އެމްއައިޓީޑީސީގެ ކުރީގެ އެމްޑީއާއި ޑީއެމްޑީއަށް ދައުވާކުރަން ހުށައަޅައިފި
ދައުވާކުރުމަށްޓަކައި ޕީޖީ އޮފީހަށް ފޮނުވާފައިވަނީ ބުރާސްފަތި ދުވަހު
އެމްއައިޓީޑީސީގެ ކުރީގެ މެނޭޖިންގ ޑިރެކްޓަރ މުޙައްމަދު ޝާހިދު
މޯލްޑިވްސް އިންޓެގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީގެ) ކުރީގެ މެނޭޖިންގ ޑިރެކްޓަރ މުޙައްމަދު ޝާހިދު (މ.ކަނަމަނަ / ކ.މާލެ) އާއި، ޑެޕިއުޓީ މެނޭޖިންގ ޑިރެކްޓަރ، ޝަކީބާ ޙުސައިން (ލުކިންގްލާސް / ގދ.ތިނަދޫ) ގެ މައްޗަށް ދައުވާ ކުރަން އެދި އެންޓި ކޮރަޕްޝަން ކޮމިޝަން (އޭސީސީން) ޕްރޮސެކިއުޓަރ ޖެނެރަލް (ޕީޖީ) އޮފީހަށް ހުށައަޅައިފިއެވެ.
އެކަމާ ގުޅޭގޮތުން އޭސީސީން ނެރުނު ބަޔާނެއްގައި ބުނީ، މި މައްސަލައަކީ 2018 ވަނަ އަހަރުގެ އައު އަހަރު ފާހަގަކުރުމަށް އޭރުގެ ސަރުކާރުން މާލޭގައި ބޭއްވި މިއުޒިކް ޝޯވގައި ބޭނުންކުރުމަށް "ލިންކްސް އައި" ނަމަކަށް ކިޔާ ކުންފުންޏެއް މެދުވެރިކޮށް އެމްއައިޓީޑީސީއަށް ކުއްލިގޮތަކަށް ކޯލްޑް ސްޕާކްސް މެޝިނެއް ގަނެފައިވާކަމަށް ބުނާ މައްސަލައެއް ކަމަށެވެ. އެ މައްސަލަ ކޮމިޝަނުން ތަޙްޤީޤުކޮށް ނިންމައި، ދައުވާކުރުމަށްޓަކައި ޕީޖީ އޮފީހަށް ފޮނުވާފައިވަނީ ބުރާސްފަތި ދުވަހުއެވެ.
މި މައްސަލައިގެ ތަހުގީގާ ގުޅޭގޮތުން އޭސީސީން ބުނީ، 2018 ވަނަ އަހަރުގެ އައު އަހަރު ފާހަގަކުރުމަށް ލިންކްސްއައިއާ ޙަވާލު ކޮށްގެން ކޯލްޑް ސްޕާކްސް މެޝިންތަކެއް (ކޯލްޑް ފަޔަރ އިކުއިޕްމަންޓް) ގަނެފައިވާ ކަމަށެވެ. އެ މެޝިންތައް ގަތުމަށް 7,234 އެމެރިކާ ޑޮލަރު ޚަރަދު ކޮށްފައިވާކަމަށް އޭސީސީން މައުލޫމާތު ދެއެވެ. މިއީ ދިވެހި ރުފިޔާއިން ބަލާނަމަ، 111,548.28 (އެއްލައްކަ އެގާރަހާސް ފަސްސަތޭކަ ސާޅީސްއަށް ރުފިޔާ އަށާވީސް ލާރި) އެވެ. ނަމަވެސް، އެ މެޝިންތަކާއި، މެޝިންތައް އޮޕަރޭޓްކުރަން ބޭނުންވާ ޕައުޑަރ، އައު އަހަރުގެ މިއުޒިކް ޝޯ ބާއްވަންވާއިރަށް ވެސް ލިބިފައި ނުވާކަން ތަޙްޤީޤަށް ފާހަގަ ކުރެވުނުކަމަށް އޭސީސީން މައުލޫމާތު ދެއެވެ.
