ހަމަލާއާ ގުޅިގެން ހައްޔަރުކުރި ފާތިހުގެ ބަންދަށް 15 ދުވަސް ޖަހައިފި
ނިރުބަވެރި ހަމަލާއާ ގުޅިގެން މީގެ ކުރިން ވަނީ ތިން މީހަކު ހައްޔަރު ކޮށްފައި
ރައީސް ނަޝީދަށް ދިން ހަމަލާއާ ގުޅިގެން ހައްޔަރުކުރެވުނު އަހްމަދު ފާތިހް
ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ހަމަލާއާ ގުޅިގެން ހައްޔަރު ކުރި ލ. ގަން، ދުންފިނި އުފާ، އަހުމަދު ފާތިހު (23) ގެ ބަންދަށް 15 ދުވަހުގެ މުއްދަތެއް ޖަހައިފިއެވެ.
ފުލުހުން ބުނީ ޓެރަރިސްޓް ހަމަލާއާ ގުޅިގެން ހައްޔަރުކުރެވުނު އަހްމަދު ފާތިހުގެ ބަންދަށް ބުރާސްފަތި ދުވަހު ކޯޓުން 15 ދުވަހުގެ ބަންދުގެ މުއްދަތެއް ޖަހާފައި ވާކަމަށެވެ.
މި މައްސަލައިގައި ފާތިހު ހައްޔަރުކޮށްފައި ވަނީ ބުދަ ދުވަހުގެ ރޭ ބ. ދަރަވަންދޫގައި ފުލުހުން ކުރިއަށް ގެންދިޔަ ޚާއްސަ އޮޕަރޭޝަނެއްގެ ތެރެއިންނެވެ. އޭނާއަކީ މާލޭގައި ދިން ޓެރަރިސްޓް ހަމަލާގެ ބައިވެރިއެއް ކަމަށް ފުލުހުން ވަނީ ބުނެފައެވެ.
މާލޭ ނީލޯފަރު މަގުގައި އެއްޗެއް ގޮއްވާލައިގެން ދިން ނިރުބަވެރި ހަމަލާއާ ގުޅިގެން ފުލުހުން މީގެ ކުރިން ވަނީ ތިން މީހަކު ހައްޔަރު ކޮށްފައެވެ. އެއީ ބޮންގޮއްވުމުގައި އަމަލީގޮތުން ބައިވެރިވި ކަމަށް ތުހުމަތު ކުރެވޭ އަދުހަމް އަހުމަދުގެ އިތުރުން، މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އެވެ.
މެއި މަހުގެ ހަވަނަ ދުވަހު ދިން ހަމަލާއަށްފަހު މާލޭގެ އިތުރުން ރާއްޖޭގެ އެކި ކަންކޮޅުތަކުގައި ފުލުހުން ގެންދަނީ ޚާއްސަ އޮޕަރޭޝަންތަކެއް ހިންގަމުންނެވެ. އެގޮތުން މާލޭގައި ހިންގި އޮޕަރޭޝަންތަކުގައި 5 ގެއެއް ބަލައި ފާސްކޮށް ބައެއް ތަކެތި ފުލުހުންގެ ބެލުމުގެ ދަށަށް ގެނެސްފައިވެއެވެ. ހަމައެހެންމެ, އައްޑޫ ސިޓީގައި ހިންގި އޮޕަރޭޝަންގައި 9 މީހަކާއި ބައެއް ތަކެތި ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން މައުލޫމާތުދެއެވެ.
