ތ. އަތޮޅު ތަޢުލީމީ މަރުކަޒުގެ ހަ ކްލާސްރޫމް އިމާރާތްކުރުމުގެ މަސައްކަތް ހަވާލުކޮށްފި
މަސައްކަތް ކުރުމަށް ހަވާލުކޮށްފައި ވަނީ އެސްޖޭ ޓްރޭޑް ޕްރައިވެޓް ލިމިޓެޑްއާ
ތ. އަތޮޅު ތައުލީމީ މަރުކަޒުގައި އަލަށް އިމާރާތްކުރާ ހަ ކްލާސްރޫމްގެ މަސައްކަތް ހަވާލުކުރުން
ތ. ތިމަރަފުށީގައި ހުންނަ އަތޮޅު ތަޢުލީމީ މަރުކަޒުގައި އަލަށް އިމާރާތްކުރާ ކްލާސްރޫމްތަކުގެ މަސައްކަތް ހަވާލުކުރުމުގެ އެއްބަސްވުމުގައި ސޮއިކޮށްފިއެވެ.
މި މަޝްރޫއުގެ ދަށުން ތ. އަތޮޅު އަތޮޅު ތައުލީމީ މަރުކަޒުގައި ހަ ކްލާސްރޫމް އެޅުމަށް ނިންމާފައި ވެއެވެ. މި މަސައްކަތް ކުރުމަށް ހަވާލުކޮށްފައި ވަނީ އެސްޖޭ ޓްރޭޑް ޕްރައިވެޓް ލިމިޓެޑާއެވެ.
އަންގާރަ ދުވަހު ބޭއްވި ޚާއްސަ ރަސްމިއްޔާތުގައި, މިނިސްޓްރީ އޮފް އެޑިޔުކޭޝަންގެ ފަރާތުން އެއްބަސްވުމުގައި ސޮއި ކުރެއްވީ އެޑިއުކޭޝަން މިނިސްޓްރީގެ ސްޓޭޓް މިނިސްޓަރ އަޙުމަދު ރިޔާޒެވެ. އެސްޖޭ ޓްރޭޑް ޕްރައިވެޓް ލިމިޓެޑް ފަރާތުން މި އެއްބަސްވުމުގައި ސޮއި ކުރެއްވީ އެ ކުންފުނީގެ ޑިރެކްޓަރ ޝިހާދު އިބްރާހިމްއެވެ.
ތ. އަތޮޅު ތައުލީމީ މަރުކަޒުގައި ކްލާސްރޫމް އެޅުމުގެ މަސައްކަތުގެ އަގަކަށް އެސްޖޭ ޓްރޭޑް ލިމިޓެޑުން ހުށަހަޅާފައި ވަނީ 6,932,123.57 ( ހަމިލިއަން ނުވަސަތޭކަ ތިރީސް ދެހާސް އެއް ސަތޭކަ ތޭވީސް ރުފިޔާ ފަންސާސްހަތް ލާރި) އެވެ. އެ މަސައްކަތް އެ ކުންފުންޏާ ހަވާލުކޮށްފައި ވަނީ 365 ދުވަހުގެ ތެރޭގައި އިމާރާތުގެ މަސައްކަތް ނިންމާ ގޮތަށެވެ.
އަންނަ އަހަރުގެ އޭޕްރީލް މަހު މި މަސައްކަތް މުޅިން ނިންމާލެވޭނެ ކަމަށް އެޑިއުކޭޝަން މިނިސްޓްރީން މައުލޫމާތުދެއެވެ.
