އައިޖީއެމްއެޗްގެ ހިޔާ ވިންގް ގައި ކޮވިޑް-19 އަށް ފަރުވާދޭން ފަށައިފިކަމަށް ރައީސް އޮފީހުގެ ތަރުޖަމާން މަބްރޫކް އަޒީޒް ވިދާޅުވެއްޖެއެވެ.

އެޗްއީއޯސީގެ ނޫސްވެރިންގެ ބައްދަލުވުމުގައި ވާހަކަދައްކަވަމުން މަބްރޫކް ވިދާޅުވީ އެ ވޯޑުގައި ހުރި ނުވަ އެނދުގެ ތެރެއިން ހަތަރު އެނދުގައި މިވަގުތު ބަލިމީހުންނަށް ފަރުވާދެމުންދާކަމަށެވެ. އަދި ކުރިއަށް އޮތްތާގައި އައިޖީއެމްއެޗްގެ އިތުރު ވޯޑް ތަކުގައި ކޮވިޑަށް ފަރުވާދެވޭނެ އިންތިޒާމްތައް ހަމަޖައްސަމުންދާ ކަމަށް މަބްރޫކް ވިދާޅުވިއެވެ.

މީގެ އިތުރުން ޑީއެޗް 11 ގައި ހަ މީހުންނަށް ފަރުވާދެމުންދާ ކަމަށާއި އައިސީޔޫގައި ފަރުވާދެމުންދާ މި 6 މީހުންގެ ތެރެއިން ފަސް މީހުންނަށް ފަރުވާދެމުންދަނީ ވެންޓިލޭޓަރަށް ލައިގެން ކަމަށް މަބްރޫކް ވިދާޅުވިއެވެ. އަދި ޑީއެޗް 16 ގައި ދެ މީހުންނަށް ފަރުވާދެމުންދާއިރު، ޑީއެޗް 17ގައި 8 މީހުންނަށް ދަނީ ފަރުވާދެމުންނެވެ.

ހުޅުމާލެ މެޑިކަލް ފެސިލިޓީގައި 190 މީހުންނަށް ފަރުވާދެމުންދާއިރު، އޭގެތެރެއިން ވޯޑްގައި ފަރުވާދެމުންދަނީ 182 މީހަކަށެވެ. އަދި 8 މީހަކަށް ދަނީ އައިސީޔޫގައި ފަރުވާދެމުންނެވެ. މީގެތެރެއިން ފަ5 މީހުންތިބީ ވެންޓިލޭޓަރުގައެވެ. އަދި ހުޅުމާލެ ހޮސްޕިޓަލްގައި 36 މީހުންނަށް ދަނީ ފަރުވާދެމުންނެވެ.

އަތޮޅުތެރޭގެ ފެސިލިޓީތަކަށް ބަލާއިރު، އައްޑޫސިޓީގެ ކޮވިޑް ފެސިލިޓީގައި އެކަކަށް ފަރުވާދެމުންދާއިރު، ބ. އޭދަފުށީ ފެސިލިޓީގައި ފަސް މީހުން، ށ. ފުނަދޫ ފެސިލިޓީގައި ނުވަ މީހުން އަދި ލ. ގަމު ފެސިލިޓީގައި 6 މީހަކަށް ދަނީ ފަރުވާދެމުންނެވެ.

މިވަގުތު 16،996 މީހުން ރާއްޖޭގައި ކޮވިޑަށް ފަރުވާހޯދަމުން އަންނަ އިރު، 268 މީހަކަށް ދަނީ ހޮސްޕިޓަލްގައި އެޑްމިޓްކޮށްގެން ފަރުވާދެމުންނެވެ.