އޭގެ އިތުރުން، އެ މެޝިންތައް ގެނައީ ކޮން ފަރާތަކުން އެދިގެން، ކޮން ފަރާތަކުން ނިންމައިގެންކަން އަދި އިވެންޓް އޮތް ދުވަހަށް މެޝިންތައް ލިބުނުކަން ލިޔެކިޔުމުން އެނގެންނެތުމާއެކު، އޭރު މެޝިންތައް ގެނެސް އެމްއައިޓީޑީސީއާ ހަވާލުކޮށްފައި ނުވާކަން ތަޙްޤީޤުން އެނގޭކަމަށް އޭސީސީން ބުނެއެވެ. އަދި ކުންފުނީގެ މެނޭޖްމަންޓް ބަދަލުވެ 2019 ގައި އެންގުމުން ލިންކްސް-އައި އިން ވަނީ އެ މެޝިންތައް ކުންފުންޏާ ޙަވާލުކޮށްފައެވެ. ނަމަވެސް އޭގެ ކުރިން އެއްވެސް އިރެއްގައި އެ މެޝިންތައް ހޯދުމަށް ނުވަތަ މެޝިންތަކަށް ޚަރަދުކުރި ފައިސާ އަނބުރާ ހޯދުމަށް އެމްއައިޓީޑީސީން މަސައްކަތް ކޮށްފައިނުވާކަން ފާހަގަކޮށް އޭސީސީން ބުނީ، 1 އަހަރާއި 5 މަސްވަންދެން އެ މެޝިންތައް ހުރީ ލިންކްސް-އައި ގެ ބެލުމުގެ ދަށުގައި ކަމަށެވެ.
އޭސީސީން މައުލޫމާތު ދޭ ގޮތުގައި މި މެޝިންތަކަށް ފައިސާ ދައްކާފައިވަނީ ފައިސާ ޚަރަދުކުރުމުގައި ހުންނަން ޖެހޭނެކަމަށް ކުންފުނީގެ ޕްރޮކިއުމަންޓް ޕޮލިސީ (29 ސެޕްޓެންބަރު 2016) ގައި ބަޔާންކޮށްފައިވާ ލިޔެކިޔުންވެސް ފުރިހަމަ ނުކޮށެވެ. އެގޮތުން، މެނޭޖްމަންޓްގެ ނިންމުމެއް، ޕަރޗޭސް ރިކުއެސްޓެއް، ކޯޓޭޝަނެއް، ޕަރޗޭސް އޯޑަރެއް، އިންވޮއިސްއެއްވެސް ނެތި މެޝިންތައް ގެންނަންވެގެން އެޑްވާންސްކޮށް ފުލް ޕޭމަންޓް ހަދާފައިވާކަން އެނގެން އޮތްކަމަށް އޭސީސީން ބުނެއެވެ. އަދި އެ ފައިސާ ޚަރަދުކުރުމަށް ހުއްދަދީފައިވަނީ އެމްއައިޓީޑީސީގެ އޭރުގެ މެނޭޖިންގ ޑިރެކްޓަރ މުޙައްމަދު ޝާހިދު އާއި ޑެޕިއުޓީ މެނޭޖިންގ ޑިރެކްޓަރ ޝަކީބާ ޙުސައިން ކަން ތަޙުޤީޤަށް ހޯދާފައިވާ ލިޔެކިޔުންތަކުންނާއި ތަޙުޤީޤަށް ބަޔާންދީފައިވާ ފަރާތްތަކުގެ ބަހުން އެނގޭކަމަށް އޭސީސީން މައުލޫމާތު ދެއެވެ.
މި ކަންކަމަށް ރިޢާޔަތްކޮށް، އެ ފަރާތްތަކުގެ މައްޗަށް ދަޢުވާކުރުމަށްޓަކައި ފޮނުވާފައިވަނީ، ކޮރަޕްޝަން ހުއްޓުވުމާއި މަނާކުރުމުގެ ޤާނޫނުގެ 12 މާއްދާގެ (ހ) އާއި، ދިވެހިރާއްޖޭގެ ޤާނޫނުލްޢުޤޫބާތުގެ 513 ވަނަ މާއްދާގެ (ށ) ގެ ދަށުން، ރަސްމީ ޙައިސިއްޔަތުން އެފަރާތްތަކުގެ ވާޖިބު އަދާކުރުމުގައި، އެފަރާތްތަކަށް ލިބިފައިވާ ރަސްމީ ޙައިސިއްޔަތުގެ ނުފޫޒު ނަހަމަ ގޮތުގައި ބޭނުންކޮށްގެން ވަކި ފަރާތަކަށް ނާޖާއިޒު ފައިދާ ހޯދައިދިނުމުގެ ކުށުގެ ދަޢުވާއެވެ.
