ކޮވިޑްގައި ރާއްޖެއިން އިތުރު މީހަކު ނިޔާވެއްޖެ، އަދަދު 121ށް
22 މެއި 2021 | ހޮނިހިރު 08:24ނިޔާވެފައިވަނީ އުމުރުން 48 އަހަރުގެ މީހެއް
ނިޔާވެފައިވަނީ ހުޅުމާލެ މެޑިކަލް ފެސިލިޓީގައި ފަރުވާ ހޯދަމުން ދިއަ ދިވެހި ފިރިހެނެއް
ރާއްޖެއިން ކޮވިޑް-19 ޖެހިގެން އިތުރު މީހަކު ނިޔާވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ)ން ބުނީ ހޮނިހިރު ދުވަހުގެ މެންދުރު 12:02 ހާއިރު ހުޅުމާލެ މެޑިކަލް ފެސިލިޓީގައި ފަރުވާ ހޯދަމުންދިއަ އުމުރުން 48 އަހަރުގެ ދިވެހި ފިރިހެނެއް ނިޔާވެފައިވާ ކަމަށެވެ. މިއީ ރާއްޖޭން މި ބަލީގައި ނިޔާވި 121 ވަނަ މީހާއެވެ.
ރާއްޖޭގެ ކޮވިޑް-19ގެ ހާލަތު ގޯސްވެފައިވާއިރު ކޮވިޑްގެ ސަބަބުން ނިޔާވަމުންދާ މީހުންގެ އަދަދުވެސް ދަނީ އިތުރު ވަމުންނެވެ. ހުކުރު ދުވަހު އެކަނި ވެސް ރާއްޖޭން މި ބަލީގައި ހަތަރު މީހަކު ނިޔާވެގެން ރިޕޯޓުކޮށްފައިވެއެވެ. މީގެ އިތުރުން ކޮވިޑް ޖެހިގެން ރާއްޖޭގައި މިފަހުން އެންމެ ގިނަ މީހުން އެއްދުވަހާ ނިޔާވެގެން ރިޕޯޓްކޮށްފައިވަނީ ބުދަ ދުވަހުއެވެ. އެދުވަހު އެކަނި 7 މީހުން ވަނީ ނިޔާވެފައެވެ.
ކޮވިޑްގެ ހާލަތު ގޯސްވަމުން ދިއުމާއެކު މާލެ ސަރަހައްދުގެ އިތުރުން ރާއްޖޭގެ އެކި ކަންކޮޅުތަކުގައި އަޅާފައިވާ ފިޔަވަޅުތައް އެޗްޕީއޭއިން ވަނީ ވަރުގަދަ ކޮށްފައެވެ. އެގޮތުން މިހާރު ވެސް މާލެ ސަރަހައްދުގެ އިތުރުން ބައެއް ރަށްރަށުގައި ކަރފިއު ވެސް ދަނީ ހިންގަމުންނެވެ.
