ފަލަސްޠީނުގެ މައްސަލައަކީ ހުރިހާ މުސްލިމުންގެ މައްސަލައެއް ކަމަށް ހުކުރު ޚުތުބާގައި ބުނެފިއެވެ.

''ފަލަސްޠީނު: އިސްލާމީ އުއްމަތުގެ ޒިންމާއެއް'' މިމައުޟޫއަށް ރާއްޖޭގެ އެކި ކަންކޮޅުތަކަށް އިއްވި ހުކުރު ޚުތުބާގައި ވަނީ ފަލަސްޠީނުގެ މައްސަލައަށް ވަރަށް ތަފްސީލީ ގޮތެއްގައި އަލިއަޅުވާލާފައެވެ.

ޚުތުބާގައި ބުނީ ފަލަސްޠީނުގެ މައްސަލައަކީ ދާޚިލީ މައްސަލައެއް ނޫން ކަމަށާއި، އެއީ އަރަބިންގެ މައްސަލައެއް ވެސް ނޫން ކަމަށެވެ. މި މައްސަލައަކީ ހުރިހާ މުސްލިމުންގެ މައްސަލައެއްކަން ފާހަގަކޮށް ޚުތުބާގައި ބުނީ މުސްލިމުންގެ ބިމަކަށް ކާފިރުން އަރައި، އެ ބިން ފޭރިގެންފި ނަމަ، އެމީހުންގެ ކެކުޅުންތަކަށާއި، ގިސްލުންތަކަށާއި، ރުއިންތަކަށް އިޖާބަ ދޭން ޖެހޭ ކަމަށެވެ. އެ ބިން މިނިވަންކުރުމަށް، އެންމެހައި މުސްލިމުން އެކަތިގަނޑަކަށްވެ، މަސައްކަތް ކުރަން ޖެހޭ ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ ފަލަސްޠީނު މީހުންނާ ދެކޮޅަށް، އިސްރާއީލުން ހިންގާ ލާއިންސާނީ އަމަލުތަކަކީ، ނަސްލު ނައްތައިލުމުގެ ހަނގުރާމައެއް ކަމަށާއި، ތަފާތު ސިފަސިފައިގައި އެމީހުން މި ހަނގުރާމަ ކުރާ ކަމަށެވެ. މީގެ ތެރޭގައި ނަމާދަށް ނުދެވޭ ގޮތަށް ފަލަސްޠީނުގެ މިސްކިތްތައް ޙިސާރުކުރުމާއި، އެ މީހުން ބަނޑަށް ޖައްސައި، ކަނު އަނދިރީގައި ބައިތިއްބުމާއި، ސާފު ބޯފެނާއި ފާޚާނާ ކުރެވޭނެ ވަސީލަތްތައް ހަލާކުކޮށް، މުވާޞަލާތީ ވަސީލަތްތަކާއި އަސާސީ ޚިދްމަތްތަކުން މަޙްރޫމު ކުރުމާއި، ޖަމާޢީ އަދަބުތައް ތަންފީޛު ކުރުން ހިމެނޭ ކަމަށް ޚުތުބާގައި ބުނެފައިވެއެވެ.

އެގޮތުން މިދުވަސްވަރަކީ ފަލަސްޠީނުގެ ބިމަށް އަރައި، އަތްގަދަކޮށްގެން ތިބި ޔަހޫދީން، މަސްޖިދުލް އަޤްޞާގެ ޙުރްމަތް ކަނޑައި، އެޙަރަމްފުޅަށް ނަމާދަށް ދާ މުސްލިމުންނަށް ހުރަސްއަޅައި، އެ މީހުންގެ ލޭ އޮހޮރުވަމުންދާ ދުވަސްވަރެއް ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ މި މުޤައްދަސް ބިމުގެ މައްސަލަ އިސްލާމީ އުއްމަތުގެ މައްސަލައަކަށް ނުވާންވީ އެއްވެސް ސަބަބެއް ނެތް ކަމަށެވެ. އެއީ މުސްލިމުންގެ ފުރަތަމަ ޤިބްލަ ކަމަށާއި، މުސްލިމުންގެ އެންމެ މުޤައްދަސް ތިން ޙަރަމްފުޅުގެ ތެރެއިން އެއް ޙަރަމްފުޅު ކަމަށެވެ. އަދި ދަތުރުހަދައިގެން ދިޔުމަށް އަންގަވާފައިވާ ތިން މިސްކިތުގެ ތެރެއިން އެއް މިސްކިތް ކަމަށް ޚުތުބާގައި ބުނެފައިވެއެވެ.