މި ފަހަރުގެ ތިންވަނަ ޑިވިޝަން ނިންމަން މަޖުބޫރު: ބައްސާމް

މި އަހަރުގެ ތިންވަނަ ޑިވިޝަން ފުޓްބޯޅަ މުބާރާތް ނިންމުން މަޖުބޫރު ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

މި މަހުގެ ތިންވަނަ ދުވަހު އެފްއޭއެމުން ވަނީ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މި ފަހުން އިއުލާންކުރި ފިޔަވަޅުތަކާ އެއްގޮތަށް އަމަލުކުރުމުގެ ގޮތުން ތިންވަނަ ޑިވިޝަން މެދުކަނޑާލާފައެވެ. ތިންވަނަ ޑިވިޝަން މެދުކަނޑާލިއިރު، މި މުބާރާތުގެ ކުޅުން ފަށާފައިވަނީ މިދިޔަ އޭޕްރީލް މަހުގެ 12 ވަނަ ދުވަހުއެވެ. އެ ފަހަރު މުބާރާތުގެ ކުޅުން ފަށާފައިވަނީ ތިން ފަހަރެއްގެ މަތިން މުބާރާތް ފަސްކުރުމަށްފަހުއެވެ. އެގޮތުން އެންމެ ފުރަތަމަ މި މުބާރާތް ފެށުމަށް އެފްއޭއެމުން ތާވަލުކުރީ ފެބްރުއަރީ މަހުގެ އެއްވަނަ ދުވަހުއެވެ. އެކަމަކު ފަހުން މި މުބާރާތް ފެށުން އެ މަހުގެ ހަތަރުވަނަ ދުވަހަށް ތާވަލުކުރިއިރު، އަނެއްކާވެސް އެ މަހުގެ 10 ވަނަ ދުވަހަށްވެސް މުބާރާތް ފެށުން ފަސްކުރިއެވެ. ނަމަވެސް ކޮވިޑާ ގުޅިގެން މުބާރާތް ފެށުން ވަރަށް ބޮޑަށް ލަސްވެގެންދިޔައެވެ.

ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަވަމުން ބައްސާމް ވިދާޅުވީ މި ފަހަރުގެ ތިންވަނަ ޑިވިޝަނުގައި މިހާރު ބާކީ އޮތީ މަދު މެޗުތަކެއް ކަމަށާއި، އެހެންކަމުން އެ މުބާރާތް ނިންމަން މަޖުބޫރު ކަމަށެވެ. އެހެންކަމުން ތިންވަނަ ޑިވިޝަން ނިންމާލެވޭނީ ކޮން އިރަކުތޯ ނުވަތަ ފެއްޓޭނީ ކިހާ ހިސާބަކުތޯ ބަލަން ޖެހޭ ކަމަށާއި، އަދި މި މުބާރާތް ނިންމުން މަޖުބޫރުވާ ސަބަބަކީ ދެވަނަ ޑިވިޝަނަށް ޕްރޮމޯޓްވާނެ ޓީމުތައް ކަނޑައެޅިގެންދާނީ ތިންވަނަ ޑިވިޝަނުން ކަމަށްވާތީ ކަމަށްވެސް ވިދާޅުވިއެވެ.

ބައްސާމް އިތުރަށް ވިދާޅުވީ ދެވަނަ ޑިވިޝަން ފެއްޓޭނީ ތިންވަނަ ޑިވިޝަން ނިމިގެން، ޕްރޮމޯޓްވާނެ ޓީމުތައް އެނގިގެން ކަމަށާއި، އެހެން ނަމަވެސް މިހާރު އޭނާގެ ވިސްނުމަކީ މި އަހަރު ދެވަނަ ޑިވިޝަން ނުބާއްވއި، އަންނަ ސީޒަނުގެ ދިވެހި ޕްރިމިއާ ލީގު ފަށާއިރު ދެވަނަ ޑިވިޝަން ފެށުމަށް ކަމަށެވެ.

މި ފަހަރުގެ ތިންވަނަ ޑިވިޝަން މެދުކަނޑާލިއިރު، މި މުބާރާތުގައި 14 ޓީމެއް އައީ ވާދަކުރަމުންނެވެ. އަދި މިހާތަނަށް މި މުބާރާތުގައި ވަނީ 12 މެޗު ކުޅެފައެވެ. މީގެ ކުރިން އެފްއޭއެމުން އިއުލާންކޮށްފައިވާ ޝެޑިއުލްގައިވާ ގޮތުން މާފަންނު ޓާފް ދަނޑުގައި ކުރިއަށްދާ މި މުބާރާތުގެ ފައިނަލް މެޗު ކުޅުމަށް ތާވަލުކޮށްފައި އޮތީ މި މަހުގެ 24 ވަނަ ދުވަހުއެވެ.

މި ފަހަރުގެ ތިންވަނަ ޑިވިޝަން ނިންމަން މަޖުބޫރު ކަމަށް ބައްސާމް ވިދާޅުވިއިރު، މިދިޔަ ދެ އަހަރުވެސް މި މުބާރާތް ބާއްވާފައެއް ނުވެއެވެ.