް ގަވައިދުތަކާއި ކުޅެ ބޭނުންހާ އެއްޗެއް ނުހެދޭނެ ކަމަށެވެ. އެންމެންގެ މައްޗަށްވެސް އެއްވަރަކަށް ގަވާއިދު ހިނގާނޭ ކަމުގައެވެ. މި ޖުރިމަނާ އިސްތިއުނާފު ކުރުމަށް ރައީސް ބޮލްސޮނާރޯއަށް ލިބިފައިވަނީ ފަނަރަ ދުވަހެވެ. ޖުރިމަނާގެ ހަގީގީ އަދަދު ނިންމާނީ އެ މަރުހަލާއަށްފަހުގައެވެ. އެނގިފައިވާ ގޮތުގައި ޖުރިމަނާ ކުރާނީ ބޮޑު އަދަދަކުންނެވެ.
ރައީސް ބޮލްސޮނާރޯއަކީ ކޮވިޑުވެސް ގަބޫލުކުރައްވާ ބޭފުޅެއް ނޫނެވެ. މަރަންހާއޯ ސްޓޭޓުގައި ބޭއްވުނު ބައްދަލުވުމުގައި އެ ސްޓޭޓުގައި އަޅާފައިވާ ފިޔަވަޅުތައް ކުށްވެރިކުރައްވައި ސްޓޭޓުގެ ގަވަރުނަރަށް ވެސް ބޮލްސޮނާރޯ ވަނީ ފާޑު ވިދާޅުވެފައެވެ. އެގޮތުން ގަވަރުނަރު ފްލޭވިއޯ ޑީނޯއަކީ ފަލަ ޑިކްޓޭޓަރޭ ވެސް ވިދާޅުވިއެވެ. ވާއެއްޗެއް ނުވާއެއްޗަކީ ކޮބައިހޭ، އެ އެއްޗަކީ ކޮވިޑޭވެސް ވިދާޅުވިއެވެ.
ބްރެޒިލްއަކީ ކޮވިޑުގައި މިހާތަނަށް ދުނިޔެއިން އެންމެ ގިނަބަޔަކު މަރުވި ދެވަނަ ގައުމެވެ. ބްރެޒިލްގެ ބައިމިލިޔަނެއްހާ މީހުން ކޮވިޑު ބަލީގައި ވަނީ މަރުވެފައެވެ. އެއީ މިބަލި ޖެހުނު ސޯޅަ މިލިޔަން މީހުންގެ ތެރެއިންނެވެ. ބަލި ޖެހުނު މީހުންގެ ތެރޭގައި ރައީސް ބޮލްސޮނާރޯ ވެސް ހިމެނިވަޑައިގަންނަވައެވެ. އެކަމަކުވެސް ކޮވިޑަކީ ހަގީގީ ބިރެއްކަމަށް އޭގެފަހުންވެސް އޭނާ ގަބޫލެއް ނުކުރައްވައެވެ.
